देशभर ६० हजार उद्योग, ५ लाखलाई रोजगारी

A+ A A-

देशभर ६० हजारभन्दा बढी उद्योग सञ्चालनमा रहेकाे देखिएकाे छ । राष्ट्रिय तथ्यांक विभागले २०७६ मा गरेको औद्योगिक सर्वेक्षणको नतिजामा यस्तो देखिएको छ । तीमध्ये खानी तथा उत्खनन् क्षेत्रमा ३५६ वटा, औद्योगिक उत्पादन क्षेत्रमा ५६,६११ वटा, विद्युत्, ग्यास, बाफ तथा वातानुकूलित सेवा क्षेत्रमा ९९४ वटा र पानीको आपूर्ति, ढल निकास, फोहाेर व्यवस्थापन र त्यसको उपचारात्मक क्रियाकलापहरूको क्षेत्रमा २,२२४ वटा उद्योग प्रतिष्ठानहरू रहेका छन् ।

उद्योग प्रतिष्ठानहरूमा संलग्न व्यक्तिहरू प्रतिष्ठानमा सक्रिय रूपले कार्यरत व्यवसायी तथा साझेदारहरू, बेतलवी पारिवारिक कामदारहरू र तलवी कामदारहरू विभाजन गरिएको छ।

औद्योगिक क्षेत्रका चारवटै प्रकारका औद्योगिक प्रतिष्ठानहरूमा संलग्न रहेका व्यक्तिहरूको संख्या ४ लाख ९१ हजार २२७ रहेको छ। खानी तथा उत्खनन् क्षेत्रमा ६ हजार ४८५ जना, औद्योगिक उत्पादन क्षेत्रमा ४ लाख ४४ लाख ९६६ जना, विद्युत्, ग्यास, बाफ तथा वातानुकूलित सेवा क्षेत्रमा २१ हजार ५९३ जना र पानीको आपूर्ति, ढलनिकास, फोहर व्यवस्थापन र त्यसको उपचारात्मक क्रियाकलापहरूको क्षेत्रमा १८ हजार १८५ जना व्यक्तिहरू संलग्न छन् ।

रोजगार व्यक्तिहरूको संख्यामा प्रतिष्ठानबाट नियमित रुपले तलव, ज्याला लिनेगरी कार्यरत कर्मचारी तथा कामदारहरू पर्दछन्। सर्वेक्षणको नतिजाअनुसार औद्योगिक क्षेत्रका चारवटै प्रकारका औद्योगिक प्रतिष्ठानहरूमा रहेका तलवी कामदारको संख्या ३ लाख ८१ हजार ६८७ रहेको छ।

तीमध्ये खानी तथा उत्खनन क्षेत्रमा ५ हजार ७१९ जना, औद्योगिक उत्पादनशील क्षेत्रमा ३ लाख ४६ हजार १४३ जना, विद्युत्, ग्यास, बाफ तथा वातानुकूलित सेवा क्षेत्रमा १७ हजार २३८ जना र पानीको आपूर्ति, ढल निकास, फोहाेर व्यवस्थापन र त्यसको उपचारात्मक क्रियाकलापहरूको क्षेत्रमा १२ हजार ५८७ जना देखिएको छ।