सरकारी जग्गा ४० वर्षसम्मका लागि लिजमा लिन पाइने

A+ A A-

सरकारी जग्गा अधिकतम ४० वर्षसम्मका लागि लिजमा लिन पाइने भएको छ । सरकारले न्यूनतम ५ देखि ४० वर्षसम्म लिजमा दिने भएको हो । भूमि व्यवस्था, सहकारी तथा गरिबी निवारण मन्त्रालयले सरकारी जग्गा दर्ता, उपयोग तथा लिजमा उपलब्ध गराउने सम्बन्धी कार्यनीति, २०७९ राजपत्रमा प्रकाशित गरेको छ।

कार्यनीतिले ५ वर्षसम्म अल्पकालीन, १५ वर्षसम्म मध्यकालीन र ४० वर्षसम्म दीर्घकालीन रूपमा सरकारी जग्गा लिजमा उपलब्ध गराउने उल्लेख छ । निजी जग्गा पनि सरकारी निकायलाई उपलब्ध गराउन सकिने व्यवस्था गरिएको छ ।

त्यसैगरी, नेपाल सरकारको नाममा रहेको कुनै सरकारी जग्गा अर्को सरकारी निकायलाई आवश्यक भएमा उपयोग गर्न दिन सकिने व्यवस्था गरिएको छ । सरकारअन्तर्गतका निकायको हकमा जग्गा माग गर्ने निकायको केन्द्रीय निकाय, प्रदेश सरकारको हकमा सम्बन्धित मुख्यमन्त्री तथा मन्त्रिपरिषद्को कार्यालय र स्थानीय तहको हकमा कार्यपालिकाको निर्णयसहित संघीय मामिला मन्त्रालयले सिफारिस गर्नुपर्ने व्यवस्था गरेको छ ।

भूमि व्यवस्था मन्त्रालयले विदेशी कूटनीतिक नियोग तथा संयुक्त राष्ट्र संघका निकाय, नेपाल पक्ष रहेका अन्तरसरकारी संगठन, प्रदेश सरकार वा स्थानीय तहअन्तर्गत स्थापना भएका विश्वविद्यालय, बोर्ड, समिति वा अन्य स्वायत्त संस्था र प्रचलित कानुनबमोजिम केन्द्र सरकार, प्रदेश सरकार वा स्थानीय तहमा दर्ता भएको कुनै संस्था वा व्यक्तिलाई सरकारी जग्गा उपलब्ध गराउने व्यवस्था गरेको छ ।

प्रकाशित मिति: शुक्रबार, असार २४, २०७९ १३:४७