जोरपाटी फलोअप : ‘डिप बोरिङबाट ग्यास निस्केको निस्क्यै छ हामी त हेरेको हेर्‍यै’

जोरपाटी फलोअप : ‘डिप बोरिङबाट ग्यास निस्केको निस्क्यै छ हामी त हेरेको हेर्‍यै’

A+ A A-

गोकर्णेश्वर नगरपालिका– ५ जोरपाटीस्थित सन्त लामाको घरमा डिप बोरिङ खन्दा ग्यास निस्किएको ७ घण्टा बढी भयो तर अझै नियन्त्रणमा आएको छैन ।

‘ग्यास आइरहेको छ । रोकिएको छैन,’ वडाध्यक्ष नारायण सुवेदीले भने, ‘घटनास्थल नजिकै छौँ । हामीले केही गर्न सक्दैनौँ, हेरेको हेर्‍यै छौँ । हामीले गर्न सक्ने स्थिति छैन ।’

सोमबार उक्त घरमा तीन सय फिटको डिप बोरिङ खनिएको थियो । तर, भोलिपल्ट मंगलबार बिहान मेसिन चलाउँदा ग्यास निस्किएको उनले बताए ।

‘हिजो बोरिङ खनिएको रहेछ । आज बिहान मेसिन चलाउँदा मेसिन नै उडाएर ग्यास, पानी र लेदोको फोहोरा आयो,’ उनले भने, ‘६० फिटमाथि ग्यास आइरहेको छ ।’

उनका अनुसार नियन्त्रणको लागि सेना, नेपाल प्रहरी र नगर प्रहरीको टोली खटिएको छ । अध्ययनको लागि भूगर्भ विभागको टोली पनि आएको वडाध्यक्ष सुवेदीले बताए ।

विभागको टोलीले मिथेन ग्यास निस्किएको बताएको छ । ‘विभागको टोलीले ग्यास आफैँ बन्द हुने बताएको छ । कहिले बन्द हुन्छ थाहा छैन । जोरपाटीको चोक हिलाम्मे भइसक्यो,’ उनले भने ।

जोरपाटीमा बोरिङ खन्दा निस्कियाे ग्यास, पानी र लेदोको फोहोरा

घरबाट ग्यास निस्किएपछि सन्त लामाको परिवारसहित टोल नै त्रसित भएका छन् । ‘घरबाट बाहिर निस्कन सकिएको छैन । तीव्र गतिमा ग्यास, पानी र लेदो निस्किएको छ,’ स्थानीय रमेश खतिवडाले भने, ‘उक्त क्षेत्रमा राखिएका सवारीसाधनसमेत निकाल्न सकिएको छैन ।’

नियन्त्रणको लागि के गर्ने भन्ने विषयमा नगरपालिकामा आकस्मिक बैठक बस्ने भएको छ । ‘नगरप्रमुखसहित प्रहरी र सरोकारवालाहरूको आकस्मिक बैठक बस्दैछ,’ सुवेदीले भने ।

प्रकाशित मिति: मंगलबार, साउन ३, २०७९ १७:५६