मानव बेचबिखन तथा ओसारपसारमा संलग्न तीन जना पक्राउ, न्युजिल्याण्ड पठाइदिन्छु भन्दै ६३ लाख ठगी

मानव बेचबिखन तथा ओसारपसारमा संलग्न तीन जना पक्राउ, न्युजिल्याण्ड पठाइदिन्छु भन्दै ६३ लाख ठगी

A+ A A-

प्रहरीले मानव बेचबिखन तथा ओसारपसारमा संलग्न तीन जनालाई पक्राउ गरेको छ । प्रहरीको मानव बेचबिखन अनुसन्धान ब्यूरो बबरमहलको टोलीले मानव बेचबिखनमा संलग्न ललितपुर चापागाउँका ४८ वर्षीय दौलत रोका, काठमाडौं कोटेश्वरकी रेवती सुनार र रोल्पा घर भई टोखा बस्ने भरतमणि घर्तीमगरलाई पक्राउ गरी आज सार्वजनिक गरेको हो ।

ब्यूरोका प्रवक्ता, प्रहरी उपरीक्षक दानबहादुर मल्लले एक महिलालाई कुवेतमा आकर्षक तलब हुने प्रलोभन देखाएर तीन जना मिलेर भारतको नयाँ दिल्ली हुँदै कुवेतमा बिक्री गरेकाले पक्राउ गरिएको जानकारी दिए । ‘पक्राउ दौलतले पीडित महिलालाई विभिन्न प्रलोभन देखाएर ललितपुरमा जबर्जस्ती करणीसमेत गरेको अनुसन्धानमा खुलेको छ,’ उनले भने ।

पक्राउ रेवतीले ती महिलालाई भारतमा डान्सको काम लगाइदिने प्रलोभन देखाएर वीरगञ्जबाट भारतको रक्सौल पुर्‍याएर डान्समा काम गर्न लगाएको अवस्थामा भारतीय प्रहरीको सहयोगमा माइती नेपालले नेपाल फिर्ता ल्याएको ब्यूरोले जनाएको छ ।

यसैगरी, भरतमणिले दुबईमा कम्पनीको प्याकिङसम्बन्धी काममा लगाइदिने भनी प्रलोभनमा पारेर काठमाडौं विमानस्थलबाट दुबई भनी कुवेतको घर मालिकलाई पाँच हजार कुवेत दिनारमा बिक्री गरेको खुल्न आएको प्रवक्ता मल्लले बताए । पक्राउ परेका तीनै जनालाई जिल्ला अदालत काठमाडौंको आदेशअनुसार कारागार पठाइएको ब्यूरोले जनाएको छ ।

न्युजिल्याण्ड पठाइदिने भन्दै ठगी गर्ने महिला पक्राउ

न्युजिल्याण्ड पठाइदिने भन्दै विभिन्न व्यक्तिसँग ६३ लाख २० हजार ठगी गर्ने एक महिलालाई प्रहरीले पक्राउ गरेको छ ।

प्रहरीको काठमाडौं उपत्यका अपराध अनुसन्धान कार्यालय मीनभवनबाट खटिएको प्रहरी टोलीले न्युजिल्याण्ड पठाइदिन्छु भनी रकम ठगी गरेको अभियोगमा बूढानीलकण्ठ नगरपालिका–३ घुम्ती बस्ने नुवाकोट विदुर नगरपालिका–७ घर भएकी दिया भन्ने २७ वर्षीया शोभा पौडेललाई पक्राउ गरी आज सार्वजनिक गरेको हो ।

पक्राउ शोभाले न्युजिल्याण्डको प्रतिष्ठित कृषि कम्पनीमा फ्रुट किपिङको काम लगाइदिन्छु भनी प्रतिव्यक्ति १२ लाख ५० हजार खर्च लाग्छ भनी नौ व्यक्तिसँग ६३ लाख २० हजार ठगी गरेको प्रहरीले जनाएको छ । उनलाई प्रहरीले बूढानीलकण्ठ नगरपालिकास्थित कपनको नीलोपुलबाट पक्राउ गरेको हो ।