नेपाली बजारमा भित्रियो चेरी टिग्गो ७ प्रो, यस्ता छन् विशेषता

A+ A A-

नेपालमा चेरी कारको आधिकारिक वितरक एसपीजी अटोमोबाइल्स प्रालिले चेरी टिग्गो ७ प्रो सार्वजनिक गरेको छ । यसमा भएको १.५ लिटर टर्बो पेट्रोल इन्जिनले १४७ पीएस पावर र २१० एनएम टर्क जेनेरेट गर्छ ।

सो इन्जिन ९ स्पिड सीभीटी गियरबक्ससँग जोडिएको छ । यसले गर्दा सुस्त र तीव्र दुवै स्पिडमा लगातार रूपमा उच्च पावर प्रदान गर्छ ।

यो लेदर सिटसहितको ब्ल्याक–बेज थिममा आधारित क्याबिन छ । फ्रन्टमा सिक्स–वे इलेक्ट्रिकल्ली एड्जस्टेबल ड्राइभिङ सिट छ भने प्यासेन्जर सिट फोर–वे इलेक्ट्रिकल्ली एड्जस्टेबल छ । यसमा प्यानोरामिक सनरुफ पनि दिइएको छ ।

टिग्गो ७ प्रोमा ७ इन्च इन्स्ट्रुमेन्ट क्लस्टर, १०.२५ इन्चको एचडी सेन्ट्रल कन्ट्रोल र एसी टचस्क्रिनसहितको ड्यासबोर्ड छ । यो गाडीमा ब्लुटुथ कनेक्टिभिटी, फिङ्गरटिपबाटै कन्ट्रोल गर्न सकिने क्रुज कन्ट्रोल र इन्टेलिजेन्ट भ्वाइस कन्ट्रोलजस्ता विभिन्न अत्याधुनिक प्रविधिहरू रहेका छन् ।

यसमा फोर एड्जस्टमेन्ट सेटिङ गर्न सकिने मल्टी फङ्क्सन स्टेयरिङ ह्विल छ भने वायरलेस चार्जरसमेत उपलब्ध छ । यसमा भएको ३६० डिग्री क्यामेराको प्रयोग गरी गाडीको चारैतिरको अवस्था थाहा पाउन सकिन्छ भने ब्याकअप क्यामेराका कारण पार्किङ सहज हुन्छ ।

यस गाडीमा भएका ६ एयरब्याग, ईबीडी र बीएसहितको एबीएस, ईएसपी, टीसीएस, एचएसी, एचडीसी आदिले ड्राइभिङलाई सुरक्षित बनाउने कम्पनीको दाबी छ । नेपाली बजारमा टिग्गो ७ प्रोको मूल्य ७४ लाख ९९ हजार रुपैयाँ तोकिएको छ ।

प्रकाशित मिति: आइतबार, असार १९, २०७९ १९:५६