कलेक्टिभ रूपमा नेपालमा लगानी गर्न गैरआवासीय नेपालीहरूलाई चन्द्र ढकालको आग्रह

कलेक्टिभ रूपमा नेपालमा लगानी गर्न गैरआवासीय नेपालीहरूलाई चन्द्र ढकालको आग्रह

A+ A A-

नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले कलेक्टिभ रूपमा नेपालमा लगानी गर्न गैरआवासीय नेपालीहरूलाई आह्वान गरेका छन् ।

गैरआवासीय नेपाली संघले बिहीबार राजधानीमा आयोजना गरेको वैदेशिक रोजगार, सामाजिक सुरक्षा, लगानी तथा वैदेशिक मुद्रा निक्षेपसम्बन्धी कार्यशालालाई सम्बोधन गर्दै वरिष्ठ उपाध्यक्ष ढकालले कोभिड १९ महामारी तथा रुस–युक्रेन युद्धका कारण मुलुकमा वैदेशिक मुद्रा सञ्चितिमा संकुचन देखिएको बताउँदै यो समय नेपालभित्र विदेशी मुद्रा भित्र्याउने र लगानी विस्तार गर्ने उपयुक्त अवसर भएको बताए ।

'मुलुक अहिले वैदेशिक मुद्रा सञ्चितिको चापबाट गुज्रिएको छ । नेपालमा वैदेशिक मुद्रा भित्र्याउँदै लगानी विस्तारका लागि तपाईंहरूलाई यो उपयुक्त अवसर होे । प्रत्येक मुलुक वा शहरको समूह बनाई कलेक्टिभ रूपमा ठूलाठूला आयोजनाहरूमा लगानी विस्तार गर्नुहोस् । तपाईंहरूले गरेको लगानीले नेपालमा पक्कै पनि राम्रो हुनेछ,' ढकालले भने ।

लगानी गर्न तथा प्रतिफल लैजान केही समस्या भए क्रमशः समाधान गर्दै जान नेपाल उद्योग वाणिज्य महासंघको तर्फबाट पहल गर्नेसमेत वरिष्ठ उपाध्यक्ष ढकालको भनाइ थियो ।

उनले भने, 'नेपालमा लगानीको वातावरण बनाउन तथा तपाईंहरूको लगानीको प्रतिफल लैजान केही समस्या परेमा हामी तपाईंहरूसँगै हुनेछौँ । यहाँहरूलाई आइपर्ने कुनै पनि समस्या समाधानका लागि समग्र निजीक्षेत्रको तर्फबाट आवश्यक पहल गर्न म यहाँहरूलाई प्रतिबद्धतासमेत जनाउन चाहन्छु ।'

उनले नेपालको अर्थतन्त्रका केही सूचकहरू नकारात्मक रहे पनि नेपाल र श्रीलंकाको आर्थिक अवस्था तुलना गर्न नमिल्ने बताए । उनले भने, 'नेपाल र श्रीलंकाको आर्थिक अवस्था तुलना गर्न मिल्दैन । श्रीलंका ठूलो विदेशी ऋणमा छ । हामी त्यस्तो अवस्थामा छैनौँ । अर्को कुरा, उनीहरूको भन्दा हाम्रो अर्थतन्त्रमा रेमिट्यान्स भूमिका फरक खालको छ । त्यसैले हामी कुनै पनि हालतमा श्रीलंकाको जस्तो अवस्थामा पुग्दैनौँ । र, त्यो बाटोमा पनि छैनौँ पनि ।'

आईपीओमा गैरआवासीय नेपालीहरूलाई १० प्रतिशत कोटा छुट्याउँदा यसले अहिलेको तरलता समस्या समाधान गर्न धेरै हदसम्म सहयोग पुगेको बताउँदै उनले नेपालमा गैरआवासीय नेपालीहरूको लगानी भित्र्याउन पनि यसबाट सहयोग पुग्ने अपेक्षा गरे ।

ढकालले नेपालमा सम्भावना नै सम्भावना रहेको र यसलाई अवसरका रूपमा लिएर लगानी गर्न गैरआवासीय नेपालीहरूलाई आग्रहसमेत गरे ।

प्रकाशित मिति: बिहीबार, साउन ५, २०७९ १७:१९