किन रोकियो परीक्षणकालीन लाइसेन्स वितरण ?

A+ A A-

गत वर्ष यातायात व्यवस्था विभागले परीक्षार्थीलाई ट्रायल पास गरेर राजस्व बुझाएपछि तुरुन्त अस्थायी लाइसेन्स दिने योजना बनायो ।

सवारी तथा यातायात ऐन २०४९ को दफा ५० मा सुरुमा एक वर्षको परीक्षणकाल रहने प्रावधान छ । चालकले एक वर्षको अवधिमा पाँचपटकभन्दा धेरै गल्ती नगरे स्थायी लाइसेन्स दिइने विभागले जनाएको थियो ।

सस्तो पीभीसी कार्ड प्रयोग गरिएको अस्थायी लाइसेन्सलाई ट्राफिक प्रहरीले क्यूआर कोडमार्फत तुरुन्त जाँच गर्न सक्ने हुँदा नक्कली लाइसेन्सको सम्भावना कम हुने विभागको विश्वास थियो । त्यस्तै, यसमा इन्टरनेट नभएको अवस्थामा यसको होलोग्राम र यूभी लाइट डिटेक्टरले सक्कली वा नक्कली तुरुन्तै पत्ता लगाउन सकिने फिचर पनि थियो ।

योजनाअनुरुप विभागले केही यातायात कार्यालयहरूलाई प्रिन्टर र केही कार्ड पनि उपलब्ध गराएको थियो । तर, हाल परीक्षणकालीन लाइसेन्स वितरणमा रोक लगाइएको छ ।

प्रदेश मन्त्रालयले मौखिक रूपमा अस्थाई कार्ड रोक्न भनेपछि रोकिएको यातायात व्यवस्था कार्यालय, सवारीचालक अनुमतिपत्र, एकान्तकुनाका कार्यालय प्रमुख अच्युतराज रेग्मीले बताए ।

‘विभागले मेसिन र १ हजार कार्ड पठाएको थियो । हामीले थप ६ हजार कार्ड पनि खरिद गर्‍यौँ । ७० प्रतिशत अंक ल्याए ट्रायल पास हुने व्यवस्था लागू नभएपछि मन्त्रालयले नै अस्थाई परीक्षणकालीन लाइसेन्स रोक्न भन्यो,’ उनले भने ।

प्रदेश सरकारले बजेट छुट्याएका कारण अस्थाई लाइसेन्स वितरण रोकिएको यातायात व्यवस्था कार्यालय, सवारीचालक अनुमतिपत्र ठूलो भर्‍याङका सूचना अधिकारी बद्रीप्रसाद निरौलाले बताए ।

‘विभागले दिएको ७ हजार कार्ड बाँडिसक्यौँ । विभागले थप कार्ड पठाएन र प्रदेश सरकारले बजेट दिएन । त्यस कारण अहिले अस्थाई कार्ड वितरण कार्य रोकिएको छ,’ उनले भने ।

अनावश्यक खर्च बढेका कारण परीक्षणकालीन लाइसेन्स वितरण रोकिएको श्रम, रोजगार तथा यातायात मन्त्रालयका उपसचिव हरिहर पोख्रेलले बताए । ‘पहिले स्मार्ट लाइसेन्स आउनै १ वर्षभन्दा धेरै लाग्ने अवस्था थियो । अहिले दुई/तीन महिनामै आउँछ । अब दुई/तीन महिनाका लागि किन अनावश्यक खर्च बढाउने भन्ने हाम्रो सोच हो । त्यही पनि हामी यो विषयमा छलफल गर्दैछौँ,’ उनले भने ।

विभागले ऐनमै भएको कुरा लागू गरेको र हेर्दा प्रस्ट रूपमा नयाँ चालक भनेर चिनिने भएकाले १ वर्षअगाडि विभागले छुट्टै परीक्षणकालीन लाइसेन्स लागू गरेको यातायात व्यवस्था विभागका सहायक सूचना अधिकारी अर्जुन अधिकारी बताउँछन् ।

‘हामीले त अप्सन दिने हो । लागू गर्ने/नगर्ने सर्वाधिकार प्रदेश मन्त्रालयलाई नै छ,’ उनले भने । परीक्षणकालीन लाइसेन्स वितरणमा रोक लगाइएपछि सवारीचालक लाइसेन्सको सट्टा कागजकै भरमा हिँड्नुपर्ने अवस्था देखिएको छ ।

मन्त्रालयले दुई/तीन महिनामा लाइसेन्स आउने भने पनि अझै त्यस्तो सहज स्थिति नभएको विभागका एक कर्मचारीले बताए । अस्थायी लाइसेन्स लागू गर्नुअघि सेवाग्राहीले लाइसेन्स पाउन १ वर्षभन्दा लामो समय कुर्नुपर्ने बाध्यता थियो ।

प्रकाशित मिति: आइतबार, असार १९, २०७९ १८:४७