बलात्कार प्रयासको आरोपित वडाध्यक्ष जोगाउन सिंगो पार्टी नै सक्रिय, प्रहरी पनि मिलेकाे आशंका

बलात्कार प्रयासको आरोपित वडाध्यक्ष जोगाउन सिंगो पार्टी नै सक्रिय, प्रहरी पनि मिलेकाे आशंका

A+ A A-

मकवानपुरको विकट कैलाश गाउँपालिकाकी करिब १७ वर्षीया बालिकामाथि बलात्कार प्रयास गरेको आरोप लागेका वडाध्यक्षलाई जोगाउन सिंगो पार्टी नै लागेको छ । पीडित बालिकाले जिल्ला प्रहरी कार्यालय मकवानपुरमा आफूमाथि कैलाश–९ का वडाध्यक्ष भुवनसिं घलानले बलात्कार प्रयास गरेको किटानी जाहेरी दिइसकेकी छिन् ।

वडाध्यक्ष घलान भने फरार छन् । घलानलाई झुटो आरोप लगाएर फसाउन खोजिएको भन्दै नपाली कांग्रेस कैलाश गाउँपालिका समितिले दाबी गरेको छ । कांग्रेसले निर्वाचन हारेको झोकमा वडाध्यक्षलाई फसाउन खोजिएको दाबी गरेको हो । तर, पीडित बालिका विद्यालयमै घटना मिलाउन खोजेपछि हेटौँडास्थित माइती नेपालको शरणमा पुगेकी थिइन् ।

माइती नेपालको परामर्शपश्चात बालिकाले मकवानपुर प्रहरीमा २४ असारमा जाहेरी दिएकी थिइन् । वडाध्यक्ष घलानले १९ असार राति होटलको कोठाभित्र प्रवेश गरेर आफ्नो संवेदनशील अंगमा हात लाने कार्य गरेको बालिकाले आरोप लगाएकी छन् ।

कांग्रेस कैलाश गाउँपालिका समितिले हेटौँडास्थित पार्टी जिल्ला कार्यालयमा आएर पत्रकार सम्मेलन गर्दै चुनाव हारेको झोकमा केही व्यक्तिहरूले नियोजित रूपमा फसाउने योजना बनाएर यौन दुर्व्यवहारकाे प्रपञ्च रचेको दाबी गरेको छ । ‘जननिर्वाचित वडाध्यक्षलाई अनाहकमा यौन दुर्व्यवहार जस्तो घृणित आरोप लगाउने राजनीतिक दलप्रति घोर भत्सर्ना गर्दछौँ,’ कांग्रेस गाउँपालिका सभापति राजेन्द्र घिसिङले भनेका छन् ।

बालिका हेटौँडामा १८–१९ असारमा भएको जिल्लास्तरीय राष्ट्रपति रनिङ शिल्ड खेल्न कैलाश–९ नामटारस्थित कालिका माध्यमिक विद्यालयबाट प्रतिनिधित्व गर्दै आएकी थिइन् । हेटौंडा–१ स्थित आसन गेष्ट हाउसमा कालिका माविका विद्यार्थी खेलाडीसहित शिक्षकहरू बसेका थिए । होटलको एउटा कोठामा पीडित बालिकासहित दुई जना विद्यार्थी बसेका थिए । अन्य दुई विद्यार्थी सुतिसकेपछि वडाध्यक्ष आफ्नो कोठामा आएर गलत कार्य गरेको बालिकाले बताएकी छन् ।

आरोपित घलान जोगाउन प्रहरी नै मिलेको पीडित पक्षले आरोप लगाएको छ । गाउँमै लुकेका वडाध्यक्ष पक्राउ गर्न प्रहरीले सकेको छैन । मकवानपुरका प्रहरी नायब उपरीक्षक टेकबहादुर कार्कीले घलानलाई पक्राउ गर्न टोली खटिएको दाबी गरे । तर, पीडित पक्षका अनुसार घलानलाई खोज्न गाउँमा प्रहरी सक्रिय नभएको पाइएको छ । ‘अहिलेसम्म पक्राउ परेका छैनन् । हाम्रो टोली खटिएको छ । छिट्टै पक्राउ गर्छौं,’ कार्कीले भने ।

माइती नेपालको संरक्षणमा रहेकी बालिकाले गत बिहीवार नै जाहेरी दिन खोजे पनि वडाध्यक्ष घलान निकटका व्यक्तिले घटना मिलाउन दबाब दिएको पीडित परिवारले जानकारी दिएको छ । आरोपित घलानले भने आफूले गलत कार्य नगरेको भन्दै फसाउन खोजिएको दाबी गरेका छन् ।

प्रकाशित मिति: आइतबार, असार २६, २०७९ ११:१०