कोभिडको समयमा दाताले ५९ अर्बको सहयोग गरे, हिसाब ५० अर्बको मात्रै (सूचीसहित)

A+ A A-

कोभिड उपचार तथा नियन्त्रणका लागि नेपाल सरकारलाई विभिन्न दातृ निकायहरूले ५८ अर्ब रुपैयाँभन्दा बढीको सामान तथा रकम दिएको पाइएको छ ।

महालेखा परीक्षकको कार्यालयले कोभिड १९ सम्बन्धी गरेको विशेष लेखा परीक्षण प्रतिवेदन सार्वजनिक गर्दै ५८ अर्ब रुपैयाँभन्दा बढीको सामान तथा रकम सरकारले प्राप्त गरेको उल्लेख गरेको छ । तर, नेपाल सरकारले आफ्नो हिसाबमा भने ८ अर्ब रुपैयाँको विवरण खुलाएको छैन ।

महालेखा नियन्त्रक कार्यालयबाट प्राप्त विवरणअनुसार संघीय सरकारले छुट्टै बजेट उपशीर्षकमा १४ अर्ब ५ करोड ५७ लाख विनियोजन गरी १० अर्ब ७१ करोड ३४ लाख खर्च गरेको छ ।

यसका अतिरिक्त सरकारले कोराना भाइरस संक्रमण रोकथाम नियन्त्रण तथा उपचार कोष स्थापना गरेकोमा उक्त कोषबाट यो वर्ष १ अर्ब ४८ करोड ८८ लाख निकासा गरेको खुलाइएको छ ।

त्यसैगरी, प्रदेश सरकारवाट २ अर्ब ११ करोड ६७ लाख तथा स्थानीय तहबाट ४ अर्ब ७५ करोड ८९ लाख गरी यो वर्ष कोभिड- १९ व्यवस्थापनका लागि १९ अर्ब ७ करोड ७९ लाख खर्च भएको देखिन्छ ।

बजेटको वार्षिक प्रगति मूल्याङ्कन प्रतिवेदनमा सरकारले कोभिड-१९ सँग जुध्न अन्तर्राष्ट्रिय गैरसरकारी संस्थाहरूसँग समन्वय गरी २०७७/७८ मा थप १३.७९ मिलियन अमेरिकी डलर परिचालन गरेको र सोही अवधिमा विभिन्न दातृ निकाय तथा संस्थाबाट स्वास्थ्य सामग्री र औजार उपकरणलगायतमा ५१ अर्बबराबरको सहयोग प्राप्त भएको उल्लेख छ ।

तर, वैदेशिक सहायताको यथार्थ हिसाब राखेर एकीकृत वित्तीय विवरण तयार गरेको छैन । वैदेशिक सहायता व्यवस्थापन प्रणालीअनुसार विभिन्न मित्रराष्ट्र तथा दातृ निकायहरूले वैदेशिक सहायताको सम्झौता भई प्रतिबद्धता जनाएको रकममध्ये कोभिडको उपचार रोकथाम र नियन्त्रणका लागि अमेरिकी डलर ५० करोड ३ लाख १२ लाख ०७८ (असार मसान्तको सटही दरअनुसार ५८ अर्ब ८९ करोड नेपाली) सहायता प्राप्त भएको उल्लेख छ ।

तर सरकारले वैदेशिक सहायताको यथार्थ हिसाब राखेर एकीकृत वित्तीय विवरण तयार गरी लेखापरीक्षणको लागि पेसगरेको छैन ।