नेप्सेमा पहिरो, दुई कम्पनीको शेयरमा सर्किट

A+ A A-

धितोपत्र बजारमा शेयर कारोबार मापक नेप्से परिसूचकको वृद्धि एक दिन पनि टिक्न सकेन । बिहीबार उच्च अङ्कले उकालो लागेको कारोबार मापक परिसूचक नेप्से शुक्रबार भने पुनः ओरालो लाग्यो ।

नेपाल स्टक एक्सचेञ्जका अनुसार नेप्से परिसूचक ८.८७ अङ्कले ओरालो लागेर दुई हजार २८.७७ अङ्कमा पुगेको छ । त्यस्तै, ठूला कम्पनीको शेयर कारोबार मापक सेन्सेटिभ परिसूचक ३.१७ अङ्कले ओरालो लागेर ३८८.६२ मा ओर्लेको छ ।

कुल २२१ कम्पनीका ३६ लाख ६३ हजार २२० कित्ता शेयर रु १ अर्ब ४५ करोड ९३ लाख १२ हजार १५ मूल्यमा खरिदबिक्री भए । आज बिहान ११ देखि १ बजेसम्म भएको कारोबारका आधारका बजार पुँजीकरण रु २८ खर्ब ९२ अर्ब ५१ करोड ६४ लाख २० हजारबराबर रहेको छ ।

कारोबार भएका कुल १३ उपसमूहमध्ये तीन उपसमूहको शेयर मूल्यमा वृद्धि भएको छ भने १० उपसमूहको शेयर मूल्यमा गिरावट आएको छ । व्यापार २५.८१, वित्त ७.१२ र लघुवित्त २९.४८ अङ्कले उकालो लाग्यो । त्यस्तै, बैंकिङ ८.३२, होटल तथा पर्यटन २२.१८, विकास बैंक ४९.३४, जलविद्युत् ११.२२, निर्जीवन बीमा १८.२६, उत्पादन ३१.४७, अन्य ८.४५, जीवन बीमा ३३.८५, सामूहिक लगानी कोष ०.०९ र लगानी ०.५९ अङ्कले ओरालो लागेको छ ।

नेप्सेका अनुसार कारोबारका आधारमा शिवम् सिमेन्ट शीर्ष स्थानमा छ । सो कम्पनीको रु ५ करोड ५७ लाख ४७ हजार ८९३ बराबरको कारोबार भयो । त्यस्तै, एसियन लाइफ इन्सुरेन्स रु ५ करोड २२ लाख ५६ हजार ३२६, नेपाल पुनर्बीमा कम्पनी रु ४ करोड ९० लाख ४८ हजार १४८, हिमालयन डिस्टिलरी रु ४ करोड ६२ लाख २ हजार ४७१ र एनआईसी एसिया बैंक रु ४ करोड ५१ लाख ३२ हजार ६५५ बराबरको कारोबार भई शीर्ष पाँचभित्र पर्न सफल भए ।

नेप्सेका अनुसार ओरालो लागेको बजारमा आँधीखोला लघुवित्त र सीवाइसीएल लघुवित्तको शेयर मूल्यमा १० प्रतिशतले वृद्धि भई सकारात्मक सर्किट लाग्यो । त्यस्तै, नेपाल फाइनान्स ७.७०, मैलुङ खोला जलविद्युत् कम्पनी ६.१७ र किसान लघुवित्तका लगानीकर्ताले ४.८१ प्रतिशतले कमाए ।

यस्तै, स्ट्यान्डर्ड चार्टर्ड बैंक ४.७७, युनाइटेड इन्स्योरेन्स ४.०३, लक्ष्मी लघुवित्त ३.७०, आरबीबी म्युचुअल फन्ड एक ३.६७ र जनरल इन्स्योरेन्स कम्पनीका लगानीकर्ताले ३.४२ प्रतिशतले गुमाए ।

प्रकाशित मिति: शुक्रबार, असार १७, २०७९ १७:११