डीएसपी घिमिरेलाई कुटेपछि बर्खास्त हवल्दारले दिए पुनरावलोकनको निवेदन

डीएसपी द्वारिका घिमिरे ।

A+ A A-

ललितपुर प्रहरी वृत्त चापागाउँका प्रमुख प्रहरी नायब उपरीक्षक (डीएसपी) द्वारिका घिमिरेलाई कुटपिट गरेपछि बर्खास्तीमा परेका प्रहरी हवल्दारले पुनः जागिरमा जोडिन पाउँ भन्दै निवेदन दिएका छन् ।

चापागाउँमै कार्यरत हवल्दार नवल किशोर रायले डीएसपी घिमिरेलाई गत ३ चैतमा कार्यालभित्रै कुटपिट गरेका थिए । ३ चैतकै बिहान घरबिदा मागेका रायको बिदा डीएसपी घिमिरेले अस्वीकृत गरेका थिए । सोही विषयमा विवाद भएपछि रायले राति मादक पदार्थ सेवन गरेर डीएसपी घिमिरेलाई कुटपिट गरेका थिए ।

हवल्दार रायले डीएसपी घिमिरेलाई कुटपिट गरेको सीसीटीभी फुटेजमा समेत देखिन्छ । सोही प्रकरणमा ललितपुर प्रहरी परिसरले रायलाई १२ चैतमा जागिरबाटै हटाएको थियो । तर, बर्खास्तमा परेको दुई महिनापछि फेरि जागिरमा जोडिन पाउँ भन्दै हवाल्दार रायले ललितपुर प्रहरी परिसरमै निदेवन दिएका छन् । रायले जागिरमा पुन: जोडिन पाउँ भन्दै पुनरावलोकनका लागि निवेदन दिएको परिसरका प्रवक्ता एसपी सिद्धिविक्रम शाहले पुष्टि गरे ।

‘रायलाई परिसरले चैत महिनामै बर्खास्त गरेको हो । अहिले फेरि जागिरमा जोडिन पाउँ भन्दै निवेद परेको छ । पुनरावलोकनको अधिकार परिसर प्रमुख एसएसपीमा हुन्छ । उहाँँले के गर्नुहुन्छ,’ एसपी शाहले भने । तर, ललितपुर प्रहरी प्रमुख एसएसपी यज्ञविनोद पोखरेलकै पाला उनी बर्खास्तीमा परेका कारण उनको निवेदन पुनरावलोकन हुने सम्भावना भने कम छ ।

एसएसपीले पुनरावलोनक नगरे राय अदालत जान पाउने कानुनी व्यवस्था छ । डीएसपी घिमिरेमाथि ‘एग्रेसिप पुलिसिङ’ गर्ने र आफू मातहतका प्रहरी कर्मचारीलाई बढी खटाउने गुनासो जुनियर प्रहरी कर्मचारीको छ । ०७७ मा इलाका प्रहरी कार्यालय रौतहट गरुडाको प्रमुख हुँदा पनि उनीमाथि स्थानीयले कुटपिट गरेका थिए । त्यो बेला उनको करङ नै भाँचिएको थियो । गरुडा प्रमुख भएको २५ दिनमै उनी तानिएका थिए ।