नेप्सेमा बन्यो लगातार छवटा हरियो मैनबत्ती चित्र, गत कात्तिकमा देखिँदा के भएको थियो शेयरबजार ?

नेप्सेमा बन्यो लगातार छवटा हरियो मैनबत्ती चित्र, गत कात्तिकमा देखिँदा के भएको थियो शेयरबजार ?

A+ A A-

छ दिनदेखि लगातार नेप्से बढिरहेको छ । झण्डै ९ महिना पुगेपछि नेप्सेले लगातार छवटा हरियो मैनबत्तीको चित्र बनाएको हो । बजार घटबढलाई मापन गर्ने एउटा बलियो माध्यमको रूपमा लिइँदै आएको मैनबत्ती चित्रले बजार निरन्तर उकालो लागेको देखाउन थालेको हो ।

अघिल्लो मंगलबारबाट बढ्न सुरु गरेको बजार त्यसपछिका ५ कारोबार दिन निरन्तर बढी नै रह्यो । फलस्वरूप यो ६ दिनमा नेप्सेले १ सय २ अंकको वृद्धि गर्न सफल बनेको छ ।

यो बढाइलाई लिएर यतिबेला शेयर लगानीकर्ताहरू बजारले फेरि बढ्ने लय समातेको आशा गरिरहेका छन् । विश्लेषकहरू आगामी मौद्रिक नीतिलाई लिएर लगानीकर्ता सकारात्मक बन्दा बजार बढ्न थालेको बताउँछन् । यद्यपि, बजारमा शेयर किनबेच गर्ने लगानीकर्ताको उपस्थिति आक्रमक रूपमा नबढे पनि नेप्से सूचक भने निरन्तर बढ्न थालेको छ ।

झण्डै एक वर्षसम्म यस्तो मैनबत्ती नबनेको नेप्सेमा ९ महिनापछि पुनः छवटा हरियो मैनबत्ती देखा परेको हो । नेपाल स्टक एक्स्चेन्ज (नेप्से) का अनुसार गत कात्तिकमा यस्तो बढोत्तरी देखिएको थियो । ७ कात्तिकदेखि १४ कात्तिकसम्म नेप्से निरन्तर बढेको तथ्यांक छ । यो ६ कारोबारको दिनमा निरन्तर हरियो लामो र छोटो दुवै खालका मैनबत्ती बनेयता बजारमा लगानीकर्ताले यस्तो चित्र अनुभव गर्न पाएका थिएनन् ।

९ महिनापछि देखा परेका छवटा हरियो रंगको मैनबत्तीले अघिल्लो वर्षकै बजार यात्रालाई दर्शाऊला भन्ने संशय पनि पैदा भएको देखिन्छ । अघिल्लो वर्ष छ दिन निरन्तर बढेको बजारमा त्यसपछि भने पाँच दिन निरन्तर नेप्से घटेको देखिन्छ ।

अर्थात् १४ कात्तिकसम्म बढेर २८३७ अंकमा पुगेको नेप्से चार दिन निरन्तर घटेर २६७० को न्यूनतम विन्दु छुँदै २६९४ मा बन्द भएको थियो । निरन्तर बढेको बजारबाट छोटो अवधिको नाफा निकाल्नकै लागि शेयर बेच्ने लगानीकर्ता हाबी हुँदा ६ दिनभन्दा धेरै बजार बढ्न सकेको देखिँदैन ।

अर्थात् ६ दिनमा बढ्न ब्रेक लागेको बजारले फेरि चार कारोबार दिन घटेर ३० कात्तिकबाट तीन दिन उकालो यात्रा तय गरेको देखिन्छ । त्यसपछि भने नेप्सले लामै करेक्सन गरेको थियो ।

तर, अहिलेको अवस्था केही फरक देखिएको छ । गत कात्तिकमा एकैदिन धेरै अंकले बजार बढ्दा लामा लामा हरियो मैनबत्ती चित्र देखिएको थियो । ह्वात्तै बढेको जस्तो देखिए पनि यस वर्षको बढाइमा भने संयमता देखिन्छ । अर्थात् गत मंगलबारबाट बढेको बजारमा एक दिन लामो र बाँकी पाँच दिन छोटा हरियो मैनबत्ती चित्र देखिएको छ । यसले लगानीकर्ता संयम बन्दै बजारमा प्रवेश गरिरहेको देखाउँछ भने बजारले स्थिरता खोज्दै अगाडि बढेको देखिन्छ ।

गत आर्थिक वर्षमा कर्जा प्रवाहलाई कडाइ गर्ने उद्देश्यसहित राष्ट्र बैंकले शेयर धितोकर्जालाई ४-१२ को सीमामा बाँधेपछि लगानीकर्ताको मनोविज्ञान शेयरबजारलाई लिएर कमजोर बन्दै गएको थियो । त्यसपछि निरन्तर नियामक निकायबाट चालिएका कदमहरूले पनि बजारलाई थप कमजोर बनाउँदा एक वर्षमा नै लगानीकर्ताले १० खर्ब रूपैयाँ गुमाउन पुगेका थिए, भने नेप्सेले ११ सय अंकको ओरालो यात्रा गरेको थियो ।

यसरी शेयर कर्जामा कडाई गरेपछि राष्ट्र बैंकका गभर्नर महाप्रसाद अधिकारीप्रति रुष्ट बनेका लगानीकर्ता पछिल्लो एम प्रकरणपछि अधिकारीको पदमाथि प्रश्न उठेपछि हौसिएको जस्तो देखिन्छ । यसका साथै सडकदेखि सदनसम्मै बजारमैत्री मौद्रिक नीति आउनुपर्ने दबाब चुलिन थालेपछि शेयरबजारमा लगानीकर्ताको मनोविज्ञान थप बलियो हुन थालेको देखिन्छ ।

लगानीकर्ता रिसव पुडासैनी भन्छन्, ‘शेयरबजारमैत्री मौद्रिक नीति ल्याउनका लागि सडकदेखि संसद्स‌म्मै दबाब सिर्जना भइरहेको छ । अझ यसैबीचमा गभर्नर प्रकरणले लगानीकर्ताले नीतिगत फेरबदल सम्भव हुने आशा पलाएको देखिन्छ ।’

राष्ट्र बैंकले मौद्रिक नीति यही साता ल्याउने तयारी गरिरहेको अवस्थामा शेयरबजारमा निरन्तर हरियाली छाइरहेको छ । लगानीकर्ता मौद्रिक नीतिले शेयरबजारलाई सहज हुने गरी नीतिगत व्यवस्था गर्ने र ४-१२ को समस्या पनि व्यवस्थापन हुने आशाले लगानीकर्ताको मनोविज्ञान थप बलियो बन्दै गएको देखिन्छ ।

प्रकाशित मिति: मंगलबार, साउन ३, २०७९ १५:१३