तिलिचो तालमा विद्युत् पुर्‍याइँदै

A+ A A-

हिमाली जिल्ला मनाङको ३३ केभी स्यार्कु सवस्टेशनले तिलिचो तालमा विद्युत् पुर्‍याउने भएको छ । विश्वको सबैभन्दा अग्लो स्थानमा रहेको तिलिचो ताल बेस क्याम्प र थोराङ्ला हाई क्याम्पसम्म चालु आर्थिक वर्ष ०७९/८० मा केन्द्रीय लाइनको विद्युत् पुर्‍याइने भएको हो ।

गत वर्ष बाढीपहिरोले क्षति पुर्‍याएको राष्ट्रिय प्रसारण लाइनको मर्मत सकिएर चार्ज भएको नेपाल विद्युत् प्राधिकरण मनाङ वितरण केन्द्रका प्रमुख मिलन सुवेदीले जानकारी दिए । विद्युत् प्राधिकरणले तिलिचो तालसम्म विद्युत् पुर्‍याउने योजना पूरा गर्ने उनले बताए । उनका अनुसार हालै मात्र पोल, तारलगायत सबस्टेशनमा चार्ज भएपछि विद्युत् सेवा प्रवाह भएको छ ।

'क्षति पुगेको एक वर्षपछि मर्मत भएपछि नेपाल विद्युत् प्राधिकरणको ३३ केभी सबस्टेशनमार्फत सेवा प्रवाह गरिएको छ । अब मनाङवासीलाई विद्युत्‌को पहुँचमा पुर्‍याउन सफल हुनेछौँ,' सुवेदीले भने । गत वर्षको बाढीपहिरोले बिजुलीको पोल, तार पुरिनाका साथै बाढीले क्षति पुर्‍याएपछि जिल्लामा विद्युत् आपूर्ति अवरुद्ध भएको थियो ।

'नेपाल विद्युत् प्राधिकरणको ३३ केभी सबस्टेशनमा चार्ज भएको छ । अबदेखि निरन्तर विद्युत् सेवा प्रवाह हुन्छ,' उनले भने । लघु जलविद्युत्‌को भरमा रहेको हिमाली जिल्ला मनाङमा राष्ट्रिय प्रसारण लाइनबाट पहिलो पटक चामे सदरमुकामसम्म विद्युत् सेवा प्रवाह भएको थियो । जिल्लामा पहिलो पटक विसं २०७७ मा केन्द्रीय प्रसारण लाइन जोडिएको थियो ।

राष्ट्रिय प्रसारण लाइनसहित अन्य लघु जलविद्युत्‌मा समेत बाढीपहिरोले क्षति पुर्‍याउँदा मनाङ एक वर्षदेखि टुकीको भरमा छ । बाढीपहिरोले प्रसारण लाइनमा साढे ३ करोडको क्षति पुर्‍याएको थियो । २०७७ को फागुनमा पहिलो पटक नेपाल विद्युत् प्राधिकरणको ३३ केभीको राष्ट्रिय प्रसारण लाइन मनाङ विद्युत् सेवा प्रवाह भएको थियो । तर, केन्द्रको लाइन प्रसारण भएको पाँच महिनामा नै बाढीपहिरोले क्षति पुर्‍यायो ।

हिमाली जिल्ला मनाङ विकट भएकाले पनि मर्मत कार्यमा अलि बढी ढिलाइ भएको प्रमुख सुवेदीले जानकारी दिए । राष्ट्रिय प्रसारण लाइनको विद्युत् सेवा प्रवाह भएसँगै अब जिल्लामा सरकारी कार्यालयका साथै यस प्रसारण लाइनको विद्युत् सेवा जडान भएका क्षेत्रमा सहज रूपमा विद्युत् प्रवाह भएको छ । जिल्ला अस्पताल मनाङमा विद्युत् अभावका कारण विभिन्न उपकरण सञ्चालन हुन सकेका थिएनन् । विद्युत् प्रवाह हुन थालेपछि अस्पतालको सेवामा सहज हुने विश्वास लिइएको छ ।

प्रकाशित मिति: बुधबार, साउन ४, २०७९ १६:४२