६१ अंकले बढ्यो नेप्से, तीनवटा कम्पनीमा सकारात्मक सर्किट, कारोबार रकम पनि करिब पौने ३ अर्ब

६१ अंकले बढ्यो नेप्से, तीनवटा कम्पनीमा सकारात्मक सर्किट, कारोबार रकम पनि करिब पौने ३ अर्ब

A+ A A-

कारोबारको पहिलो दिन आइतबार लगानीकर्ताले अपेक्षा गरेभन्दा सुखद मौद्रिक नीति आएपछि शेयर बजारले ६० अंक पार गरेको छ ।

नीतिगत व्यवस्थाहरूप्रति राष्ट्र बैंक लचक बन्दा आज शेयरबजारले उत्साहजनक प्रगति गरेको छ । जसले गर्दा लगानीकर्ताको मनोविज्ञान पनि अलिकति बलियो भएर आएको देखिन्छ ।

आइतबार शेयरबजार परिसूचक नेप्से ६१.०५ अंकले वृद्धि भएर २०७८.५१ बिन्दुमा उक्लिएको छ । बजार बढेसँगै यस दिन सेन्सेटिभ इन्डेक्स पनि १२ अंकले बढेर ३९८.३३ बिन्दु कायम भयो ।

यस्तै, १३ वटै समूहका सूचक हरियो देखिँदा सर्वाधिक व्यापार समूहको ४ प्रतिशतभन्दा बढीले वृद्धि भएको देखिन्छ । यस दिन कारोबारमा आएका २१९ वटा कम्पनीको २ अर्ब ७३ करोड ९ लाख २७ हजार रुपैयाँबराबरको ६४ लाख २३ हजार कित्ता शेयर करोबार भएको छ ।

अघिल्लो कारोबार दिनको तुलनामा आइतबार कारोबार रकम पनि बढेको छ । अब बजारले बढ्ने लय समातेको हो कि भन्ने अपेक्षा लगानीकर्तामा देखिएको छ ।

यस दिन कारोबारमा आएका कम्पनीमध्ये १७९ वटा कम्पनीका सूचक हरिया देखिँदा सेन्ट्रल फाइनान्स, समृद्धि फाइनान्स र मल्टी पर्पाेज फाइनान्स कम्पनीको शेयरमूल्यमा सकारात्मक सर्किट लागेको छ । कम्पनीको शेयरमूल्य १० प्रतिशतले बढेर प्रतिकित्ता क्रमशः ३६८ रुपैयाँ, २४७ रुपैयाँ र २७६ रुपैयाँ कायम भएको छ ।

यस दिन सर्वाधिक शेयर कारोबार भने शिवम् सिमेन्टको भएको छ । उक्त कम्पनीको ३९ करोड ७१ लाख ३१ हजार रुपैयाँबराबरको शेयर कारोबार हुँदा शेयरमूल्य प्रतिकित्ता ७८९ रुपैयाँ कायम भएको छ ।

मौद्रिक नीति आएपछिको पहिलो शेयर कारोबारको दिन समग्र बजार हरियो बनेको छ । बजारलक्षित नीतिमा राष्ट्र बैंकले लचकता अपनाइदिँदा शेयरबजारले पहिलो कारोबारको दिन नै हरियो रङले मौद्रिक नीतिलाई स्वागत गरेको छ ।

प्रकाशित मिति: आइतबार, साउन ८, २०७९ १६:०७