उपभाेक्ता समितिलाई काम नदिने झाँक्रीकाे निर्णय मेटमणिले उल्ट्याइदिए

A+ A A-

उपभोक्ता समितिमार्फत हुने विकास निर्माणको काम रोक्ने तत्कालीन मन्त्री रामकुमारी झाँक्रीको निर्णय उनीपछि शहरी विकासमन्त्री बनेका मेटमणि चौधरीले उल्ट्याइदिएका छन् । भ्रष्टाचार बढेको दाबी गर्दै झाँक्रीले गत मंसिरमा उपभोक्ता समितिमार्फत विकास निर्माणका काम रोक्ने निर्णय गरेकी थिइन् ।

भ्रष्टाचार हुने, समयमै काम नसकिने र भएका काम पनि गुणस्तरहीन रहेका भन्दै झाँक्रीले उपभोक्ता समितिलाई रोक लगाउने निर्णय गरेकी थिइन् । तर उनीपछि आएका शहरी विकासमन्त्री चौधरीले भने झाँक्रीले गरेकाे निर्णय उल्ट्याउँदै फेरि उपभोक्ता समितिमार्फत नै काम गर्न दिने निर्णय गरेका छन् ।

शहरी विकास मन्त्रालयले सर्वोच्च अदालतको अन्तरिम आदेश भन्दै निर्माणका काम उपभोक्ता समितिमार्फत गराउन भवन विभागलाई पत्र पठाइसकेको छ । सर्वोच्चको आदेश अनुसार उपभोक्ता समितिलाई काम सुम्पिने निर्णय गरिएको मन्त्री चौधरीले बताए । यसअघि मन्त्रालयले गरेको निर्णय तत्काल लागू नगर्नू, नगराउनू भनेर सर्वोच्चले आदेश गरेकोले पनि काम रोक्का गर्ने निर्णय रद्द गर्नुपरेको उनकाे दाबी छ ।

उपभाेक्ता समितिमार्फत हुने काममा व्यापक भ्रष्टाचार हुने गरेकाे छ । समितिमा दलका कार्यकर्ताकाे हालीमुहाली हुने गरेकाे छ । कमिसनकाे खेलमा विकासे कामलाई कमजाेर र गुणस्तरहीन पार्ने गरिएकाे छ । चुनावकाे मुखमा कार्यकर्ताकाे पालनपाेषण गर्नुपर्ने भएका कारण पनि उपभाेक्ता समितिलाई काम राेक्ने निर्णय फिर्ता लिन मन्त्री चाैधरीलाई दबाब थियाे ।

दबाब थेग्न नसकेरै उनले आफ्नै पार्टीका पूर्वमन्त्रीले गरेकाे निर्णय उल्ट्याउनु परेकाे चर्चा छ। झाँक्री र चाैधरी नेकपा एकीकृत समाजवादीबाट आलाेपालाे मन्त्री बनेका हुन् ।