बजार बढ्दा ६ महिनामा ७ खर्ब कमाएका लगानीकर्ताले घट्दा ६ महिनामै गुमाए १० खर्ब रुपैयाँ

बजार बढ्दा ६ महिनामा ७ खर्ब कमाएका लगानीकर्ताले घट्दा ६ महिनामै गुमाए १० खर्ब रुपैयाँ

A+ A A-

शेयरबजारमा कहिले नाफा त कहिल घाटा भइनै रहन्छ । लगानीकर्ताले कमाउनु र गुमाउनु नै शेयरबजारको विशेषता हो । यसमा लगानीकर्ताले नेप्से बढ्दा सामान्य समयभन्दा धेरै नाफा कमाउँछन् भने घट्दा बाठा लगानीकर्ताले मात्रै कमाउँछन् या दुवैले भएको सम्पत्ति पनि गुमाउँछन् ।

६ महिनायता शेयरबजार निरन्तर ओरालो यात्रामा छ । बीचकाे केही समयमा फाट्टफुट्ट बजार बढ्ने गरे पनि पछिल्लो ६ महिनायताको समग्र स्थिति हेर्दा बजार वियरिस ट्रेण्डमा गएको प्रस्टै देखिन्छ । सामान्यतया नेप्से सूचक २० प्रतिशतले खस्नुलाई वियरिस ट्रेण्ड सुरु भएको मान्ने गरिए पनि अहिले २० प्रतिशतभन्दा धेरैले नेप्से घटिसकेको छ ।

तैपनि वियरिस भन्ने कि बुलिस बजारकै करेक्सन भन्नेबारे अन्याेल सिर्जना भइरहँदा लगानीकर्ताले छोटो समयमा १० खर्ब रुपैयाँ गुमाएका छन् । कारण २०२२ जनवरीमा २९९५ अंकमा पुगेको नेप्सेमा ३९ खर्बको बजार पुँजीकरण थियो । त्यसपछि क्रमश: फागुनमा ३७ खर्ब, चैतमा ३४ खर्ब र बैशाखमा ३३ खर्ब, जेठमा २८ खर्ब र असारको २२ गतेसम्म अधिकतम २९ खर्बको बजार पुँजीकरण छ ।

गत वर्षको माघमा देखिएको औसत बजार पुँजीकरणसँग असारमा देखिएको औसत बजार पुँजीकरणबापतको रकम घटाएमा ६ महिनामा लगानीकर्ताले गुमाएको रकम निस्कन्छ । यसरी सो अवधिमा लगानीकर्ताले १० खर्ब रुपैयाँ गुमाएको देखिन्छ ।

कमाउनेमा पनि ठीक यही फर्मुला प्रयोग हुन्छ । जस्तो २०७७ चैतबाट २०७८ भदौसम्मको ६ महिने बुलिस अवधिमा लगानीकर्ताले ७ खर्ब रुपैयाँ कमाएको देखिन्छ ।

यसलाई यसरी बुझौँ, २०७७ साल चैत र वैशाख महिनामा बजारको पुँजी ३७ खर्ब थियो, जेठमा ४२ खर्ब, असारमा ४० खर्ब, साउनमा ४४ खर्ब र भदौमा ३९ खर्ब रुपैयाँ छ । यो अवधिमा बजार पुँजीकरण अधिकतम ४४ खर्बमा र न्यूनतम ३७ खर्ब घटाउँदा लगानीकर्ताले जम्मा ७ खर्ब कमाएको देखिन्छ ।

बढेको बजारमा कमाएको रकमभन्दा घटेको बजारमा गुमाएको रकम ३ खर्बले बढि भइसकेको हो । यसर्थ पनि यसपालिको बजारमा समग्र लगानीकर्ता घाटामा छन् भन्दा फरक नपर्ला । सम्पत्ति घटेसँगै नेप्से सूचक अधिकतम विन्दुबाट ११ सय अंकले तल र अधिकतम कारोबार रकम २२ अर्बबाट २ अर्बमा झरिसकेको छ । बजार पुँजीकरण पनि अधिकतम ४४ खर्बबाट घटेर २८ खर्बमा आइपुगेकाे छ ।

प्रकाशित मिति: बुधबार, असार २२, २०७९ १७:३३