सात ठूला रोजगारदाता कार्यवातावरण व्यवस्थापनमा छनोट

A+ A A-

नेपालका सातवटा ठूला रोजगारदाता आफ्ना श्रमिकका लागि अन्तर्राष्ट्रियस्तरको व्यवसायजन्य सुरक्षा र स्वास्थ्यसम्बन्धी कार्यवातावरण व्यवस्थापनभित्र परेका छन् ।

सरकारले यस वर्ष अन्तर्राष्ट्रिय श्रम संगठन (आईएलओ) ले घोषणा गरेको व्यवसायजन्य सुरक्षा र स्वास्थ्यसम्बन्धी महासन्धिअनुसारको कार्यवातावरण व्यवस्था गर्ने औद्योगिक प्रतिष्ठान (रोजगारदाता) घोषणा गरेको छ ।

अन्तर्राष्ट्रियस्तरको कार्यवातावरण बनाउनेमा प्रदेश १ बाट रिलायन्स स्पिनिङ मिल्स, मधेस प्रदेशबाट सूर्य नेपाल, बागमती प्रदेशबाट बोटलर्स नेपाल, गण्डकी प्रदेशबाट गोर्खा ब्रुअरी, लुम्बिनी प्रदेशबाट सीजी फुड्स, कर्णाली प्रदेशबाट मध्यपश्चिम वाटर एन्ड बेभरेज र सुदूरपश्चिम प्रदेशबाट सुदूर फुड प्रालि रहेको श्रम तथा व्यवसायजन्य सुरक्षा विभागले जनाएको छ ।

आईएलओले घोषणा गरेको व्यवसायजन्य सुरक्षा र स्वास्थ्यसम्बन्धी महासन्धिअनुसार प्रत्येक प्रदेशबाट एक–एक औद्योगिक प्रतिष्ठान छनोट भएको विभागका महानिर्देशक उमाकान्त आचार्यले बताए ।

विभागले केमिकल, मेकानिकल, वायु प्रदूषण तथा कडा एवं खतरनाक कार्यक्षेत्रका आधारमा वर्गीकरण गरेर सुरक्षा र स्वास्थ्य मापदण्डको परीक्षण गर्छ । सोही आधारमा कामदारको सुरक्षा र स्वास्थ्य व्यवस्थापन परीक्षण गर्दै आएको उनले जानकारी दिए ।

हालै आईएलओले व्यवसायजन्य सुरक्षा र स्वास्थ्यसम्बन्धी महासन्धिलाई नयाँ अन्तर्राष्ट्रिय श्रम मापदण्डका रूपमा घोषणासमेत गरेको थियो । सोहीअनुसार सरकारले ‘सेप्टी फर्स्ट, प्रोडक्सन मस्ट’ अवधारणलाई आधार मानेर सबै प्रतिष्ठानमा अन्तर्राष्ट्रियस्तरको सुरक्षा तथा स्वास्थ्य व्यवस्थापन कार्यक्रम गर्दै आएको छ ।

गत वर्ष नेपालमा औद्योगिक दुर्घटनाका कारण २९ श्रमिकको मृत्यु भएको थियो । भने, चालु आर्थिक वर्षको जेठसम्म २५ श्रमिकको मृत्यु भइसकेको विभागको तथ्यांक छ ।

प्रकाशित मिति: मंगलबार, असार २८, २०७९ १५:२०