कार चालक कुट्न ठमेलबाट मोटरसाइकलमा पिछा गर्दा परियारको यसरी गयो ज्यान

A+ A A-

गत मंगलबार ठमेलको १० एक्सनाइट क्लबमा दुई समूहबीच विवाद भयो । क्लबमा रातभर झुमेका उनीहरूबीच बिहान ४ : ४५ मा विवादले झगडाकाे रुप लिएका थियो ।

दुवै समूहका युवाले अत्यधिक मादकपदार्थ सेवन गरेका थिए । क्लबमा भएको विवादले उग्र रूप लिन खोजेपछि एक समूह आफ्नो कार लिएर क्लबबाट निस्केर ठमेल, सोह्रखुट्टे हुँदै बालाजु हुइँकिँदै थियो ।

तर, क्लबमा विवाद गरेका युवाहरूले भने कारलाई गर्दै पिछा गर्न थाले । कारमा सवार युवाहरूमाथि कुटपिट गर्ने उद्देश्यले दुईवटा मोटरसाइकलमा चार जना युवा कारको पछि लागे । कार आफ्नै गतिमा हुइँकिँदै थियो ।

बालाजु पुलपुग्दा कारलाई ओभरटेक गर्न खोज्दा तीव्र गतिको ३५० सीसीको बा ०२–०२३ प ३७७५ नम्बरको डोमिनार कम्पनीको एउटा मोटरसाईकल पुलको रेलिङमा बजारियो । चालक थिए– काठमाडौं लोलाङ बस्ने २२ वर्षीय सविन परियार । उनी दुर्घटनास्थलमै अचेत भए ।

उनीहरूसँगै गएका अर्काे मोटरसाइकका साथीहरूले रेलिङमा ठोक्किएको मोटरसाइकल सवार सविन र काठमाडौं इन्द्रचोकका २२ वर्षीय निरज महर्जनलाई उद्धार गरेर ठमेल नयाँबजारस्थित पिपुल्स अस्पताल पुर्‍याए ।

कार भने आफ्नै गतिमा उसैगरी हुइँकियो । अस्पताल पुर्‍याएकामध्ये मोटरसाइकल चालक सविन परियारलाई भने अस्पताल पुग्नासाथ अस्पतालले मृत घोषणा गर्‍यो । उनीसँगै सवार महर्जनको अहिले पनि अस्पतालले आईसीयूमा राखेर उपचार गरिरहेको छ । अस्पतालका अनुसार उनको स्वास्थ्य अवस्था खतरामुक्त छ ।

मृतकका परिवारले कार चालकको कारण परियारको ज्यान गएको आरोप लगाएका छन् । तर, प्रहरीले भने कारसँग नठोक्किँदै मोटरसाइलक आफैँ तीव्र गतिका कारण रेलिङमा ठोक्किएको सीसी क्यामेरामा देखिएको बताएको छ ।

प्रकाशित मिति: आइतबार, असार २६, २०७९ १७:०६