गण्डकीका मुख्यमन्त्रीको गुनासो- मेरो बुबाको योगदानलाई अहिलेको पुस्ताले चिनेन

गण्डकीका मुख्यमन्त्रीको गुनासो- मेरो बुबाको योगदानलाई अहिलेको पुस्ताले चिनेन

A+ A A-

गण्डकी प्रदेशका मुख्यमन्त्री कृष्णचन्द्र नेपाली पोखरेलले बुवा गोवर्द्धन शर्माको योगदान नबुझेकाले मेमोरियल ट्रष्टलाई बजेट छुट्याउँदा विरोध भइरहेको टिप्पणी गरेका छन् ।

बुवा गोवर्द्धन शर्माको नामको कोषलाई बजेट छुट्याएपछि मुख्यमन्त्री पोखरेलको आलोचना भइरहेको छ । मंगलबार प्रदेशसभाको विशेष समय मागेर बोल्दै मुख्यमन्त्री पोखरेलले गोवर्द्धन शर्मा आफ्नो पितामात्रै नभइ प्रजातन्त्रको लागि लडेको व्यक्ति भएकाले प्रदेशकै सम्मानको रूपमा लिनुपर्ने बताए ।

‘पञ्चायतको विरोध गर्दा पटकौँपटक हिरासत र जेल वरण गर्नुभयो । त्यो व्यक्तिलाई अहिलेको पुस्ताले चिनेन । तर, अघिल्लो पुस्ताले त्यो व्यक्तिको नाम लिँदै गर्दा मलाई लाग्छ प्रदेशकै सम्मानको रूपमा लिनुपर्ने व्यक्तित्व हो,’ उनले भने ।

राजनीतिक दल नहेरी देशका लागि शहीद भएकालाई सम्मान गर्नुपर्ने उनले बताए । आफ्नो बुवा र परिवारले गरेको योगदानको चर्चा हुन नसकेकोमा उनले दुःख प्रकट गरे ।

‘मेमोरियल ट्रष्ट १५ वर्षदेखि छ । नेपाल सरकार, अन्य विभिन्न संस्थाबाट सहयोग ल्याएर अर्गानिक खेती, कृषिका रिसर्च सेन्टरको काम गरिरहेको छ । त्यो संस्थालाई प्रदेश सरकारले रकम विनियोजित गर्‍यो,’ मुख्यमन्त्री पोखरेलले थपे, ‘गरिब मुख्यमन्त्रीलाई एक रुपैयाँ राख् भनेर राजनीति भजाउने कुरा हो । व्यक्तिमात्रै होइन परिवारले पनि धेरै गरेको छ । त्यो कुरा हुन सकेन ।’

एमालेनिकट अनेरास्ववियु र युवा संघले मुख्यमन्त्री र मन्त्रीको कोषलाई भनेर ‘एक रुपैयाँ’ संकलन अभियान चलाइरहेको छ । त्यसमा मुख्यमन्त्री पोखरेलले आपत्ति जनाए ।

गरिब मुख्यमन्त्रीलाई एक रुपैयाँ भनेर राजनीति भजाउने कुरा भएको उनले टिप्पणी गरे । इतिहास बनाउन आफूलाई समर्पित गर्ने व्यक्तिले सम्मान हुने हक राख्ने उनले बताए ।

विगतका सरकारले पनि प्रतिष्ठान, कोषलाई बजेट विनियोजन गरेको र योगदान गरेकालाई सम्मान गर्नु स्वाभाविक भएको बताए । नागरिक समाज, सामाजिक सञ्जाल प्रयोगकर्ताको आवाजको सम्मान गर्दै विवादमा आएका कार्यक्रम हटाउन मुख्यमन्त्री पोखरेलले अर्थ मन्त्रालयलाई निर्देशन दिइसकेका छन् । मुख्यमन्त्री पोखरेलले यो विषय मंगलबारको संसद बैठकमा जानकारी गराएका छन् ।

गोवर्द्धन शर्मा स्मृति कोष, श्री पुननारायण धनकुमारी श्रेष्ठ परोपकारी ट्रष्ट भवन निर्माण, पुननारायण धनकुमारी श्रेष्ठ परोपकारी ट्रष्ट, डिल्लीराम लामिछाने स्मृति प्रतिष्ठान भवन निर्माण, अमृत जोशी स्मृति पार्कलगायत शीर्षकमा १ करोड ९० लाख रुपैयाँ गण्डकी प्रदेश सरकारले आर्थिक वर्ष २०७९/८० को वार्षिक कार्यक्रममा समावेश गरेका छ । यी कोष मुख्यमन्त्री, मन्त्री र कांग्रेस नेताको परिवारसम्बद्ध हुन् ।

मुख्यमन्त्री पोखरेलले ५० लाख रुपैयाँ र शिक्षा, संस्कृति, विज्ञान प्रविधि तथा सामाजिक विकास मन्त्री मेखलाल श्रेष्ठले एक करोड रुपैयाँ गरेर डेढ करोड रुपैयाँ सरकारी ढुकुटीबाट बुवाआमाको नामको कोषमा छुट्याएपछि चौतर्फी आलोचना भइरहेको छ ।

प्रकाशित मिति: मंगलबार, असार २८, २०७९ १४:३०