इजरायलमा कामदार पठाउने प्रक्रिया पुनः सुरु, दोस्रो चरणमा सय जना उड्दै

A+ A A-

चार महिनापछि इजरायलमा नेपाली कामदार पठाउने काम पुन: सुरु भएकाे छ । वैदेशिक रोजगार विभागले इजरायलको रोजगारीका लागि दोस्रो चरणमा सय जना युवाको भिसा र उडान तालिका सार्वजनिक गरेकाे हाे ।

नेपाल सरकार र इजरायल सरकारबीच भएको श्रम सम्झौताबमोजिम इजरायलका दीर्घकालीन स्याहार केन्द्रमा सहयोगी कामदारको रूपमा कार्य गर्न छनोट भएका १ हजार १ सय ७५ जना कामदारमध्ये करार सम्झौता (एसईसी)सम्पन्न भई २ सय ९७ जना कामदार भने यसअघि नै इजरायल प्रस्थान गरिसकेका छन् । साउन ८ र ९ गते थप १ सय श्रमिकको उडान हुने विभागले जनाएको छ ।

नेपालस्थित इजरायली दूतावासले इजरायलको परराष्ट्र मन्त्रालय सम्बद्ध कर्मचारीहरूको श्रम विवादका कारण छनोट भई इजरायल प्रस्थानको चरणमा रहेका नेपाली सहयोगी कामदारहरूको भिसा जारी गर्ने कार्यमा सहजीकरण गरेपछि कामदार पठाउन प्रक्रिया सुरु भएको हो ।

कामदारले पुनः स्वास्थ्य परीक्षण, पीसीआर र कोरोना खोप लगाउनु पर्नेछ । इजरायल जाने श्रमिकले गर्नुपर्ने प्रक्रियाका लागि विभागले सूचना सार्वजनिक गरिएकाे जनाएकाे छ । गत वैशाखमा इजरायलको जनसंख्या तथा अध्यागनम विभाग (पिवा) का निर्देशक सिरिली, इजरायल स्वास्थ्य मन्त्रालयका निर्देशक तास्फीबीच रोकिएका नेपाली कामदारलाई प्रवेश गराउने सम्बन्धमा छलफल भएको थियो ।

पिवाले छनोट गरेका १ हजार १ सय ७५ मध्ये ८ सय २१ महिला र ३ सय ५४ पुरुषको अन्तिम नामावली प्रकाशित गरेको थियो । यसरी प्रकाशित गरेका नाममध्ये ९ सय ५९ को रोजगार सम्झौता भइसकेको र २ सय ९७ जना इजरायल प्रवेश गरिसकेको जनाइएको छ ।

इजरायल रोजगारीमा जाने नेपालीको करार अवधि ५ वर्षको हुनेछ । श्रमिकले हवाई भाडा, स्वास्थ्य बीमा, अभिमुखिकरण, पासपोर्ट, पीसीआरसहितको स्वास्थ्य परीक्षण, कल्याणकारी कोषमासहित ९० हजार रुपैयाँ ब्येहोर्नुपर्ने विभागले जनाएको छ ।

इजरायल जाने नेपालीले मासिक १ हजार ६ सय अमेरिकी डलर अर्थात् हालको विनिमयदर अनुसार १ लाख ९० हजार रुपैयाँभन्दा बढी पारिश्रमिक पाउने विभागले जनाएको छ ।

प्रकाशित मिति: बिहीबार, साउन ५, २०७९ १०:१३