'कमाण्डरले फिर्ता नबोलाएसम्म युद्ध लडिरहने छु...'

A+ A A-

बिदा भएको ठीक २४ घण्टापछि डा. युवराज खतिवडा पुनः अर्थमन्त्री र सञ्चार तथा सूचना प्रविधिमन्त्रीका रूपमा सिंहदरबार छिरे । बुधबार उनले अर्थ र सञ्चार मन्त्रालय पुगेर पदभार ग्रहण गरे । त्यसपछि पत्रकारहरूसँग गफिए । केही अनुभव शेयर गरे भने कतिपय याेजना सुनाए ।

बितेको २४ घण्टालाई उनले क्वारेन्टाइन बसाइको अवधिको रूपमा गणना गरेका छन् । तर, आफू ठीक छु भन्ने भएपछि पुनः काममा फर्किएको उनी बताउँछन् ।

‘विज्ञ अर्थमन्त्री’लाई २ वर्ष गाली, फेरि आए पाउलान् ताली !

‘हिजो यसै समयमा म यहाँबाट निस्केको थिएँ, यो २४ घण्टा क्वारेन्टाइमा थिएँ’, खतिवडाले अगाडि थपे, ‘सम्माननीय प्रधानमन्त्री अहिले उपचारमा हुनुहुन्छ, केही दिनपछि नियमित काममा आउनुहुनेछ, म पनि २४ घण्टा क्वारेन्टाइनमा थिएँ, फर्किएर आएँ।’

उनी प्रसन्न मुद्रामा देखिन्थे । फूलमाला र बधाई दिनेकाे लाम देख्दा लाग्थ्याे- उनी लामाे समयपछि मन्त्री भएका हुन् ।

स्वागत तथा बधाई ग्रहण गरेपछि मन्त्री खतिवडा कर्मचारीहरूलाई सम्बोधन गरिरहेका थिए, ठीक त्यही बेला बत्ती गयाे । त्याे माहाेललाई पनि उनले आफूसँग जाेड्दै भने, ‘विद्युतमा त हामी करिब आत्मनिर्भर भयौँ, हेर्नुस्, बत्ती गयो तर, ऊर्जा लिएर आएकाले मचाहिँ जोडजोडले बोलिरहेको छु ।’ अर्थमन्त्रीकाे दोस्रो इनिङ्समा आएका खतिवडाले आफूलाई रोग, भोक, अशिक्षा र असमानताका विरुद्धमा लड्ने लडाकुको रूपमा अर्थ्याए । उनलाई पहिलो पटक अर्थमन्त्री बनाउनकै लागि राष्ट्रियसभामा मनोनीत गरिएको थियो भने दोस्रो पटक संघीय संसदको सदस्य नभएर पनि २ वटा मन्त्रालयकाे जिम्मेवारी दिइएकाे छ । संविधानअनुसार उनी संसदको सदस्य नभएरै पनि ६ महिना अर्थमन्त्री हुन पाउँछन् ।

खतिवडाले आफू युद्धमा आएको बताए । उनले आफूलाई विकासे योद्धाको रूपमा पनि अर्थ्याए । उनले भने, ‘यो मुलुकको गरिबी, अभाव, भोक, अशिक्षा र अन्यायको विरुद्धमा लडेको एउटा विकासे योद्धा हुँ ।’

उनले आफ्नो बहिर्गमन २ अवस्थामा हुने बताए । ‘युद्धमा होमिएको योद्धा कि कमान्डरले भनेपछि फर्कन्छ कि त उद्देश्‍य पूरा भएपछि फर्कन्छ’, उनले थपे, ‘कमाण्डरले फिर्ता नबाेलाएसम्म लड्छु, त्यति बेलासम्म मुलुकले चाहेको विकास, सुशासन र समानताको युद्धमा लड्नेछु ।’

राजनीति हो, जे पनि हुन सक्छ

मंगलबार उनले अर्थमन्त्रीसँगै सञ्चार तथा सूचना प्रविधिमन्त्रीबाट पनि राजीनामा दिएका थिए । सञ्चारमन्त्रीको रूपमा दूरसञ्चार प्राधिकरणको कार्यक्रममा उपस्थित भइरहँदा उनले त्यसै दिन राजीनामा दिँदैछन् भन्ने शंका सायदै कसैले गरेका थिए । तर, उनको राजीनामा औपचारिकताका लागि मात्र थियो ।

अर्थ मन्त्रालयबाट बाहिरिने क्रममा भने उनी अलिक निराश देखिएका थिए । बाहिरिँदै गर्दा उनले भनेका कुरा सम्झँदै अर्थसचिव शिशिरकुमार ढुंगानाले भने, ‘हिजो राजनीति हो, जे पनि हुन्छ भन्दै कागजपत्र कट्याककुटुक पार्दा मन अमिलो नै भएको थियो, साँच्चै के होला भन्ने भएको थियो । जब प्रधानमन्त्रीले राष्ट्रियसभा र अर्थमन्त्रीमा पुनः सिफारिसकाे संकेत दिए, त्यसपछि खतिवडा उत्साहित बनेका थिए ।

निजी क्षेत्रको विश्‍वास जित्ने चुनौती

निजी क्षेत्रको विश्वास जित्ने अबको चुनौती भएको खतिवडाले बताए । प्रधानमन्त्रीले उनीबाट अपेक्षा गरेकाे पनि यही हुन सक्ने धेरैकाे अनुमान छ । उद्योग राज्यमन्त्री भएसँगै उद्योगी मोतीलाल दुगडले आफूलाई निजी क्षेत्रको विश्वास जित्न सकियोस् भनेर प्रधानमन्त्रीले नियुक्त गरेकाे बताएका थिए । खतिवडाको संकेत पनि त्यस्तै थियो ।

निजी क्षेत्रप्रति अनुदार भएका आक्षेप लाग्ने गरेका अर्थमन्त्री खतिवडाले बुधबार भने निजी क्षेत्रको खुलेरै प्रशंसा मात्र गरेनन्, उनीहरूको विश्वास जितेर अघि बढ्ने प्रतिबद्धता पनि जनाए । ‘राष्ट्रिय अर्थतन्त्रमा योगदान पुर्‍याउने र सरकारी अभियानमा हातेमालाे गर्नेहरूसँग अझै सहकार्य गर्नु छ । निजी क्षेत्रको प्रतिफल र लगानी दुवै बढाउनु छ , उनले भने ।

खतिवडाको भनाइले अब प्रतिफलको ग्यारेन्टीसहित लगानी विस्तारमा सरकारले प्राेत्साहन गर्ने नीति लिन सक्ने बुझिन्छ ।

विगत २ वर्षको समीक्षा गर्न भने उनले खासै रुचाएनन् । पहिलेभन्दा अझै प्रभावकारी ढंगले काम गर्ने बाचा भने उनले गरे ।

प्रकाशित मिति: बुधबार, फागुन २१, २०७६ १८:४२