अर्थसचिवबाट मरासिनीको सरुवा तयारी, प्रतिस्पर्धामा अर्थकै चार क्याडर

A+ A A-

करका दर हेरफेर प्रकरणमा मुछिएर अर्थमन्त्रीले पदबाट राजीनामा दिनुपरेको छ । अब अर्थसचिवले पनि मन्त्रालय छोड्नुपर्ने परिस्थिति बनेको छ । मन्त्रीबाट जनार्दन शर्माको बदनामसहितको बर्हिगमनपछि अर्थसचिव मधु मरासिनी अर्थबाट बिदा लिने तयारीमा छन् ।

११ महिना अर्थ मन्त्रालयको सचिवको जिम्मेवारी सम्हालेका मरासिनीले मुख्यसचिव शंकरदास बैरागीसँग सरूवा मागेको प्रधानमन्त्री कार्यालय स्रोतले बताएको छ । सह-सचिवहरूसँगको अनौपचारिक छलफलमा पनि मरासिनीले सरुवा हुन चाहेको बताइसकेका छन् ।

आगामी आर्थिक वर्षकाे बजेट नै विवादित बनेको र अर्थमन्त्रीले राजीनामा दिइसकेको अवस्थामा उनलाई सरुवा गर्नुपर्ने बाध्यता सरकारलाई रहेको छ ।

अर्थसचिवको सरुवा निश्‍चित भएपछि सचिबको जिम्मेवारी कसले लिन्छ भन्ने विषयमा चासोको बढेकाे छ ।

सामान्यतया अर्थसचिव अर्थमा बसेर काम गरेका अर्थकै 'क्याडर'हरू ल्याइने गरिएको छ । अब आउने सचिवमा पनि अर्थकै ४ क्याडरबीच प्रतिस्पर्धा सुरु भएकाे छ । सूचना तथा सञ्चार मन्त्रालयका सचिव बैकुन्ठ अर्याल, राष्ट्रिय योजना आयोगका सचिव केवलप्रसाद भण्डारी, उद्याेग तथा आपूर्ति मन्त्रालयका सचिव अर्जुनप्रसाद पाेखरेल र डा. गणेशप्रसाद पाण्डेबीच भावी अर्थसचिवका लागि प्रतिस्पर्धा छ ।

अर्थतन्त्र चुनौतीपूर्ण अवस्थामा रहेको र नेपाल राष्ट्र बैंक लगायतका निकायसँग समन्वयन गरेर काम गर्ने र बजेट कार्यन्वयनलाई लिड गर्न सक्ने हिसाबले अर्याल उपयुक्त मानिन्छन् । अर्यालले सहसचिव हुँदा लामो समय अर्थ मन्त्रालको अन्तर्राष्ट्रिय समन्वय शाखा तथा बजेट शाखामा बसेर काम गरेका थिए । उनले वाणिज्य मन्त्रालय र वित्त आयोगमा पनि सचिवको जिम्मेवारी निभाइसकेका छन् ।

त्यस्तै सहसचिव हुँदा बजेट महाशाखामा बसेर काम गरेका केवलप्रसाद भण्डारी पनि अर्थसचिवको रुपमा मुख्य दाबेदार रहेका छन् । उनी अहिले राष्ट्रिय योजना आयोगमा छन् ।

उद्योग वाणिज्य तथा आपूर्ति मन्त्रालयका दुई सचिव पोखरेल र डा. पाण्डे पनि अर्थ सचिवको चर्चामा छन् । उनीहरू दुवै जना अर्थ मन्त्रालयमा लामो समय काम गरेका प्रशासक हुन् ।