लामोसाँघु–जिरी सडक : ठेक्का रद्द गर्ने चेतावनीपछि ठेकेदारले सडक सुधार गर्ने बाचा गरे

लामोसाँघु–जिरी सडक : ठेक्का रद्द गर्ने चेतावनीपछि ठेकेदारले सडक सुधार गर्ने बाचा गरे

A+ A A-

सडक सुधार नगरे ठेक्का रद्द गर्ने चेतावनीपछि निर्माणधीन लामोसाँघु-जिरी सडक खण्डका ठेकेदारहरुले मंगलबारदेखि सडक सुधार गरेर यातयात आवगमनलाई सहज बनाउने लिखित बाचा गरेका छन् ।

लामोसाँघु-जिरी सडक सुधार आयोजनाले आइतबार तीन दिनभित्र सडक सुधार नगरे ठेक्का रद्द गर्ने सूचना प्रकाशित गरेको थियो । सडक सुधार आयोजनाले ठेकेदारहरुलाई चेतावनी दिएपछि सोमबार जिल्ला समन्वय समितिको समन्वयमा सरोकारवालाबीच भएको बैठकमा ठेकेदारहरुले बिग्रेको सडकमा तत्कालै ग्राभेल गरेर यातयात सहज बनाउने प्रतिबद्धता व्यक्त गरेको जिल्ला समन्वय समितिका प्रमुख कृष्णगोपाल तामाङले जानकारी दिए ।

बिग्रेको सडकमा ठेकेदारसँग मौज्दात रहेको ग्राभेल बिच्छ्याउने र नपुग ग्राभेल राजमार्ग आसपसामा भएको क्रसर उद्योगबाट ल्याउने सहमति भएको प्रमुख तामाङले जानकारी दिए । नपुग ग्राभेल भने सुनकोशी नदीको उपयुक्त स्थान हेरेर निकाल्ने सहमति भएको प्रमुख तामाङले बताए । सुनकोशीलगायतका आसपासका नदीमा असार,साउन र भदौ तीन महिना नदीजन्य पदार्थ निकाल्न नपाउने व्यवस्था छ । तर, संकटको अवस्थामा केन्द्र र प्रदेश सरकारलाई अनुरोध गरेर नदीजन्य पदार्थ निकाल्न पहल गरिने प्रमुख तामाङले बताए ।

२ निर्माण व्यवसायीको विवादले गर्दा सडक निर्माणमा समस्या भएको ठेकेदारहरुले बताएका छन् । खाडीचौरदेखि २५ किलोसम्म सडक निर्माणको जिम्मेवारी सुनौलो खिम्ती, भारतीय सिमाञ्चल र नेपाली गौरी पार्वती कम्पनीले लिएको थियो । सुनौलो खिम्तीको पूर्ण अख्तियारीमा कामको जिम्मेवारी भए पनि सुनौलो खिम्तीले काम छाडेपछि अहिले गौरी पार्वतीको पूर्ण अख्तियारी हुने गरी काम भइरहेको लामोसाँघु जिरी सडक सुधार आयोजना प्रमुख धर्मेन्द्र झाले जानकारी दिए ।

अघिल्लो ठेकेदारबाट करोडाैं रुपैयाँ बक्यौता भएपछि अरूले रकम पाउन पटक-पटक अवरोध गरेपछि काम गर्न समस्या भएको ठेकेदार कम्पनीका प्रतिनिधि डोरमणी पौडेलले जानकारी दिए । अघिल्लो निर्माण व्यवसायीले रकम भुक्तानी नगरेपछि सडक निर्माणमा प्रयोग भएका सबै उपकरणको चाबी खोसिएकाे थियाे । जसले गर्दा समस्या भएको ठेकेदारहरुले गुनासो गरेका छन् ।

सडक सुधारमा अहिले पनि अवरोध हुने भएपछि सुरक्षाकर्मी परिचालन गरेर सडक सुधार गर्ने प्रमुख जिल्ला अधिकारी गोमादेवी चेम्जोङले बताइन । अब निर्माणस्थल र सामग्री लोड गर्ने स्थानमा सशस्त्र र जनपथ प्रहरी परिचालन गरेर सडक सुधार गर्छाैं, प्रजिअ चेम्जोङले भनिन् ।

लामोसाँघु-जिरी सडक सुधार आयोजनाका प्रमुख धर्मेन्द्र झा भने अहिलेका निर्माण व्यवसायीहरुबाट काम हुनै नसक्ने भएपछि आफूहरु ठेक्का रद्दको प्रक्रियामा अघि बढेको बताउँछन् । हामीले पटक-पटक अनुरोध गरेका छौं, तर ठेकेदारहरुले वास्ता नगरेपछि ठेक्का रद्दको प्रक्रियासम्म जानु परेको हाे, झाले भने ।

अब बिग्रेको सडकमा ग्राभेल नगर्ने हो भने लामोसाँघु जिरी सडक अनिश्चितकालका लागि बन्द गर्नुपर्ने अवस्था आउनसक्ने झाकाे भनाइ छ ।

लिसंखुपाखर गाउँपालिकाको क्षेत्रमा सडक बढी बिग्रेको गाउँपालिका अध्यक्ष कमल नेपालले बताए । ६ किलोमिटर सडकमा ठूलाे समस्या छ, याे क्षेत्रका बासिन्दाकाे दैनिकीमा नै समस्या परेकाे छ, अध्यक्ष नेपालले भने ।

सन् १९७५ देखि १९८५ सम्म स्वीस सरकारको सहयोगमा निर्माण भएको अरनिको राजमार्गस्थित सिन्धुपाल्चोकको खाडीचौरबाट दोलखाको जिरीसम्म ११० किलोमिटर लामोसाँघु जिरी सडकको चौडा बढाउने कार्य भइरहेको छ । अक्टोबर २०१५ देखि सुरु गरिएको स्तराेन्नती कार्य दुई वर्ष अर्थात् २०१७ को अक्टोबरसम्ममा सकिनुपर्नेमा हालसम्म जम्मा ५० प्रतिशत पनि काम सकिएको छैन ।

भ्याटसहित ५१ करोड ४४ हजार ८ सय १० रुपियाँको लागतमा सडक चौडा गर्ने र कालोपत्रे गर्ने जिम्मा दिइएको थियो । ३ जुन २०१५ मा ठेक्का सम्झौता भएको थियो । सम्झौता भएको मितिले २ वर्ष अर्थात् १५ जुलाइ २०१८ सम्म सडक निर्माण सम्पन्न गर्नुपर्ने लामोसाँघु तामाकोशी जिरी सडक सुधार आयोजनाका प्रमुख झाले बताए ।

भारतयी एक्जिम बैंकको लगानीमा सडक चौडा बनाउन खाडीचौरदेखी मुडेसम्मको २५ किलोमिटर सडक निर्माणको जिम्मा लिएको कम्पनी यस अघि नै काम छाडेर भागेका थिए । खाडीचौरदेखि मुढेसम्म सुनौलो खिम्ती र भारतीय सिमाञ्चल र नेपाली गौरी पार्वतीले कम्पनीले यसको जिम्मा लिएका थिए । सुनौलो खिम्ती बेपत्ता भएपछि यो सडक खण्डको निर्माणको जिम्मा पनि नेपालकाे गौरी पार्वतीलाई नै दिइएको छ ।

त्यस्तै मुडेबाट चरिकोटसम्मको ३० किलोमिटर सडक स्तोरन्नतीको जिम्मा भारतको सकिल हैदर,शंकर माली र नेपालको सुनौलो खिम्तीले पाएको थियो । २०१५ को जुन १४ मा सम्झौता भएको र २०१८ को १ मार्चमा सडक मर्मत कार्य सक्नुपर्ने भए पनि यो खण्डको कामसमेत सकिएको छैन । भ्याटसहित ९१ करोड ९४ लाख ९४ हजारमा सडक कालोपत्रे र चौडा बनाउनुपर्ने आयोजना प्रमुख झाले बताए ।

प्रकाशित मिति: मंगलबार, साउन ७, २०७६ ०४:५३