श्रममन्त्री कुँवर मन्त्रालयको काम छाडेर फूलमाला थाप्न व्यस्त

A+ A A-

यही १३ असारमा श्रम, रोजगार तथा सामाजिक सुरक्षा मन्त्रालयको जिम्मेवारी सम्हाल्न एकीकृत समाजवादीका नेता शेरबहादुर कुँवर आए ।

उनलाई समाजवादीले निवर्तमान श्रममन्त्री कृष्णकुमार श्रेष्ठको ठाउँमा पठाएको थियो । श्रममन्त्री कुँवरले श्रम मन्त्रालयको जिम्मेवारी सम्हालेको एक साता पुगेको छ ।

असार १३ गतेयता श्रममन्त्री कुँवर मन्त्रालयको कामभन्दा पनि आफ्नै पार्टीका नेता कार्यकर्ता, विभिन्न संघसंस्थाका प्रतिनिधि र वैदेशिक रोजगार व्यवसायीहरूसँग भेटेर बधाई लिन व्यस्त छन् ।

श्रममन्त्रीको सचिवालयका अनुसार श्रममन्त्री कुँवरले एक सातामा ११ वटा कार्यक्रममा बधाई लिन सफल भएको र १४ वटा विभिन्न संस्थाका प्रतिनिधिहरूबाट बधाई लिएका छन् ।

श्रम मन्त्रालयस्तरीय धेरै योजना, बजेट, रोजगारसम्बन्धी छलफल र अन्य महत्त्वपूर्ण विषयमा छलफल पनि नभएको श्रम मन्त्रालयकै एक कर्मचारीले शिलापत्रलाई जानकारी दिए ।

बेलायतसँग श्रम सम्झौता गत साता हुने गरी छलफल भएको थियो । साथै, इजरायल, दक्षिण कोरियालगायत केही रोजगारदाता देशसँग पनि गत साता नै छलफल गर्ने भनिए पनि मन्त्रीको व्यस्तताका कारण रोकिएको ती कर्मचारीले बताए ।

वैदेशिक रोजगारी, आन्तरिक रोजगारी, रोजगारीका नाममा भइरहेको ठगी नियन्त्रण, विभिन्न देश मौसमी कामदार पठाउने विषयमा छलफल र घरेलु महिला कामदार पठाउने विषयमा समेत छलफल रोकिएको मन्त्रालय स्रोतले जनाएको छ ।

रोकिएका कामदार इजरायल रोजगारीमा कसरी पठाउने भन्ने विषयमा समेत छलफल नभएको स्रोतको भनाइ छ । पछिल्लो समय आधा दर्जन देशसँग श्रम सम्झौताका लागि छलफल चलिरहेको र केही देशसँग श्रम सम्झौताका प्रक्रिया अगाडि बढे पनि श्रममन्त्री फेरबदल हुँदा त्यसको प्रभाव परेको श्रम मन्त्रालयले जनाएको छ ।

मलेसिया जाने कामदारमाथि स्वास्थ्यका नाममा ठगी, म्यानपावरले लागत खर्चका नाममा ठगी र अन्य देश जाने कामदारमाथि आर्थिक ठगी भइरहे पनि श्रममन्त्री फेरिएका कारण वैदेशिक रोजगार विभागले कुनै एक्सन लिन सकेको छैन ।

श्रममन्त्री फेरिएसँगै वैदेशिक रोजगारमा भइरहेको ठगी र अन्य विषयमा कसरी अगाडि बढ्ने भन्ने विषयमा छलफल हुन्छ । तर, श्रममन्त्री व्यस्त भएका कारण यो विषयमा पनि छलफल नभएको विभागका कर्मचारीहरू बताउँछन् ।

प्रकाशित मिति: आइतबार, असार १९, २०७९ १९:५१