आर्थिक वर्षलाई हरियो बनेर बिदा गर्‍यो शेयरबजारले, हरियै बनेर स्वागत गर्ला अब ?

आर्थिक वर्षलाई हरियो बनेर बिदा गर्‍यो शेयरबजारले, हरियै बनेर स्वागत गर्ला अब ?

A+ A A-

वर्षभरि नै राताम्मे बनेको शेयरबजार वर्षको अन्तिम दिन भने हरियो बनेको छ । चालु आर्थिक वर्ष २०७८\७९ को अन्तिम कारोबार हरियो बन्दै बन्द भएको बजारले लगानीकर्तालाई आउने वर्ष थप उत्साहित बनाउने देखिन्छ ।

वर्षभरि नै शेयरबजारविरोधी नीति तथा बजारविपरीतका अभिव्यक्तिहरूले राताम्मे बन्न थप टेवा पाउँदा एक वर्षमै नेप्से २९८३ अंकबाट यस वर्षको कारोबार सुरु गरेको नेप्सेले भदौमा अलटाइम हाई रेकर्ड ब्रेक गर्दै ३२ सयको नयाँ विन्दु कायम राखेको थियो । यद्यपि त्यसपछि निरन्तर घटेको नेप्सेले यो वर्षभरि शेयरबजारलाई राताम्मे नै बनाइरह्यो ।

समग्रमा यो वर्ष १२ सय अंक तल ओर्लिएको छ । अहिले शेयरबजार २००० अंकमा छ । जबकि नेप्सेले यसै वर्ष अघिल्लो वर्षको बुल रेकर्डलाई पनि तोडदै १८ सय अंकको यात्रा गरिसकेको छ ।

यद्यपि गभर्नरविरोधी बन्दै आएका लगानीकर्ता गभर्नर पदबाट निस्कन सक्ने आकलनसहित हौसिन पुुगेका छन् । जसले बजारमा केही उत्साह छाएको देखिन्छ । यस्तै, यो साताको नेप्से कारोबार पाँच दिन मात्रै खुलेको छ । कारोबारको पहिलो दिन आइतबार बकर इदका कारण सार्वजनिक बिदा भएको थियो ।

सोमबार

कारोबारको पहिलो दिन सोमबार शेयरबजार ७७.०१ अंकले घटेर १९१५.६१ बिन्दुमा झर्‍यो ।

यस दिन १३ वटै समूहका सूचक राताम्मे देखिए । सोमबार कारोबारमा आएका २२७ वटा कम्पनीको ४५ हजारपटकको शेयर कारोबारमा २ अर्ब ३२ करोड ५६ लाख ४१ हजार रुपैयाँबराबरको ६३ लाख १३ हजार कित्ता शेयर कारोबार भयो ।

आइतबार ८.५ प्रतिशत सानिमा डिभेन्चरका लगानीकर्ताले कमाए भने ग्रामीण विकास लघुवित्तको शेयरमूल्यमा नकारात्मक सर्किट लाग्यो । सोमबार सर्वाधिक शेयर कारोबार हिमालयन डिस्टिलरीको भयो ।

मंगलबार

साताको कारोबारको दोस्रो दिन मंंगलबार नेप्से ११.६८ अंकले १९२७.२८ बिन्दुमा उक्लिएको थियो । अघिल्लो कारोबारका दिन सोमबार ७७ अंकले घटेको नेप्से यस दिन ११ अंकले बढ्यो । मंगलबार बजार हरियो देखिँदा १३ वटै समूहका सूचक बढेका छन् ।

यस दिन कारोबारमा आएका २२६ वटा कम्पनीको ३० पटकको कारोबारमा १ अर्ब ७० करोड ७७ लाख ५२ हजार रुपैयाँबराबरको ४९ लाख ६७ हजार कित्ता शेयर कारोबार भएको छ ।

मंगलबार सर्वाधिक कमाउनेमा सप्तकोसी डेभलपमेन्ट बैंकका लगानीकर्ता थिए भने सर्वाधिक गुमाउनेमा नयाँ सारथि लघुवित्तका लगानीकर्ता रहे । यस्तै, सर्वाधिक शेयर कारोबार अरुण काबेली पावरको भयो ।

बुधबार

कारोबारको तेस्रो दिन बुधबार नेप्से परिसूचक ५९.५४ अंकले बढेर १९८६.८२ बिन्दुमा उक्लिएको थियो । बुधबार कारोबारमा आएका २२५ कम्पनीका ५७ लाख ८७ हजार १२६ कित्ता शेयर २ अर्ब ४ करोड ४४ लाख ४३ हजार ७ रुपैयाँमा कारोबार भयो । बुधबार नेप्सेका १३ वटै समूहरूको सूचकमा हरियाली छायो ।

बुधबार नेपाल फाइनान्स र रिलायन्स फाइनान्सका लगानीकर्ताले सर्वाधिक कमाएका थिए । बुधबार यी कम्पनीको शेयर मूल्यमा सकारात्मक सर्किट लागेको थियो ।

बिहीबार

मंगलबारदेखि बढ्न थालेको नेप्से कारोबारको चौथो दिन बिहीबार पनि बढ्यो । बिहीबार नेप्से परिसूचक १४.७१ अंकले बढेर २००१.५३ बिन्दुमा पुग्यो ।

बिहीबार कारोबारमा आएका २२० कम्पनीको ६२ लाख १० हजार कित्ता शेयर २ अर्ब ४१ करोड १८ लाख ३४ हजार रुपैयाँमा किनबेच भए । बुधबारको तुलनामा नेप्सेसँगै कारोबार रकम पनि बिहीबार बढ्यो ।

यस दिन १३ वटै समूहका सूचक बढेका थिए । साथै, एनआईबीएल प्रगति फण्डका लगानीकर्ताले सर्वाधिक कमाए भने प्रुडेन्सियल इन्स्योरेन्सका लतानीकर्ताले सर्वाधिक गुमाए । यस दिन सर्वाधिक शेयर कारोबार एनआईसी एशिया बैंकको भयो ।

शुक्रबार

कारोबारको पाँचौँ दिन शुक्रबार पनि बजार बढ्ने क्रमले निरन्तरता पायो । शुक्रबार बजार ७.९३ अंकले बढेर २००९.४६ बिन्दुमा पुगेर बन्द भयो ।

यस दिन कारोबारमा आएका २३१ वटा कम्पनीको २१ हजारपटकको कारोबारमा १ अर्ब ४५ करोड ६२ लाख ५९ हजार रुपैयाँबराबरको ४० लाख ५१ हजार कित्ता शेयर खरिदबिक्री भयो । यस दिन बजार बढे पनि अघिल्लो कारोबार दिनको तुलनामा कारोबार रकम घटेको छ ।

यस दिन १०.५ प्रतिशत नेपाल इन्भेस्टमेन्ट डिभेन्चर र १०.२५ प्रतिशत माच्छापुच्छ्रे बैंकका लगानीकर्ताले सर्वाधिक कमाए । यी कम्पनीको शेयरमूल्यमा सकारात्मक सर्किट लागेको छ । यो हप्ता कारोबारका चार दिन नेप्से बढेर हरियो बनेको छ भने १ दिन घटेर राताम्मे बनेको छ ।

प्रकाशित मिति: शुक्रबार, असार ३१, २०७९ १७:०६