देउवा किन चाहन्छन् जनार्दन फर्काउन, अब कस्तो बन्छ अर्थ मन्‍त्रालय टिम ?

A+ A A-

२०७६ फागुन २१ गते राजीनामा गरेको २४ घण्टापछि तत्कालीन अर्थमन्त्री डा युवराज खतिवडाले पुन: अर्थ मन्त्रालयको कार्यभार सम्हाले ।

अघिल्लो दिन उनको विदाइ भयो एक दिनपछि स्वागत । सायद एउटै मन्त्रालयमा राजीनामा दिएको २४ घण्टा नपुग्दै जिम्मेवारी लिने उनी पहिलो व्यक्ति थिए ।

पुन: गरिएको स्वागतमा उनले तत्कालीन प्रधानमन्त्री केपी शर्मा ओलीलाई देखाउँदै भनेका थिए- 'युद्धमा होमिएको योद्धा कि कमान्डरले भनेपछि फर्कन्छ कि त उद्देश्‍य पूरा भएपछि फर्कन्छ ।'

अहिले अवस्था उस्तै देखिएको छ । अर्थमन्त्रीबाट राजीनामा दिएको एक महिना नपुग्दै उही जिम्मेवारीमा फर्कने तरखरमा जनार्दन शर्मा देखिन्छन् ।

सम्बन्धित समाचार

'कमाण्डरले फिर्ता नबोलाएसम्म युद्ध लडिरहने छु...'

युवराज र जनार्दनको विषय फरक फरक भए पनि त्यो बेला र यो बेलाका दुवै प्रधानमन्त्रीको चाहना करिब उस्तै देखिएको छ । केपी शर्मा ओलीले आफ्नो मन्त्रिपरिषद्‍मा पुन: अर्थ मन्त्रालय चलाउन योग्‍य खतिवडालाई देखे ।

अहिलेका प्रधानमन्त्री शेरबहादुर देउवाले पनि फरक पार्टीको भएर पनि पुन: अर्थ मन्‍त्रालय चलाउन योग्य जनार्दन नै भएको सन्देश दिएका छन् । शर्मा देउवा मन्त्रिपरिषद्का सबैभन्दा विश्‍वासिला सदस्य मानिएको कांग्रेसकै मन्त्रीहरूले स्‍वीकार गरेका छन् ।

माओवादी केन्द्रका एक नेताका अनुसार यदि जनार्दनलाई फेरि अर्थमन्त्री बनाएबापत पार्टी महासचिव अर्को व्यक्तिलाई दिनुपर्ने सर्त राखिएन भने पार्टीको तर्फबाट पुन: उनी नै अर्थमन्त्री हुनेछन् ।

यस विषयमा पार्टीभित्र प्रतिस्पर्धी मानिएका र पार्टी महासचिवमा मुख्य दाबी गरिरहेका वर्षमान पुनले पनि जनार्दन नै अर्थमन्त्री हुने भनिरहेका छन् । 'अर्थमन्त्री बन्ने पहिलो हक जनार्दन कै हुन्छ', पुनले भनेका छन् । जनार्दनको विषयमा छानबिन समिति गठन भई उनले राजीनामा दिएपछि पनि उनै पुनले भनेका थिए, 'छानबिनमा निर्दोष देखिए अर्थमन्त्री जनार्दन नै हुनुहुनेछ ।'

अमेरिकी सहयोग परियोजना एमसीसी पास हुने क्रममा र गभर्नर निलम्बित गर्ने क्रममा पनि तत्कालीन अर्थमन्त्री शर्माको राजीनामा हुने आंकलन गरिएको थियो, त्यसो भएन ।

करका दर हेरफेरको विषयमा छानबिन समिति बनाएपछि नैतिकताको आधारमा भन्दै राजीनामा आयो तर एमालेको फरक मतका बीच उनी भने निर्दोष बन्‍न पुगे । जनार्दन गभर्नर प्रकरणमा अप्ठेरोमा परेका थिए पछि उनै गभर्नर थप विवादमा आए जति बेला जनार्दन अर्थमन्त्रीको भूमिकामा थिएनन् ।

के हुन् फर्कन सक्ने आधार

माथि उल्लेख गरिए जस्तै अर्थमन्त्री कि पार्टी महासचिव भन्ने सर्त भएमा भने उनी अर्थमन्‍त्री बन्ने छैनन् । अन्यथा जनार्दनलाई नै अर्थमन्त्री बनाइने स्रोतको दाबी रहेको छ । यसका ५ वटा आधार रहेका छन् ।

१ जुन आरोपमा उनीमाथि छानबिन भएको थियो छानबिन समितिको बहुमतले उनलाई निर्दोष देखाएको छ । प्रतिष्ठा जोगाउन उनी फर्कन चाहन्छन् ।

२ उनले अर्थमन्त्रीबाट राजीनामा दिनुको अघिल्लो दिन केही करका दरहरूरु हेरफेर गर्नै पर्ने भएकोले संशोधनको तयारी गर्न सहसचिवहरूलाई आग्रह गरेका थिए । साथै राजीनामा दिने दिन पनि आफूलाई तत्काल पूर्व अर्थमन्त्रीको सूचीमा नराख्न भनेका थिए । उनले आफू निर्दोष हुने र आफै फर्कने सन्देश दिन खोजेका थिए ।

३ जनार्दनले राजीनामा दिएपछि अर्थमन्त्रीको जिम्मेवारीमा समेत रहेका प्रधानमन्त्री शेरबहादुर देउवाले व्यवसायीहरूसँग करका दरहरू हेरफेरको सवालमा उठाइएको प्रश्‍नमा दर जसले तलमाथि गर्‍याे उसैले मिलाउँछ भन्दै जनार्दन फर्कने संकेत दिएका थिए । 'हाम्रो लक्ष अर्थमन्त्री हटाउनेभन्दा पनि अव्यवहारिक रुपमा हेरफेर गरिएका करका दरहरू मिलाउनु पर्छ भन्ने हो भन्दा प्रधानमन्त्रीले जसले बिगारेको हो उसैले मिलाउँछ भन्नुभयो सायद जनार्दन नै अर्थमन्त्री बन्‍नेछन्' एक व्यवसायीले भनेका थिए ।

४ पार्टीभित्र उनका प्रतिस्पर्धी मानिने र गभर्नर प्रकारणमा त उनको आलोचना नै गरेका पार्टीका नेता वर्षमान पुनले समेत उनै अर्थमन्त्री बन्ने सन्देश दिएका छन् ।

५ आगामी निर्वाचनसम्म अहिलेको गठबन्धनलाई कायम राखेर चुनाबी तालमेल गराउनका लागि पनि जनार्दन त्यो भूमिकामा देउवा चाहान्छन् । र प्रधानमन्त्री पत्‍नी आरजु राणासँग समेत उनको राम्रो सम्बन्ध रहेको र राणाले पनि जनार्दन ल्याउन चाहेको बताइएको छ ।

जनार्दन फर्कदा मन्त्रालयको टिम कस्तो बन्छ

जनार्दन शर्मा अर्थमन्‍त्रीकै भूमिकामा फर्किए भने अर्थमन्त्रालयमा अब कस्तो टिम बन्‍ला त ? करिब डेढ वर्ष निकै राम्राे सम्बन्ध रहे पनि अहिलेका अर्थसचिवसँग अहिले भने जनार्दनको सम्बन्ध विग्रेको छ । अर्थसचिव मधुकुमार मरासिनीले जनार्दनले राजीनामा दिएपछि राजीनामा दिने वातवरण आफूले तय गरेको सन्देश दिएका थिए । उनी अर्थमन्त्रीले नछाडेसम्म मन्त्रालय नफर्कने भन्दै आकस्मिक विदामा बसेका थिए।

जनार्दन फर्किए वा नफर्किए पनि अर्थसचिव भने परिवर्तन हुने प्रशासन स्रोतको दाबी छ । यत्ति हो जनार्दनबाहेक अर्को मन्त्री आउँदा मरासिनीले आफू नै सचिव बन्‍ने चाहाना राख्‍ने छन् ।

जनार्दन नै फर्किएपछि सम्भवत उनले त्यो भन्दा पहिले नै सरुवा माग्ने छन् । जनार्दन फर्कदा अर्थसचिव नयाँ हुनेछन् । राजस्व सचिव कृष्णहरी पुष्करसँग भने उनको ट्युनिङ मिलेको बताइन्छ । उनी अर्थमन्त्री हुँदा पुष्करलाई नै अर्थसचिवको भूमिकामा लिन सक्ने पनि आंकलन मानिएको छ । तर, निकै जुनियर सचिव भएको नाताले उनले जिम्मेवारी पाउने सम्भावना कम छ ।

कांग्रेसको चाहनामा केबल भणडारी र बैकुन्ठ अर्याल अर्थसचिव हुन सक्ने बताइएको छ । राजस्व, बजेट र अन्तर्राष्ट्रिय समन्वय महाशाखाका प्रमुखहरू तथा तीन सहसचिवहरू पनि जनार्दन फर्कदा सरुवा खोज्‍ने मनस्थितिमा देखिएको अर्थ मन्त्रालयका अधिकारीहरूको दाबी रहेको छ ।

जनार्दन फर्कदा अर्थ मन्त्रालयमा नयाँ टिम बन्ने देखिएकाे छ ।

प्रकाशित मिति: शनिबार, साउन १४, २०७९ १५:४२