शक्तिकेन्द्रको आडमा इन्चार्जमा एसएसपी भट्टराईको ह्याट्रिक

A+ A A-

प्रहरी प्रधान कार्यालयले बुधबार ६ जना वरिष्ठ प्रहरी उपरीक्षक (एसएसपी) काज सरुवा गर्‍यो । जसमध्ये काठमाडौं प्रहरी प्रमुखको जिम्मेवारी एसएसपी भरतबहादुर बोहरा र उपत्यका अपराध अनुसन्धान कार्यालयको कमाण्ड एसएसपी जनक भट्टराईले पाए ।

भट्टराई यस्ता भाग्यमानी एसएसपीमा दरिए, जसले इन्चार्ज-टु-इन्चार्ज पाउनेमा ह्याट्रिक नै गरे । त्यो पनि एसएसपीका लागि आकर्षक मानिएको ठाउँमा । प्रहरीमा सामान्यतः इन्चार्ज-टु-इन्चार्ज सरुवा दिइँदैन ।

तर, उनले शक्तिकेन्द्रका आडमा एसएसपी बढुवा भएदेखि नै इन्चार्ज पाउन थालेका हुन् । यसअघि २०७७ मा भट्टराईले उपत्यका ट्राफिक प्रहरी कार्यालय रामशाहपथमा १४ महिना कमाण्ड सम्हालेका थिए । ट्राफिक कार्यालयबाट एसएसपी भट्टराईलाई अर्को इन्चार्जकै रूपमा संघीय इकाई प्रहरी कार्यालय भैरहवामा सरुवा गरियो ।

भैरहवाको इन्चार्ज भएको झण्डै ६ महिनामै फेरि उनलाई उपत्यका अपराध अनुसन्धान कार्यालयको जिम्मा दिइएको छ । एसपी हुँदासमेत भट्टराईले दाङ, महोत्तरी र बर्दियाको कमाण्ड सम्हालेका थिए । तुलनात्मक रूपमा आफ्ना ब्याचीहरूमा कमजोर कार्यक्षमता भएका भट्टराईले शक्तिकेन्द्रको आडमा महत्त्वपूर्ण जिम्मा पाउँदै आएका छन् । विराटनगरका भट्टराईले कांग्रेस नेताकै दबाबका कारण उपत्यका अपराध अनुसन्धान कार्यालयको जिम्मा पाएको प्रहरी उच्च अधिकारी बताउँछन् ।

आकर्षक मानिने इन्चार्जको जिम्मेवारी एक जनाले मात्रै पाउँदा अन्य प्रहरीको मनोबल कमजोर हुने प्रहरी अधिकारीहरू नै बताउँछन् । त्यस्तै सरुवा भएका अन्य एसएसपीहरूमा प्रवक्तासमेत रहेका एसएसपी विष्णु केसीको अपराध अनुसन्धान विद्यालय महाराजगञ्ज, कुवेर कडायतको नेपाल प्रहरी विपद्‌ व्यवस्थापन कार्यालय सामाखुसी, विकाशराज खनालको लागुऔषध नियन्त्रण ब्युरो कोटेश्वर र अनुराग कुमार द्विवेदीको मानव बेचबिखन अनुसन्धान ब्युरोमा काज सरुवा भएको छ ।