सर्‍यो जगातीको यातायात कार्यालय, प्रमुखमाथि घुस मागेको आरोप

A+ A A-

शनिबार यातायात व्यवस्था कार्यालय, सवारीचालक अनुमतिपत्र, जगातीले अचानक सामान सार्न थाल्यो । आफ्नो घरमा बसेको कार्यालयले किन सामान सारेको भन्ने घरबेटीको प्रश्नमा त्यहाँ आएका कर्मचारीले कार्यालय त्यहाँबाट राधेराधेमा सर्न लागेको जवाफ पाए ।

पाँच वर्षदेखि बसेको कार्यालय बिनाजानकारी सरेको भन्ने थाहा पाउँदा उनी अचम्मित नहुने कुरै भएन । ‘मलाई त अझैसम्म पनि औपचारिक जानकारी आएको छैन । राधेराधे सर्न लागेको रे,’ उनले भने ।

हाल यातायात कार्यालय बसिरहेको घरको सम्झौता यही असार मसान्तमा सकिँदैछ । नियमअनुसार सम्झौता सकिएपछि सार्वजनिक सूचना निकाली बोलपत्र आह्वान गर्नुपर्ने हुन्छ । तर, उक्त यातायात कार्यालयले सूचना नै ननिकाली कार्यालय सारेको आरोप यातायात लेखापढी व्यवसायी समूहले आरोप लगाएको छ ।

त्यस्तै, कार्यालय प्रमुख नेत्र भट्टराईले लेखापढी व्यवसायीहरूसँग जनही ५० हजार रुपैयाँ माग्न पठाएको र त्यो रकम दिन नमानेपछि कार्यालय सारेको उनीहरूको आरोप छ । त्यसैगरी, स्वास्थ्य परीक्षणमा समेत अनियमितता गरेर गोप्य रूपमा टेण्डर खुलाएर आफूले चाहेको मान्छेलाई पारेको उनीहरूले आरोप लगाएका छन् ।

प्रमुख भट्टराईले भने व्यवसायीहरूको आरोपलाई खण्डन गरेका छन् । पाँच वर्षको सम्झैता अवधि सकिएपछि सार्वजनिक खरिद नियमावलीले तोकेको प्रक्रियाअनुरुप घर ठेक्कामा लिइएको उनले दाबी गरे ।

अहिलेको घरको सम्झौता पनि सकिएको र पार्किङ, शौचालय, धेरै ठाउँमा लाइन लाग्नुपर्ने बाध्यता हटाउन ७ दिनको सूचना निकालेर कार्यालय सरेको उनले बताए ।

‘हामीले नियमअनुसार जिल्ला प्रशासन कार्यालय, समन्वय समितिको कार्यालयमा, कोष लेखा नियन्त्रकको कार्यालयमा सूचना टास गरेर भाडाको प्रस्ताव माग गरेका थियौँ । सीडीओको अध्यक्षतामा बनेको भाडा निर्धारण समितिको स्वीकृतिपछि नयाँ घर भाडामा लिएका हौँ,’ उनले भने, ‘पहिलेको घरमा २ लाख ५४ हजार ३ सय भाडा तिरिरहेकोमा अहिले विभिन्न सुविधासहित २ लाख २५ हजारमा सम्झौता भएको छ ।’

त्यस्तै, स्वास्थ्य जाँचमा पनि कार्यालयले निस्पक्ष रूपमा टेण्डर आह्वान गरेको भट्टराईको दाबी छ । ‘स्वास्थ्य जाँचका लागि पाँच वर्षअघि सम्झौता भएको र सम्झौता अवधि सकिइसकेको थियो । महालेखा परीक्षककै आदेशमा हामीले असार १ गतेको हिमालय टाइम्समा सार्वजनिक सूचना निकालेर टेण्डर आह्वान गरेका थियौँ । त्यसको छनोट हुन अझै बाँकी छ,’ उनले भने ।

व्यवसायीहरूसँग ५० हजारका दरले पैसा माग्न लगाएको भन्ने कुरामा कुनै सत्यता नभएको र यदि भएमा प्रमाणित गर्न उनले चुनौती दिए ।

‘स्वार्थ समूहको झुण्डले पत्रकार सम्मेलन गरेर जे आरोप लगाए पनि हुन्छ ? कार्यालयआसपास सटर बनाएर भाडामा लगाउन पल्केकाहरूले झुटो आरोप लगाएका हुन्,’ उनले भने, ‘कार्यालय सार्न म एक्लैले मिल्दैन । सबै प्रक्रिया पूरा गरेपछि सीडीओको अध्यक्षताको समितिको निर्णय भएपछि मात्र सारेका हौँ । यसमा कुनै अनियमितता भएको भए प्रमाणित गर्न म चुनौती दिन्छु ।’

प्रकाशित मिति: सोमबार, असार २७, २०७९ १५:०५