विपत्तिबाट जोगिन सबै निकाय उच्च सतर्कतामा

A+ A A-

अविरल वर्षाले देशभर व्यापक रुपमा धनजनको क्षति पुर्याइरहेको बेला बाढी पहिरोबाट उच्च जोखीममा रहेको बाह्रविसे नगरपालिकाले आफ्ना सबै निकायलाई हाइ अर्लटमा राख्ने भएको छ ।

भोटेकोशी बाढीबाट वर्षैपिच्छे जनधनको क्षति व्यहोर्दै आएको नगरपालिकाले विपत व्यवस्थापनको बैठक बसेर सबै सामग्रीसहित आफ्ना सबै निकायहरुलाई हाइ अर्लटमा राख्ने भएको हो ।

बाह्रविसे नगरपालिकाको बिपद व्यवस्थापन समितिको बैठकले सकेसम्म विपदबाट जोगिन र विपद भइहालेमा तत्काल उद्दार र राहतका लागि नगरपालिका भित्र सबै निकायलाई सामग्रीसहित तयारी हालतमा राखिएको बाह्रविसे नगरपालिकाका मेयर निमफुञ्जो शेर्पाले जानकारी दिए ।

बाढीपहिरोबाट राजमार्ग र सहायक मार्गमा हुन सक्ने यातयात अवरोधलाई सहज बनाउनका लागि मध्यभोटेकोशी जलविद्युत आयोजना, डिभिजन सडक कार्यालय लगायतका सरकारी निकायहरुसँग समन्वय गरेर सबै सामग्र्री तयारी अवस्थामा राखिएको मेयर शेर्पाले जानकारी दिए ।

आपत्तकालीन अवस्थाका लागि दुई थान एम्बुलेन्स, तीनवटा स्काभेटर, एउटा लोडर, एक जेसीभी, तीन थान टिप्परलगायतका साधनहरु तयारी अवस्थामा राखिएको मेयर शेर्पाले जानकारी दिए । नगर भित्र कतै समस्या परेमा तत्कालै यी सामग्रीहरु लिएर उद्धार गरिने शेर्पाले जानकारी दिए ।

नगरपालिकाले औषधी, त्रिपाल, खाद्यान्न, लत्ताकपडालगायतका सबै सामग्रीहरु खरिद गरेर तयारी अवस्थामा राखेको मेयर शेर्पाले जानकारी दिए । ‘हामी सकेसम्म विपत्त नहोस भनेर नगरबासीलाई सचेत रहन आग्रह गरिरहेका छौं, यदि कतै दैवी विपत्ती भएर समस्या भयो भने जानकारी हुनसाथ तत्कालै सबै टोली ‘मुभ’ हुन्छन्,’ मेयर शेर्पाले भने ।
राजमार्ग लगायत सहायक मार्गहरुमा पहिरोले सडक अवरुद्ध हुदा समेत नगरपालिकाले तत्कालै खुलाउन टोली तयारी हालतमा राखेको शेर्पाले बताए ।

स्वास्थ्य, शिक्षा, प्रहरी, सशस्त्र प्रहरी लगायत सबै निकायसँग समन्वय गरेर नगरबासीलाई दैवी विपत्तिबाट जोगाउनका लागि आफुहरु लागि रहेको मेयर शेर्पाले बताए ।

प्रकाशित मिति: बिहीबार, साउन ९, २०७६ ०१:११