एम प्रकरणमा मुछिएका गभर्नर बर्खास्तीमा पर्न सक्ने यी हुन् दुई आधार

A+ A A-

नेपाल राष्ट्र बैंकका गभर्नर महाप्रसाद अधिकारी 'एम' अधिकारीको नाममा एमाले पार्टीको आर्थिक मामिला तथा योजना विभागमा बसेको आरोप लागेपछि उनी बर्खास्त हुन सक्ने चर्चा छ । यस विषयमा गभर्नर अधिकारीले आफू कुनै पार्टीको हुन नसक्ने स्पष्टोक्ति दिए पनि त्यो एम आफू भए वा नभएको विषयमा भने प्रस्ट पार्न सकेका छैनन् ।

यता एमालेकाे अर्थ तथा याेजना विभाग प्रमुख घनश्‍याम भुसालले सामाजिक सञ्जालमा लेखेको विषयबाट एम अधिकारी भन्ने व्यक्ति गभर्नर अधिकारी नै रहेकाे कुरामा थप शंका गर्ने आधार दिन्छ । विभाग प्रमुख भुसालले उनी भए वा नभएको विषयमा स्पष्ट आधार खुलाउन पर्नेमा गभर्नर स्वयम्‌ले स्पष्ट पारेको बताएका छन् भने अर्कोतर्फ सार्वजनिक पदधारण गरेको व्यक्ति सदस्य हुन नसक्‍ने बताएका छन् ।

उनले एम अधिकारी महाप्रसाद हुन् वा होइनन् भन्ने विषयमा भने खुलाएका छैनन् । यता कानुनले भने पार्टीको सदस्य वा पदाधिकारी गभर्नर हुन सक्ने कल्पना गरेको छैन । गभर्नर पदमा जान अयोग्य हुने सूची र पछि बर्खास्त गर्न सक्‍ने आधारमा राजनीतिक दलकाे सदस्य वा पदाधिकारीलाई लिएको छ ।नेपाल राष्ट्र बैंक ऐनको दफा २१ मा यसलाई स्पष्ट गरिएको छ ।

यहाँ दुईवटा विषय रहेका छन् । गभर्नरले आफू कुनै पार्टीको सदस्य हुन नसक्ने उल्लेख गरेका छन् । तर, उनले उल्लेख गरिएको एम अधिकारी आफू भए नभएको प्रमाण दिन सकेका छैनन् भने पार्टीले पनि सार्वजनिक पदधारण गरेको व्यक्ति सदस्य हुन नसक्ने उल्लेख गरेको छ । तर, गभर्नर एम अधिकारी भएको वा नभएको विषयमा आरोप लागेको ४८ घण्टासम्म पनि जवाफ दिन सकेको छैन ।

यस हिसाबले महाप्रसाद अधिकारी नै एम अधिकारी देखिएमा कानुनत: गभर्नरको पद जानेछ । उनी गभर्नर बन्न अयोग्यको सूचीमा परेर बर्खास्तमा पर्ने देखिन्छ । 'अहिले उठेका विषयमा उहाँको योग्यता नै नपुगेको हुन सक्ने देखिएको छ, यसो भए पद बर्खास्तीमा पर्छ', अधिवक्ता ओमप्रकाश अर्यालले भने ।

मन्त्रिपरिषद्ले छानबिन समिति गठन गरेमा वा कुनै व्यक्तिले रिट दायर गरेमा गभर्नर बर्खास्तीमा पर्न सक्ने उनले बताए । यसअघि सरकारले अन्य कारण देखाएर उनीमाथि छानबिन समिति गठन गरेको थियो । त्यससँगै निलम्बनमा परेका अधिकारी सर्वोच्चको आदेशले पुन: काममा फर्किएका थिए ।

प्रकाशित मिति: बिहीबार, असार ३०, २०७९ १२:०९