चार वर्षमा पूरा गर्ने भनिएकाे नागढुङ्गा सुरुङमार्ग साढे दुई वर्षमा आधा पनि सकिएन

चार वर्षमा पूरा गर्ने भनिएकाे नागढुङ्गा सुरुङमार्ग साढे दुई वर्षमा आधा पनि सकिएन

A+ A A-

२ कात्तिक २०७६ मा नागढुङ्गादेखि धादिङको सिस्ने खोलासम्म जोड्ने सुरुङमार्गको शिलान्यास गर्दै तत्कालीन प्रधानमन्त्री केपी शर्मा ओलीले नेपाल सुरुङमार्ग युगमा प्रवेश गरेको घोषणा गरे । ओलीको यो घोषणाको झण्डै ३ वर्ष पुग्न लाग्दा सुरुङमार्गको सम्पूर्ण संरचनासहित समग्र भौतिक प्रगति भने ३९ प्रतिशत मात्र छ ।

काेभिड महामारी र लकडाउनको कारण देखाउँदै ठेकेदार कम्पनी हाज्मा एन्डो कर्पोरेसनले थपेको ८६ दिन (झण्डै ३ महिना) को हिसाब गर्ने हो भने पनि सुरुङमार्ग सम्पन्न गर्न निर्माण कम्पनीसँग अब १ वर्ष मात्र समय बाँकी छ ।

२०८० साउनसम्ममा सुरुङमार्गको सम्पूर्ण कार्य सम्पन्न हुने नागढुङ्गा सुरुङमार्ग निर्माण आयोजना प्रमुख नरेशमान शाक्यको दाबी छ । ३२ महिनामा ३९ प्रतिशत मात्र काम सम्पन्न भएको यस आयोजना अबको १२ महिनामा कसरी सकिएला त ? शाक्य जवाफमा कुनै व्यवधान नभए १२ महिनामा काम भ्याउन कठिन नहुने दाबी गर्छन् । ‘अहिले हामीले गरेको काम धेरै समय लाग्ने तर भ्यालु कम भएको काम हो । अब गर्ने काम त्यस्तो छैन । केही समयमै सामान आएपछि फेरि २० प्रतिशत कार्य प्रगति थपिन्छ,’ उनले भने ।

काम छिटो गराउन हाल दुई सिफ्टमा काम भइरहेको उनले जानकारी दिए । ‘हामीले २ सिफ्टमा २४ सै घण्टा काम गरिरहेका छौँ । १ वर्षमा त आरामसँग काम सकिन्छ,’ उनले शिलापत्रसँग भने ।

२०७६ असोजमा हाज्मा एन्डो कर्पोरेसनसँग ४२ महिनामा निर्माण पूरा गर्नेगरी सम्झौता भएको उक्त आयोजनाको म्याद लकडाउनका कारण ८६ दिन थप गरिएको छ । निर्माण कम्पनीले ४१६ दिन म्याद थप प्रस्ताव गरे पनि कार्यालयले लकडाउन अवधिमा काम हुन नसकेको दिन हिसाब गरेर म्याद थपेको हो ।

आयोजनअन्तर्गत सुरुङ खन्ने काम भने ५६ प्रतिशत पूरा भइसकेको छ । २ हजार ६ सय ८८ मिटर लम्बाइ रहेको मुख्य सुरुङकाे १ हजार ३ सय ७७ मिटर खनिसकिएको छ भने २ हजार ५ सय ५७ मिटरको सहायक सुरुङ ८ सय ७६ मिटर खनिएको छ ।

मुख्य सुरुङ पूर्वबाट ७ सय १८ मिटर र पश्चिमबाट ६ सय ५९ मिटर निर्माण सम्पन्न भइसकेको छ । त्यस्तै, सहायक सुरुङ पूर्वबाट ८ सय ७६ मिटर र पश्चिमबाट ६ सय ३१ मिटर निर्माण सम्पन्न भएको आयोजनाले जनाएको छ ।

१ सय २८ मिटर खन्नुपर्ने क्रस प्यासेज पूर्वतर्फबाट ३२ र पश्चिमतर्फ ३० गरी ६२ मिटर खनिएको छ । आयोजनाका अनुसार, १ सय २६ मिटर वर्किङ अडिटको काम सम्पन्न भइसकेको छ । सुरुङमा कंक्रिट लाइनिङको कार्य १८ प्रतिशत सम्पन्न भइसकेको छ ।

सरुङबाहेकका तीनवटा अण्डर पासमध्ये दुईवटा सम्पन्न भएको छ भने चारवटा बक्स कल्भर्ट, एउटा ओभर पास र तीनवटा पुल निर्माण कार्य सम्पन्न भएको छ । त्यसैगरी एउटा फ्लाई ओभर निर्माणाधीन छ । सुरुङमार्गका सम्पूर्ण संरचनासहित समग्र भौतिक प्रगति भने ३९ प्रतिशत मात्र रहेकाे आयोजनाले जनाएको छ ।

त्यसैगरी, मुआब्जाको काम ८५ प्रतिशत सकिएकाे छ भने बाँकी १ महिनाभित्र सम्पन्न हुने शाक्यले जानकारी दिए । आयोजनामा दैनिक करिब ५ सय ४० जनाले काम गरिरहेका छन् । दैनिक करिब १० देखि १२ मिटर सुरुङ खन्ने काम भइरहेको उनले बताए ।

कुल २२ अर्ब लागतको यो सुरुङमार्ग निर्माणका लागि जापानी अन्तर्राष्ट्रिय सहयोग नियोग (जाइका)ले १६ अर्ब ऋण सहयोग गरेको छ भने ६ अर्ब नेपाल सरकारकाे आफ्नै स्राेतबाट खर्च हुनेछ । सुरुङमार्ग सञ्चालनमा आएपछि काठमाडौं प्रवेश गर्ने मुख्य द्वारमा यात्रुले भोग्नुपरेको ट्राफिक जामको सास्ती कम हुने विश्वास गरिएको छ ।

प्रकाशित मिति: बुधबार, असार २९, २०७९ १७:३३