समितिमा एमालेले भाग पाएपछि सर्वसम्मतिले पारित भयो हेटौँडा उपमहानगरको बजेट

समितिमा एमालेले भाग पाएपछि सर्वसम्मतिले पारित भयो हेटौँडा उपमहानगरको बजेट

A+ A A-

हेटौँडा उपमहानगरपालिकाले आगामी आर्थिक वर्ष २०७९/८० का लागि प्रस्तुत गरेको बजेट कार्यपालिकाबाट सर्वसम्मतिले पारित भएको छ ।

सोमबार बसेको नगर कार्यपालिका बैठकले २ अर्ब ७१ करोड ७९ लाख रूपैयाँको अनुमानित आयव्यय सर्वसम्मतिले पारित भएको प्रवक्ता सविन न्यौपानेले जानकारी दिए । पूर्वाधार विकासतर्फ १ अर्ब ८ करोड ४२ लाख, आर्थिक विकासतर्फ १९ करोड ६९ लाख, सामाजिक विकासतर्फ ६६ करोड १५ लाख, स्वास्थ्यतर्फ ९ करोड ५३ लाख, युवा तथा खेलकुदतर्फ ३ करोड ७३ लाख, महिला तथा बालबालिकाका लागि ३ करोड ५८ लाख बजेट बिनियोजन गरिएको थियो ।

उपमहानगरले वातावरण तथा विपद् व्यवस्थापनतर्फ १२ करोड ६ लाख, संस्थागत विकास र सेवा प्रवाहतर्फ ७ करोड ३३ लाख, विविध शीर्षकमा ९९ लाख रूपैयाँ बजेट विनियोजन गरेको थियो । यसअघि १० असारमा एघारौँ नगरसभाको पहिलो बैठक नेकपा एमालेका नगरसभा सदस्यहरूले समिति गठनमा नगर प्रमुखले एकलौटी गर्न खोजेकोलगायतका आरोप लगाउँदै बहिष्कार गरेपछि उपमहानगरले बजेट प्रस्तुत गर्न सकेको थिएन ।

कानुनतः नगरसभामा ५१ प्रतिशत नगरसभा सदस्यको उपस्थितिपश्चात मात्रै नीति तथा कार्यक्रम र बजेट प्रस्तुत गर्नुपर्ने प्रावधान छ । तर, ९५ सदस्यीय नगरसभमा गठबन्धनका ४० जना सदस्यको मात्रै उपस्थिति थियो । हेटौँडा उपमहानगरपालिकाको नगरसभा र कार्यपालिकामा नेकपा एमालेको बहुमत छ ।

एमालेको नेतृत्वसँग असमझदारीका कारण बजेट प्रस्तुत हुन नसकेपछि नगर प्रमुख मिनाकुमारी लामाले १३ असारमा एघारौँ नगरसभाको दोस्रो बैठक बोलाएकी थिइन् । बैठकअघि एमालेका सदस्यसँग तीन बुँदे सहमति भएपछि आगामी आर्थिक वर्षको लागि बजेट प्रस्तुत भएको थियो ।

उक्त सहमतिअनुसार आज सोमबार नगर कार्यपालिका बैठकले पाँच वटा समिति बनाएको छ । जसमध्ये चार वटा समितिमा एमालेबाट निर्वाचित वडाध्यक्षहरूलाई जिम्मेवारी तोकिएको छ । समितिमा एमालेका वडाध्यक्षहरूलाई चयन गरेपछि सोमबार आगामी आर्थिक वर्षका लागि प्रस्तुत नीति तथा कार्यक्रम र बजेट कार्यपालिकाबाट सर्वसम्मतिले पारित भएको हो ।

उपमहानगरको आयोजना तथा कार्यक्रमलाई विषय क्षेत्रगत रूपमा छलफल, विश्लेषण र प्राथमिकता निर्धारण गरी पेस गर्न पाँच वटा समिति बनाइएको प्रवक्ता न्यौपानेले जानकारी दिए । आर्थिक विकास समितिमा अनिल बानियाँ, सामाजिक विकास समितिमा रामकृष्ण कोइराला, पूर्वाधार विकास समितिमा दीपक खड्का, वातावरण तथा विपद् व्यवस्थापन समितिमा फूर्वादोर्जे लामा, संस्थागत विकास र सुशासन समितिमा सुनिल मोक्तानलाई संयोजक तोकिएको छ । जसमध्ये सामाजिक विकास समितिमा संयोजक कोइराला कांग्रेसबाट निर्वाचित वडाध्यक्ष हुन् भने बाँकी सबै एमालेबाट निर्वाचित वडाध्यक्ष हुन् ।

यसैगरी, कार्यपालिका बैठकले वृत्ति विकास सम्बन्धी विशेष ऐन, २०७५ खारेज गरी नयाँ कानुन तर्जुमा गर्ने निर्णय गरेको प्रवक्ता न्यौपानेले जानकारी दिए । कार्यपालिकाले उपप्रमुख राजेश बानियाँको संयोजकत्वमा न्यायिक समिति गठन गरेको छ । समिति सदस्यमा ५ नम्बर वडाका वडा सदस्य ज्ञानबहादुर थापा र ७ नम्बर वडाका वडा सदस्य सन्तु पाख्रिन सदस्य चयन भएका छन् ।

प्रकाशित मिति: सोमबार, असार २०, २०७९ २०:२७