लुम्बिनीमा बैंकिङ कारोबार : गुल्मीमा २१ अर्ब संकलन, ७ अर्बको लगानी (बाह्रै जिल्लाको विवरणसहित)

लुम्बिनीमा बैंकिङ कारोबार : गुल्मीमा २१ अर्ब संकलन, ७ अर्बको लगानी (बाह्रै जिल्लाको विवरणसहित)

A+ A A-

बैंक तथा वित्तीय संस्थाहरूले समग्रमा कुल निक्षेपका ८९.१४ प्रतिशत कर्जा प्रवाह गरेका छन् । तर, प्रदेशगत रुपमा भने यस्तो अनुपात तलमाथि रहेको छ । लुम्बिनी प्रदेशमा निक्षेप संकलनको अनुपातमा १३३ प्रतिशत कर्जा प्रवाह गरेको पाइएको छ ।

प्रदेशका १२ वटा जिल्लामा ४ खर्ब २ अर्ब ७३ करोड रुपैयाँ निक्षेप संकलन भएको छ । तर, यिनै १२ जिल्लामा बैंक तथा वित्तीय संस्थाले ५ खर्ब ३७ अर्ब १९ करोड रुपैयाँ लगानी गरेको राष्ट्र बैंकले उपलब्ध गराएको तथ्यांकले देखाएको छ ।

लुम्बिनीका पहाडी जिल्ला निक्षेप संकलन बढी र कर्जा प्रवाह न्यून देखिएको छ भने तराईका जिल्लामा कर्जा प्रवाह बढी तर, त्यसको अनुपातमा निक्षेप संकलन कम देखिएको छ ।

निक्षेप संकलनको अनुपातमा सबैभन्दा कम कर्जा प्रवाह अर्घखाँची जिल्लामा भएको पाइएको छ ।

यस जिल्लामा १२ अर्ब ५४ करोड निक्षेप संकलन हुँदा जम्मा ३ अर्ब ५६ करोड कर्जा प्रवाह भएको छ । यहाँका नागरिक बचत बढी गर्छन् तर, बैंकबाट ऋण लिने न्यून रहेको देखिएको छ । निक्षेपको तुलनामा कर्जाको अनुपात २८ प्रतिशत मात्रै छ ।

त्यस्तै, गुल्मी जिल्लामा २१ अर्ब ३० करोड निक्षेप संकलन हुँदा ७ अर्ब १० करोड मात्रै कर्जा प्रवाह भएको छ । यहाँ निक्षेप र कर्जाको अनुपात ३३ प्रतिशत मात्रै छ ।

नवलपरासी पश्‍चिममा भने अवस्था ठीक उल्टो छ । निक्षेप संकलनको अनुपातमा कर्जा प्रवाह १६५ प्रतिशत छ । यहाँबाट जम्मा २२ अर्ब १३ करोडको निक्षेप संकलन हुँदा ३६ अर्ब ६१ करोडको कर्जा लगानी भएको छ ।

सबैभन्दा कम बैंकिङ कारोबार रुकुम पूर्वमा भएको छ । यहाँ ९३ कराेडको निक्षेप संकलन र ६८ करोडको कर्जा प्रवाह भएको छ ।

सबैभन्दा धेरै कारोबार रुपन्देहीमा भएको छ । यहाँ १ खर्ब ७९ अर्बको निक्षेप संकलन हुँदा २ खर्ब ६९ अर्बको कर्जा प्रवाह भएको छ ।

प्रदेश राजधानीसमेत रहेको जिल्ला दाङमा भने ४३ अर्ब ५३ करोड निक्षेप संकलन र ६४ अर्ब २१ करोडको कर्जा प्रवाह भएको छ ।

यस्तो छ १२ जिल्लाको विवरण

जिल्ला	निक्षेप	कर्जा
रुकुम (पूर्व)	९३ करोड	६८ करोड
रोल्पा	४ अर्ब ६० करोड	३ अर्ब १९करोड
प्युठान	७ अर्ब ७६ करोड	६ अर्ब ३७ करोड
गुल्मी	२१ अर्ब ३० करोड	७ अर्ब १० करोड
अर्घाखाँची	१२ अर्ब ५४ करोड	३ अर्ब ५६ करोड
पाल्पा	२३ अर्ब ८ करोड	११ अर्ब ९७ करोड
नवलपरासी	२२ अर्ब १३ करोड	३६ अर्ब ६१ करोड
रुपन्देही	१ खर्ब ७९ अर्ब १८करोड	२ खर्ब ६९ अर्ब १४ करोड
कपिलवस्तु	२५ अर्ब ४४ करोड	२८ अर्ब २ करोड
दाङ	४३ अर्ब ५३ करोड	६४ अर्ब २१ करोड
बाँके	४९ अर्ब ४१ करोड	८९ अर्ब ८२ करोड
बर्दिया	१२ अर्ब ८७ करोड	१६ अर्ब ४६ करोड
लम्बिनी प्रदेश जम्मा	४ खर्ब २ अर्ब ८३ करोड	५ खर्ब ३७ अर्ब १९ करोड