निजगढ पुगेर गठबन्धनका नेताको सन्देश- अन्तर्राष्ट्रिय विमानस्थल यहीँ बन्छ

A+ A A-

प्रधानमन्त्री शेरबहादुर देउवासहित सत्तारुढ गठबन्धनका शीर्ष नेताहरू शनिबार एकाएक बाराकाे निजगढ पुगे । स्थानीय चुनावअघि काठमाडौंबाहिर एउटै मञ्चमा देखिएका गठबन्धनका नेताहरू आगामी निर्वाचनमा यही तालमेल रहला वा नरहला भन्ने आशंकाका बीच शनिबार टोली नै बनाएर निजगढ पुगेका हुन् ।

निजगढमा प्रस्तावित दोस्रो अन्तर्राष्ट्रिय विमानस्थल निर्माणाधीन छ । करिब ३ अर्ब रुपैयाँभन्दा बढी खर्च भइसकेपछि अदालतले अहिलेसम्मका सबै प्रक्रिया रद्द गर्ने आदेश दिएको छ । न्यायाधीश हरिकृष्ण कार्की, विश्वम्भरप्रसाद श्रेष्ठ, ईश्वरप्रसाद खतिवडा, प्रकाशमान सिंह राउत र मनोजकुमार शर्माको बृहत पूर्ण इजलासले निजगढमा विमानस्थल नबनाउने आदेश गरेको हो ।

निजगढमा विमानस्थल बनाउन २४ लाखभन्दा बढी रुख काट्नुपर्ने अध्ययनले देखाएकाे थियाे । वातावरण अभियन्ताहरूले निजगढमा विमानस्थल बनाउन नहुने माग गर्दै सर्वोच्च अदालतमा रिट हालेका थिए । निजगढमा विमानस्थल बनाउँदा पर्यावरणमा ठूलो क्षति पुग्ने बताउँदै सर्वोच्चले विमानस्थल नबनाउन आदेश गरेको हो ।

यस विसमा सरकार र संसद्का साथै विज्ञहरूले निजगढ विमानस्थल निर्माण प्रकिया रोक्न नहुने भन्दै सर्वोच्च आदेशको आलोचन गरे । संसदीय समितिले त सरकारलाई काम अघि बढाउन निर्देशनसमेत दियो ।

आदेश जारी गरेको एक महिनापछि आएको पूर्णपाठमा भने निजगढको विकल्प निजगढ नै पनि हुन सक्ने तर प्रक्रियागतरूपमा अर्को विकल्प खोज्न भनेपछि शीर्ष नेताहरूको उपस्थितिले निजगढ विमानस्थल सोही स्थानमा बन्ने सन्देश दिन खोजिएको देखिएको छ ।

सर्वोच्चको आदेशले निजगढ विमानस्थलको प्राविधिक, वातावरणीय र आर्थिक हिसाबले उपयुक्त हुने गरी विकल्प खोज्न भने पनि निजगढमै विमानस्थल बनाउन रोक लगाएको छैन ।

प्रधानमन्त्री देउवासहित नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड', नेकपा (एकीकृत समाजवादी) अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादव, खानेपानीमन्त्री उमाकान्त चौधरीलगायतका नेता निजगढ पुगेका हुन् ।

प्रदेश र प्रतिनिधिसभाको निर्वाचन पनि नजिकिएको सन्दर्भमा मधेशको विकाससँग जोडिएको निजगढ विमानस्थल निर्माण रोकिँदैन र तत्काल सुरू हुन्छ भन्ने सन्देश बोकेर शीर्ष नेता त्यहाँ पुगेका विश्लेषण गरिएको छ ।

प्रकाशित मिति: शनिबार, असार १८, २०७९ १२:२९