ज्योतिको अनुभव : आँट्नुपर्छ अन्तरिक्ष टाढा लाग्दैन (अन्तरवार्ता)

A+ A A-

हालै मात्र एनालग अन्तरिक्ष यात्राको प्रशिक्षण पूरा गरेकी दाङ राप्ति गाउँपालिकाकी ज्योति केसी आफ्नो जीवनको लक्ष्य भनेकै अन्तरिक्षमा पुग्ने भएको बताउँछिन् । यसका लागि आफू प्रारम्भिकरूपमा तयार भएकाे र आगामी दिनमा थप मेहनत गर्ने उनकाे याेजना छ । ज्याेतिसँग शिलापत्रका नवराज कुँवरले गरेकाे संक्षिप्त कुराकानीः

एनालग अन्तरिक्ष यात्राको प्रशिक्षण पूरा गरेपछि के हुन्छ ?

अन्तरिक्षमा के हुन्छ, कस्ताे हुन्छ भन्नेबारे पूरापूर जानकारी लिने तालिम हाे । याे तालिममा भाग लिनका लागि निश्चित याेग्यता वा भनाैँ मापदण्ड ताेकिएकाे हुन्छ । पहिलाे त, तालिमका लागि छनाैट हुनु नै महत्त्वपूर्ण कुरा भयाे । त्यसपछि तालिम पूरा गर्नु अझ महत्त्वपूर्ण हुन्छ । अब म अन्तरिक्षमा जानका लागि धेरै कुरामा जानकार भएकी छु । याे तालिमका क्रममा अनुसन्धान र प्रयाेगहरू गरिन्छ । मैले एकपल्ट अवसर पाएँ । यसमा सफल भएँ । म आधिकारिकरूपमा एनालग अन्तरिक्ष यात्रीको रूपमा प्रमाणित भएकी छु ।

तालिममा भाग लिन कस्ताे याेग्यता चाहिन्छ ?

पहिलाे कुरा त इच्छाशक्ति हुनुपर्छ । त्यसपछि अरू मापदण्डकाे कुरा आउँछ । जुनसुकै फिल्डकाे मान्छेले पनि तालिम गर्न सक्नुहुन्छ । एयरफाेर्ससँग सम्बन्धित नै हुनुपर्छ भन्ने हुँदैन । जस्ताे कि एक कलाकार, एक पत्रकारले पनि इच्छा र उद्देश्य भएमा तालिमकाे अवसरमा पाउन सक्नुहुन्छ । विज्ञान पृष्ठभूमि भएकालाई अलिक सजिलाे हुन्छ । मचाहिँ अमेरिकी वायुसेनामा काम गर्ने भएकाले अलिक सजिलो भएको हो ।

सम्बन्धित समाचार

अमेरिकी वायुसेना हुँदै अन्तरिक्ष यात्री बनिन् दाङकी ज्योति केसी (तस्वीरहरू)

परिवार, समाजबाट कस्ताे प्रतिक्रिया पाउनुभयाे ?

म घर आएकाे धेरै भएकाे छैन । परिवारका साथमा छु । अभिभावक निकै हर्षित हुनुहुन्छ । गाउँतिर निस्केकै छैन । साथीहरू पनि मेराे उपलब्धिमा खुसी छन् । राम्राे कमेन्टहरू पाइरहेकी छु । तर मेराे यात्रा यति नै हाेइन । मेराे गाेल भनेकै अन्तरिक्षकाे यात्रा हाे । यसका लागि थप संघर्ष गर्नु छ । मलाई सहयाेग गर्ने अनि हाैसला दिने मेरा आमाबुवा, दाजुभाइ, आफन्त, साथीहरू र संयुक्त राज्य वायु सेनाप्रति म अनुग्रहित छु ।

भविष्यकाे याेजना के छ ?

मेराे उद्देश्य भनेकै अन्तरिक्षकाे यात्रा हाे । यसलाई तालिममै सीमित हुन दिन्न । प्रयास गर्ने छु ।

अमेरिकाबाट नेपाल फर्केर केही गर्ने याेजना छ ?

पहिला त पढाइ पूरा गर्नु छ । मास्टर्स गरेपछि केही समय अमेरिकी एयरफाेर्समै काम गर्ने छु । पाइलट ट्रेनिङ गर्छु । अमेरिकामा पनि अन्तरिक्ष यात्राकाे एनालग तालिम छ । त्याे गर्छु । नेपालमा अन्तरिक्ष यात्रासम्बन्धी तालिम हुँदैन । त्यसैले यसबारे शायदै कसैले साेच्ने गर्नुहुन्छ । म आफ्ना अनुभवहरू नयाँ पुस्तासँग बाँड्ने छु । मैले जानेबुझेका ज्ञान, अनुभव सेयर गर्ने छु ।

प्रकाशित मिति: शनिबार, असार १८, २०७९ ०९:५७