सरकारी ढुकुटीमा रजाइँ : बा–आमाको नाममा गण्डकीका मुख्यमन्त्री र मन्त्रीको डेढ करोड बजेट

सरकारी ढुकुटीमा रजाइँ : बा–आमाको नाममा गण्डकीका मुख्यमन्त्री र मन्त्रीको डेढ करोड बजेट

A+ A A-

गण्डकी प्रदेश सरकारको आगामी आर्थिक वर्षको बजेटमा मुख्यमन्त्रीदेखि मन्त्रीसम्मले रजाइँ गरेका छन् । सरकारी ढुकुटीबाट आफ्नो बुवा–आमाको नामको कोष भर्न, ट्रष्ट चलाउन मुख्यमन्त्री र मन्त्रीले बजेट हालेका छन् ।

गण्डकी प्रदेशमा कांग्रेसका कृष्णचन्द्र नेपाली पोखरेलको नेतृत्वमा गठबन्धनको सरकार छ । गठबन्धन सरकारले ल्याएको आर्थिक वर्ष २०७९/०८० को वार्षिक विकास कार्यक्रम (बजेट पुस्तिका) मा छुटेका योजना समेटिएको पुस्तिकामा मुख्यमन्त्री र मन्त्रीका बुवाआमाको नामको ट्रष्टलाई गरेर डेढ करोड रकम विनियोजन गरिएको छ ।

सरकारको पैसा बुवाआमाको नामको कोषका लागि छुट्याउन मुख्यमन्त्री पोखरेललाई शिक्षा, संस्कृति, विज्ञान प्रविधि तथा सामाजिक विकास मन्त्री मेखलाल श्रेष्ठले जितेका छन् । मुख्यमन्त्रीका बुवाको नामको कोषलाई ५० लाख र शिक्षामन्त्री श्रेष्ठका बुवा–आमाको नामको ट्रष्टलाई एक करोड रूपैयाँ सरकारी ढुकुटीबाट दिन लागिएको हो ।

मुख्यमन्त्री पोखरेलले बुवा गोबद्र्धन शर्माको नामको कोष (तनहुँ, व्यास नगरपालिका–१० लाई)मा ५० लाख रूपैयाँ विनियोजन गरेका छन् । सामाजिक विकास कार्यालय, तनहुँअन्तर्गत खर्च शीर्षक नम्बर २६४१३ मा उक्त कोषका लागि रकम राखिएको हो ।

मुख्यमन्त्रीकै बाबुको नाममा दमौली अस्पतालमा रहेको ‘गोबद्र्धन शर्मा मेमोरियल आँखा उपचार तथा अनुसन्धान केन्द्र’ स्थापनाको सम्भाव्यता अध्ययन गर्न १० लाख रूपैयाँ छुट्याइएको छ ।

कतिसम्म भने मुख्यमन्त्री पोखरेलको बुवाको नामको कोषलाई सामाजिक विकास कार्यालय, तनहुँका १०१ कार्यक्रममध्ये सबैभन्दा बढी बजेट दिइएको छ । २०७८ सालमा दमौली अस्पतालको आँखा उपचार केन्द्रमा मुख्यमन्त्रीको बुवाको नामको बोर्ड लगाइएको थियो ।

छुटेका कार्यक्रम समावेश गरिएको भन्दै अनुसूचीमा समावेश गरेर गण्डकीमा ‘सेतो किताब’ ल्याइएको छ । त्यो पुस्तकमा २७ करोड रूपैयाँका योजना समेटिएका छन् । त्यसमा शिक्षामन्त्री मेखलाल श्रेष्ठको आमाबुवाको नामको ‘पुन नारायण–धनकुमारी श्रेष्ठ परोपकारी ट्रष्ट’लाई ५० लाख रूपैयाँ छुट्याइएको छ । यो रकम शिक्षा, संस्कृति, विज्ञान प्रविधि तथा सामाजिक विकास मन्त्रालयमार्फत नै खर्च हुनेछ ।

भौतिक पूर्वाधार, सहरी विकास तथा यातायात मन्त्रालयबाट खर्च हुनेगरी मन्त्री श्रेष्ठकै बुवाआमाको नामको ट्रष्टलाई थप ५० लाख रूपैयाँ विनियोजन गरिएको छ । स्याङ्जाको भिरकोट नगरपालिका–१ मा ट्रष्टको भवन बनाउन उक्त रकम विनियोजन भएको हो ।

कांग्रेस नेताको स्मृति भवन र पार्कलाई ४० लाख

मुख्यमन्त्री र मन्त्रीले मात्रै होइन, कांग्रेसकै नेताको स्मृतिमा भवन र पार्क बनाउन पनि बजेट विनियोजन गरिएको छ । कांग्रेस नेता अर्जुन जोशीका बुवा अमृत जोशीको नामको स्मृति पार्क बनाउन २० लाख रूपैयाँ छुट्याइएको छ ।

आफ्नो बुवाको नामको पार्कमा रकम विनियोजन हुँदा सामाजिक सञ्जालमा आएका प्रतिक्रियामा जोशी परिवारले ध्यानाकर्षण भएको जनाएको छ ।

नेता अर्जुन जोशीले विनियोजित रकम आवश्यक भएको ठाउँमा प्रयोग गर्न आफूले मुख्यमन्त्री पोखरेललाई अनुरोध गरेको बताए । ‘अमृतप्रसाद जोशीको बारेमा जिल्लाबासी, गण्डकी प्रदेश र समकालीन व्यक्तिलाई नै बढी जानकारी होला यसमा मलाई केही भन्नु छैन,’ नेता अर्जुनले शनिबार फेसबुकमा लेखेका छन्, ‘उक्त रकमबारे मलाई जानकारी भएपछि हिजो नै मुख्यमन्त्रीलाई बिहानै फोन गरेर उक्त रकम जता आवश्यक छ उतै प्रयोग गर्न अनुरोध गरेको छु ।’

पर्वतकै अर्का कांग्रेस नेता स्वर्गीय डिल्लीराम लामिछानेको स्मृति प्रतिष्ठानको भवन बनाउन पनि प्रदेश सरकारले बजेट छु्ट्याएको छ । त्यसका लागि २० लाख रूपैयाँ बजेट विनियोजन गरिएको छ । भवन पर्वतको कुश्मा नगरपालिका–९ मा बन्ने छ । नेता लामिछानेको २०७२ सालमा ४७ वर्षको उमेरमा क्यान्सरकै कारण निधन भएको थियो ।

विरोधमा एमाले

प्रदेश सभाको प्रमुख प्रतिपक्षी दल नेकपा एमालेले भने सरकारले बजेटमा गरेको मनपरीको विरोध गरेको छ । सेतो किताबलाई एमालेले गठबन्धनको आन्तरिक झगडा व्यवस्थापनको प्रमाणको संज्ञा दिएको छ ।

एमाले प्रमुख सचेतक मायानाथ अधिकारीले शुक्रबार संसदमा बोल्दै सेतो किताबबारे प्रतिपक्षीलाई जवाफ दिनुपर्ने बताए । ‘यो गठबन्धनको सहमतिको दस्तावेज होइन यो ? २० दिनको झगडाको प्रमाण होइन यो ?’, उनले भने, ‘कहाँबाट यसलाई सम्बोधन गर्नुहुन्छ ? मूल्यमान्यता, संविधान, कानुनअनुसार गर्नुभएको छ ? हामी टुलुटुलु हेरेर बस्ने ? यसको जवाफ हामीलाई चाहिन्छ ।’

१ असारमा सरकारले ३५ अर्ब ९० करोड ९० लाख रूपैयाँको बजेट ल्याएको थियो । बजेटबारे गठबन्धनभित्रै असन्तुष्टि चुलिँदा १९ दिनसम्म छलफल सुरू हुन सकेको थिएन । २० असारमा संसद खुलेको थियो ।

कार्यक्रम छुटेको भन्दै ल्याइएको सेतो किताबलगायत विषयमा प्रश्न उठाएर एमालेले शुक्रबार संसद अवरुद्ध गर्‍यो । एमालेले सरकारको धारणा माग गर्दै संसद अवरुद्ध गरेपछि शुक्रबारको संसद बैठक स्थगित भएको थियो । अर्को बैठक आइतबार बोलाइएको छ । प्रदेश सरकारले ल्याएको बजेट २८ असारको बैठकबाट पारित गर्ने तयारी छ ।

प्रकाशित मिति: शनिबार, असार २५, २०७९ १८:०७