सडक निर्माण भएको तीन दशकपछि स्तरोन्नतिको शिलान्यास, २०८१ सम्ममा सक्नुपर्ने सम्झौता

सडक निर्माण भएको तीन दशकपछि स्तरोन्नतिको शिलान्यास, २०८१ सम्ममा सक्नुपर्ने सम्झौता

A+ A A-

करिब ३ दशकअघि अर्थात् २०५१ सालमा सुर्खेत–बाबियाचौर–बेनीघाट सडक निर्माण सुरु भयो । पूर्वको झापालाई पश्चिमको डडेल्धुरासँग जोड्ने सडकका रूपमा लिइएको यो सडक निर्माण भएको लामो समयसम्म पनि स्तरोन्नति हुन नसक्दा जिल्लाको पश्चिम क्षेत्रका नागरिक अझै पनि धुलाम्मे र हिलाम्मे बनेर यात्रा गर्न बाध्य छन् ।

चुनावी नारामा ठूलै हिस्सा ओगटेको यो सडक नेताहरूको बोलीमा कैयौँपटक कालोपत्रे भइसक्यो तर, सडकको अवस्था भने भनिसाध्य छैन । बर्खामा हिलाम्मे र हिउँदमा धुलाम्मे हुने यो सडकमा कैयौँले अनाहकमा ज्यानसमेत गुमाएका छन् ।

साघुरो सडक, खाल्डाखुल्डी र खोलाहरूका कारण जोखिमपूर्ण यात्रा गर्नुपर्ने बाध्यता छ । बाटो सहज भएको खण्डमा पश्चिम सुर्खेतको चौकुने गाउँपालिकाबाट सुर्खेत आइपुग्न करिव ३ घण्टा लाग्छ । तर, अहिले यो सडक भएर यात्रा गर्दा १ दिन पूरै लाग्छ । बर्खाको समयमा एम्बुलेसन्ससमेत पुग्न नसक्ने अवस्था छ ।

सुर्खेतको पूर्वी सिमाना सल्यानको काल्चेदेखि सुदूरपश्चिमको बेनीघाटसम्म २ सय ३२ किलोमिटर सडक स्तरोन्नतिका लागि वर्षौंदेखि आवाज उठिरहेको छ । संघीय सरकारले मदन भण्डारी राजमार्ग नामकरण गरी स्तरोन्नतिको काम जारी राखे पनि निर्माण कार्य ढिलाइ भएको भन्दै कर्णाली प्रदेश सरकारले बड्डीचौर–विद्यापुर खण्डको बड्डीचौरदेखि पञ्चपुरी नगरपालिकाको खम्बागाडेसम्मको करिब १३ किलोमिटर सडक कालोपत्रेको काम सुरु गरेको छ ।

कर्णाली प्रदेशका सामाजिक विकासमन्त्री यज्ञबहादुर बुढाक्षेत्रीले बिहीबार पहिलो खण्ड बड्डीचौरबाट डोजर चलाएर कालोपत्रेको काम सुरु गरेका हुन् । यही विन्दुलाई शून्य मानेर मदन भण्डारी राजमार्ग नामकरण गरी दुई वर्षअघि नै संघीय सरकारले सडकको विस्तृत परियोजना प्रतिवेदन (डीपीआर) तयार पारेको थियो । तर, संघीय सरकारले सडक निर्माणमा चासो नदेखाएपछि प्रदेश सरकारले सडक कालोपत्रे गर्न अपनत्व लिएको हो ।

पहिलो चरणमा बड्डीचौर–खम्बगाडे सडक कालोपत्रे गरिनेछ । दुई वर्षभित्र निर्माण सम्पन्न गर्ने गरी रु. ४२ करोड ४७ लाख ६१ हजार लागतमा निर्माण कम्पनी अनक जयदेवी जेभी बाँकेसँग सम्झौता भएको छ । निर्माण कम्पनी र पूर्वाधार विकास निर्देशनालय सुर्खेतबीच गत असार १४ गते निर्माण सम्झौता भएको थियो । आगामी २०८१ असार २४ गतेसम्म सडक कालोपत्रे गरिसक्नुपर्नेछ । निर्माण कम्पनीका अनुसार पहिलो चरणमा नाला निर्माण, सडक विस्तारलगायतका कामहरू गरिनेछ ।

निर्माणमा ढिला नहोस् : मन्त्री बुढाक्षेत्री

शिलान्यास कार्यक्रममा बोल्दै मन्त्री बुढाक्षेत्रीले वर्षौंदेखि कच्ची र सडकमा खाल्डा बन्दा आवतजावतमा समस्या भोग्दै आएका नागरिकहरूलाई राहत हुने विश्वास व्यक्त गरेका छन् । उनले स्तरोन्नति को काममा ढिलाइ नगर्न निर्देशन पनि दिए ।

‘नेकपाको स्थायी सरकारले काम गर्न सकेन, डीपीआरको बेला तामझामका साथ शिलान्यास गर्‍यो । तर, निर्माणका लागि चासो देखाएन,’ मन्त्री बुढाक्षेत्रीले भने, ‘गठबन्धनको सरकारले पश्चिमका नागरिकहरूलाई सहज आवतजावतका लागि सडक कालोपत्रे गर्न प्रदेशबाट बजेट विनियोजन गरेर कामको शुभराम्भ गरेका छौँ ।’ उनका अनुसार सडक निर्माणका क्रममा निर्माण व्यवसायीलाई साथ दिएर समयमै काम सम्पन्न गर्न आग्रह गरे ।

सडक निर्माणमा बाधा खडा हुन दिने छैनौँ : अध्यक्ष भण्डारी

बराहताल गाउँपालिकाका अध्यक्ष भीमबहादुर भण्डारीले सडक निर्माणका क्रममा देखिने समस्याहरू समाधान गर्न गाउँपालिका प्रतिबद्ध रहेको बताए । उनले भने, 'पहिलो खण्डमा निर्माण भइरहेको सडकको धेरै भाग गाउँपालिकाभित्र पर्ने भएकाले यस क्षेत्रमा देखिने समस्या समाधानका लागि गाउँपालिका कटिबद्ध छ ।'

प्रकाशित मिति: बिहीबार, साउन ५, २०७९ १८:१५