स्याम्पु किन्दा १ अर्ब विदेशियो, ४३ करोडको बडी लोसन आयात

A+ A A-

देशभित्र विदेशी मुद्राको सञ्चिति घट्दै गइरहेको विवरण हरेक दिनजसो चर्चामा आइरहेको छ । संसद्‌देखि नागरिकस्तरमा पनि यसबारेमा नियमित रूपमा चर्चा भइरहेको छ । नेपाल राष्ट्र बैंकले हरेक महिना सार्वजनिक गर्ने आर्थिक विवरणमा समेत विदेशी मुद्राको सञ्चिति घटेको देखाइन्छ ।

तर, राम्रो देखिनका लागि आयात गरिएको सौन्दर्यका सामग्रीको मात्रा हरेक महिना वृद्धि भएको पाइएको छ । ती सामानको आयातमा मात्रै अर्बौं बराबरको रकम विदेशिएको छ । भन्सार विभागको तथ्याङ्कअनुसार ओठको शृङ्गारका सामग्रीको आयातमा मात्रै ३० करोड ८३ लाख ५१ हजार रकम बाहिरिएको छ ।

विशेषगरी महिलाले प्रयोग गर्ने लिप्स्टिकलगायतका सामग्रीको आयातमा उक्त परिमाणको रकम बाहिरिएको हो । चालु आर्थिक वर्षको जेठ मसान्तसम्म कुल २ लाख ३७ हजार ४२९ केजी बराबरको ओठ राम्रो बनाउने सौन्दर्यका सामग्री आयात भएको छ । ती सामग्रीको आयात गर्दा सरकारले ११ करोड ३७ लाख ७८ हजार राजस्व सङ्कलन गरेको छ । भारतबाट मात्रै १२ करोड ५९ लाख ५३ हजार मूल्यबराबरको करिब ४० हजार ७६३ केजी लिप्स्टिकलगायतका सामग्री आयात भएको छ ।

त्यस्तै, चीनबाट १ लाख ९० हजार ६८७ केजीबराबरको सामग्री ११ करोड ६० लाख ४८ हजार मूल्यमा आयात भएको छ ।

यस्तै, आँखाको शृङ्गारमा प्रयोग हुने सामानको आयातका लागिसमेत निकै रकम खर्च भएको छ । ती सामानको आयातका लागि २२ करोडभन्दा बढी रकम विदेशिएको छ । चालु आर्थिक वर्षको ११ महिनामा ९६ हजार ५३ केजी बराबरको त्यस्ता वस्तु आयात भएका छन् । जसका लागि २२ करोड ८१ लाख ९७ हजारबराबर रकम बाहिरिएको छ । यसबाट राज्यले ८ करोड ६४ लाख ६५ हजार राजस्व सङ्कलन गरेको छ । आँखा सजावटका सामान भारतबाट मात्रै १० करोड ५६ लाख २६ हजार मूल्यबराबरको कुल ६ हजार ६२९ केजी परिमाणमा आयात भएको छ ।

त्यस्तै, चीनबाट ६ करोड ९९ लाख २७ हजारमा ७८ हजार ३५३ केजी आयात भएका छन् । त्यस्ता वस्तु इटाली, कोरिया, लक्जेम्वर्ग, अमेरिका, पोल्याण्डलगायत देशबाट आयात हुने गरेको विभागले सार्वजनिक गरेको विवरणमा छ ।

त्यस्तै, मेकअपका अर्को सामानका रूपमा रहेको क्रिम पाउडरको आयातमा समेत करोडौँ रकम खर्च हुने गरेको छ । विभागका अनुसार चालु आर्थिक वर्षको जेठ मसान्तसम्ममा ९३ करोड ४९ लाख ९६ हजारका क्रिम पाउडर आयात भएको छ, जसबाट सरकारले ३५ करोड २९ लाख ८० हजारबराबरको राजस्व सङ्कलन गरेको छ ।

यस अवधिमा विभिन्न मुलुकबाट ४ लाख १७ हजार दुई केजी पाउडर खरिदका लागि २८ करोड ६६ लाख ४२ हजार मूल्य विदेशिएको छ । यो अवधिमा अनुहारमा लगाउने क्रिममात्रै ६४ करोड ८३ लाख ५५ हजार मूल्यमा २ लाख ६२ हजार ७२५ केजी मुलुकमा भित्रिएको छ ।

विभागका अनुसार यस अवधिमा २४ हजार ४१८ लिटर नङमा लगाउने ‘नेलपोलिस’ आयात भएको छ । ११ महिनामा नेपालीले ५ करोड ९ लाख २३ हजार मूल्य खर्च गरेर नेलपोलिस आयात गरेका छन् । मुख्यगरी त्यस्ता पोलिस चीन, भारत, कोरिया, क्यानडालगायतका मुलुकबाट आयात हुने गरेको पाइएको छ । यस अवधिमा चीनबाट २ करोड ५८ लाख ४१ हजार तथा भारतबाट २ करोड ३९ लाख १८ हजारबराबरको नेलपोलिस आयात भएको छ ।

४३ करोडभन्दा बढीको बडी लोसन

विभागको विवरणअनुसार जेठ मसान्तसम्म ४३ करोड ५७ लाख ५२ हजार मूल्यमा ५ लाख ७ हजार ५८८ केजी लोसन आयात भएको छ । त्यसबाट सरकारले १६ करोड ३३ लाख ६४ हजार राजस्व सङ्कलन गरेको छ ।

भारतबाट मात्रै ३१ करोड ४२ लाख ६८ हजार मूल्यमा २ लाख ८४ हजार २०२ केजी बराबरको लोसन आयात भएको छ । त्यस्तै थाइल्यण्डबाट ५ करोड ७६ लाख ४५ हजार, इन्डोनेसियाबाट २ करोड ६२ लाख ३५ हजार मूल्यबराबरका लोसन आयात भएका छन् ।

महिलाले प्रयोग गर्ने सिन्दुरको आयातमा समेत लाखौँ खर्च हुने गरेको छ । ११ महिनामा ९८ लाख १५ हजार मूल्यबराबरको ४५ हजार ८०७ केजी सिन्दुर आयात भएको छ । सिन्दुर मुख्यगरी भारतबाट आयात हुने गरेको छ । विभागका अनुसार भारतबाट ९७ लाख ९२ हजार बराबरको सिन्दुर आयात भएको छ । त्यस्तै, शृङ्गारका अन्य समानको आयातमा २ अर्ब ८९ करोडभन्दा बढी रकम विदेशिएको छ ।

स्याम्पु आयातमा १ अर्ब विदेशियो

हामीले नुहाउँदा प्रयोग गर्ने स्याम्पु आयातमा अर्बौं विदेशिने गरेको विवरण सार्वजनिक भएको छ । चालु आर्थिक वर्षको ११ महिनामा १ अर्ब ८ करोड १० लाख ५४ हजार बराबरको रकम स्याम्पु आयातमा खर्च भएको छ । करिब ५७ लाख ८० हजार लिटर स्याम्पु आयातमा उक्त रकम विदेशिएको हो ।

स्याम्पुको आयातबाट सरकारले भने ४६ करोड ४७ लाख ९० हजार राजस्व जम्मा गरेको छ ।

कपाल रङ्गाउनकै लागि प्रयोग हुने सामग्रीको आयातमा ५० करोड ५१ लाख २९ हजारबराबरको रकम मुलुक बाहिर गएको छ । ११ महिनाको अवधिमा कुल ७ लाख ५८ हजार ७२६ केजी यस्ता रङ आयात भएको छ भने कपालमा लगाउने क्रिमका लागि ६ करोड १७ लाख ६६ हजार बराबरको रकम मुलुकबाहिर गएको छ ।

प्रकाशित मिति: सोमबार, असार २०, २०७९ १६:२२