हाम्रै नेपालमा : सुत्केरीलाई भाले काेसेली, भैंसीलाई भत्ता

A+ A A-

पर्वतको महाशिला गाउँपालिकाले कोसेलीसहित सुत्केरी भेट्ने अभियान सुरु गरेको छ । गाउँपालिकाले सुत्केरी महिलाको पोषणलाई लक्षित गर्दै नीति तथा कार्यक्रम पारित गरेर ‘अध्यक्ष कोसेली कार्यक्रम’ नयाँ आर्थिक वर्षको सुरुबाटै कार्यान्वयनमा ल्याएको हो ।

गाउँपालिकाले सुरु गरेको यस अभियानको पहिलो चरणमा सुत्केरी भएका महिलाकाे घरघरमा पुगेर कोसेली वितरण गरेकाे हाे ।

गाउँपालिका अध्यक्ष राजु पौडेलले पहिलोपटक महाशिला–५ लुङ्खु आहाले निवासी सुत्केरी गुडिया सुनारसँग भेटघाट गरे । अध्यक्ष पौडेल, उपाध्यक्ष, हीरादेवी राना, स्वास्थ्यकर्मी र वडाध्यक्षको उपस्थितिमा सुत्केरी महिलालाई कुखुराको भाले, घिउ र अन्डा वितरण गरेका छन् ।

स्वास्थ्य संस्थामा पुगेर सुरक्षित विधिबाट सुत्केरी गराउने महिलालाई प्रोत्साहन गर्न घरघरमै पुगेर सुत्केरी भेट्न ‘अध्यक्ष कोसेली कार्यक्रम’ सुरु गरिएको अध्यक्ष पौडेलले बताए ।

‘गाउँपालिकाले बर्थिङ सेन्टरमै सुत्केरी गराउने अभियान थालेपछि हरेक महिला स्वास्थ्य संस्थामै पुगेर सुत्केरी गराउन थालेका छन् । अहिले होम डेलिभरीको अवस्था शून्य छ,’ उनले भने, ‘अब घरमा सुत्केरी गराउने मानसिकताको नै अन्त्य होस् भनेर प्रोत्साहनको कार्यक्रम ल्याएका हौं ।’

महाशिला गाउँपालिकाका ६ वटै वडामा सुरक्षित सुत्केरी गराउन बर्थिङ सेन्टर स्थापना गरिएका छन् ।

भैंसीलाई पनि सुत्केरी खर्च

यसैगरी, महाशिलाले स्वास्थ्य संस्थामा सुत्केरी हुने महिलालाई मात्रै होइन, पाडापाडी हुर्काउने कृषकलाई समेत प्रोत्साहन गर्न भैंसीलाई सुत्केरी भत्ता दिने निर्णय गरेको छ। भैंसी ब्याएपछि पाडापाडी काटेर खाने चलन हटाउन पाडापाडी हुर्काउने कृषकलाई ५ सय भत्ता दिने निर्णय भएको गाउँपालिका अध्यक्ष पौडेलले बताए ।

गाउँपालिकाले गत वर्षदेखि नै स्थानीय जातका लिमे र पाराकोटे जातका भैंसीका पाडापाडी काटेर खानेलाई एक हजार जरिमाना तिराउने निर्णय कार्यान्वयनमा ल्याएको छ ।