नवलपरासीमा केराको उत्पादन १८० प्रतिशतले बढ्यो, रुकुममा महको उत्पादन ७० प्रतिशतले घट्यो

नवलपरासीमा केराको उत्पादन १८० प्रतिशतले बढ्यो, रुकुममा महको उत्पादन ७० प्रतिशतले घट्यो

A+ A A-

लुम्बिनी प्रदेशमा खाद्य तथा अन्न बालीले ढाकेको क्षेत्रफल बढेको छ । नेपाल राष्ट्र बैंकले गरेको प्रदेश आर्थिक क्रियाकलाप अध्ययनअनुसार गत वर्षको तुलनामा खाद्य तथा अन्य बालीले ढाकेको कूल क्षेत्रफल २.६४ प्रतिशतले बढेको हो ।

फलफूल तथा मसला बालीले ढाकेको क्षेत्रफल गत अवधिको तुलनामा १२.०१ प्रतिशत र उत्पादन २६.०९ प्रतिशतले वृद्धि भएको छ । तर, तरकारी बालीले ढाकेको क्षेत्रफल ३.८८ प्रतिशत र तरकारी उत्पादन २०.२८ प्रतिशतले घटेको पाइएको छ ।

समीक्षा अवधिमा नवलपरासी पश्चिम जिल्लामा केराले ढाकेका भू–क्षेत्र विस्तार हुनुको साथै केरा उत्पादन १८०.६१ प्रतिशतले वृद्धि भएको छ । यता रुकुम पूर्वमा सबैभन्दा धेरै उत्पादन हुने मह उत्पादनमा भारी गिरावट आएको कारण समग्र मह उत्पादन ७०.११ प्रतिशतले घटेको छ ।

समीक्षा अवधिमा पशुपन्छी उत्पादनमध्ये दुध उत्पादन १२.६७ प्रतिशत, मासु १५.१९ प्रतिशत, अण्डा २५.२८ प्रतिशत, छाला २.१४ प्रतिशत र हाड उत्पादन ६.४५ प्रतिशतले वृद्धि भएको तथ्यांकले देखाएको छ ।

बाँके जिल्लामा मत्स्य पालनको भू–क्षेत्रमा वृद्धि र २ हजार ५०० भुरा प्रतिकट्ठा राख्न मिल्ने पङ्गास जातको माछासमेतको व्यवसायिक उत्पादन सुरु भएको कारण समग्र माछा उत्पादन १८.८६ प्रतिशतले वृद्धि भएको उल्लेख गरिएको छ ।

सामुदायिक वनमा कटान कार्य नभएको कारण वनजन्य उत्पादन अन्तर्गत काठ उत्पादन २०.५२ प्रतिशत, दाउरा २६.९५ र औषधिजन्य वस्तु उत्पादन २६.८५ प्रतिशतले घटेको अध्ययन प्रतिवेदनमा उल्लेख गरिएको छ ।

कुल खेतीयोग्य क्षेत्रफलको २५.८१ प्रतिशत र खेती गरिएको क्षेत्रफलको ४४.१३ प्रतिशत हिस्सा सिंचित भएको उल्लेख छ ।

समीक्षा अवधिमा कृषि क्षेत्रमा प्रवाहित कृषि कर्जा २६.१५ प्रतिशतले वृद्धि भएको छ भने कूल प्रवाहित कृषि कर्जामा रुपन्देही जिल्लाको हिस्सा सबैभन्दा धेरै (४०.८८ प्रतिशत) र रुकुम पूर्व जिल्लाको हिस्सा सबैभन्दा कम (०.०४ प्रतिशत) मात्र रहेको छ ।

प्रकाशित मिति: शुक्रबार, असार १७, २०७९ १७:४३