जिउँदा पशुपन्छी किन्न पौने २ अर्ब बाहिरियो : चीनबाट २२० भेडा, भारतबाट ५० हजार बाख्रा आयात

जिउँदा पशुपन्छी किन्न पौने २ अर्ब बाहिरियो : चीनबाट २२० भेडा, भारतबाट ५० हजार बाख्रा आयात

A+ A A-

नेपालले चालु वर्षमा जिउँदा पशुपन्छी किन्नका लागि १ अर्ब ७१ करोड ६० लाख १६ हजार रुपैयाँ खर्च गरेको छ ।

विश्‍वका ४७ देशबाट नेपालमा पशुपन्छी आयात हुने गरेको छ । ठूलो मात्रामा व्यावसायिक बिक्रीवितरणका लागि पशुपन्छी आयात गरिए पनि नश्‍ल सुधारको नाममा आयातित पशुपन्छीको संख्या समेत बढेको छ ।

चालु वर्षको ११ महिनामा चराचुरुङ्गीसहितका अन्य पशुपन्छी गरी नेपालले ९ लाख ८१ हजार ८४५ वटा आयात गरेको छ । यी पशुपन्छी भित्र्याउने क्रममा सरकारलाई ५ करोड २५ लाख भन्सार राजस्व उठेको छ ।

कहाँबाट के आउँछ ?

श्रीलंका, पाकिस्तानदेखि युरोप, अमेरिका र अस्ट्रेलियासम्म गरी नेपालले ४७ राष्ट्रबाट पशुपन्छी आयात गरेको छ ।

भारत/चीन

पशुपन्छी आयातको हिस्सा हेर्ने हो भने सबैभन्दा बढी भारतबाट आयात भएको छ । तर, भारतबाट आयात भएकोमा ९९ प्रतिशत बोकाबाख्रा रहेका छन् । यो अवधिमा भारतबाट ५० हजार ७ सय ८८ बोकाबाख्रा आयात भएको छ । यसका लागि ४५ करोड ४७ लाख ३८ हजार रुपैयाँबराबरको आयात भएको छ । बाख्रा आयातबाट ४ करोड ९ लाख ४५ हजार राजस्व उठेको छ । १९ हजार रुपैयाँबराबरका ५० वटा अन्य जनावर पनि भारतबाट आयात भएको छ ।

छिमेकी देश चीनबाट भने भेडा मात्रै आयात भएको छ । यो अवधिमा चीनबाट २२० भेडा आयात भएको छ । जसको लागत १३ लाख १२ हजार देखाइएको छ । यस हिसाबले एउटा जिउँदो भेडा किन्नका लागि ५९ सय ६३ रुपैयाँ पर्न गएको छ ।

अमेरिका/अस्ट्रेलिया

नेपालले धेरै पशुपन्छी आयात गर्ने देशमा अमेरिका पर्छ । नेपालले अमेरिकाट २३ करोड ४१ लाख ९१ हजार रुपैयाँबराबरका पशुपन्छी आयात गरेको छ ।

अमेरिकाबाट ठूलो मात्रामा ग्यालासुस जातका चराहरू आयात भएका छन् । यस्ता ४९ हजार चरा आयात गर्न नेपालले २२ करोडभन्दा बढी रकम खर्च गरेको छ ।

नश्‍ल सुधारका लागि सातवटा गोरु किन्न ९२ लाख ६६ हजार लागत लागेको छ । त्यस्तै, अन्य १५ वटा पशुपन्छी आयात भएको छ ।

अस्ट्रेलियाबाट पनि ग्यालासुस नाममा चराहरू आयात भएका छन् । यस्ता ३८ हजार ८ सय चरा आयात गर्दा साढे ३ करोड रुपैयाँ बाहिरिएको छ ।

यसबाहेक नेपालले क्यानडा, फ्रान्स, हंगेरी, मलेसिया, न्युजिल्यान्ड, थाइल्यान्ड, दुबई, साउदी, अस्ट्रिया, बंगलादेश, ब्राजिल, क्यानडा, डेनमार्क, फ्रान्स, ग्रीक, जापान, इटाली, कुवेत, नाइजेरिया, नेदरल्यान्ड, प्रचसगल, पोल्यान्ड, नाइजेरिया, कतार, श्रीलंका, पाकिस्तान, बंगलादेशलगायतका ४३ देशबाट ९७ करोड रुपैयाँबराबरको पशुपन्छी आयात गरेको छ ।

प्रकाशित मिति: सोमबार, असार २०, २०७९ १२:५४