लामोसाँघु-जिरी सडक : तीन दिनभित्र सडक सुधार नगरे ठेक्का रद्द गर्ने चेतावनी

A+ A A-

चार जिल्लाको लाइफ लाइनका रुपमा रहेको लामोसाँघु जिरी सडकखण्ड स्तराेन्नतिको काम यो वर्ष पनि नसकिएपछि तीन दिनभित्र सडक सुधार गरेर यातयात सञ्चालन गर्न सहज नगरे ठेक्का तोड्ने सडक कार्यालयले चेतावनी दिएको छ ।

सिन्धुपाल्चोक, दोलखा, रामेछाप, ओखलढुंगालगायतका जिल्लाको लाइफ लाइनको सडक स्तराेन्नतिकाे काम भइरहेको छ । ठेकेदारको चरम लापरबाहीका कारण निर्माणमा ढिलाइ भएकाे छ ।

वर्षा सुरु हुनासाथ सवारीसाधन सञ्चालनमा समस्या र यात्रुहरुले चरम दुःख पाएपछि लामोसाँघु-जिरी सडक सुधार योजनाले आइतबार सूचना प्रकाशित गरेर तीन दिनभित्र सडक सुधार नगरे ठेक्का नै रद्द गर्ने चेतावनी दिएको छ ।

हामीले पटक-पटक काम सम्पन्न गर्न ताकेता गरेका छौं, लामोसाँघु जिरी सडक सुधार आयोजनाका प्रमुख धर्मेन्द्र झाले भने, ‘यो वर्षमा पनि सडकमा समस्या भएपछि सुधार गर्न म्याद दिएका छौं ।’वर्षाको समयमा सहज रुपमा यातयात सञ्चालन गर्ने वातावरण बनाउन निर्माण व्यवासायीलाई अनुरोध गरे पनि नटेरेकाे उनले बताए ।

ठेकेदारहरुले साइडमा राखेको निर्माण सामग्रीबाटै सडक सुधार गर्ने र त्यसको सबै जिम्मेवारी ठेकेदार कम्पनीबाटै बेहाेर्न लगाउने निर्णय भएको झाले जानकारी दिए । सडक सुधार नभए सार्वजनिक खरिद ऐन २०६३ तथा सार्वजनिक खरिद नियमावली २०६४ (संशाेधनसहित)बमोजिम ठेक्का सम्झौता तोडी कार्यसम्पादन जमानत तथा धरौटी रकम जफत गर्नुको साथै प्रचलित कानूनबमोजिम गरिने झाले बताए ।

सन् १९७५ देखि १९८५ सम्म स्विस सरकारको सहयोगमा निर्माण भएको अरनिको राजमार्गस्थित सिन्धुपाल्चोकको खाडीचौरबाट दोलखाको जिरीसम्म ११० किलोमिटर लामोसाँघु जिरी सडकको चौडा बढाउने कार्य भइरहेको छ । २०१५ अक्टोबरदेखि सुरु गरिएको स्तराेन्नति कार्य दुई वर्ष अर्थात् २०१७ को अक्टोबरसम्ममा सकिनुपर्नेमा हालसम्म जम्मा ५० प्रतिशत पनि काम सकिएको छैन ।भ्याटसहित ५१ करोड ४४ हजार ८ सय १० रुपैयाँको लागतमा सडक चौडा गर्नै र कालोपत्रे गर्नै जिम्मा दिइएको थियो । ३ जुन २०१५ मा ठेक्का सम्झौता भएको थियो । सम्झौता भएको मितिले दुई वर्ष अर्थात् १५ जुलाई २०१८ मा सडक निर्माण सम्पन्न गर्नुपर्नै लामोसाँघु तामाकोसी जिरी सडक सुधार आयोजनाका प्रमुख झाले बताए ।

भारतीय एक्जिम बैंकको लगानीमा सडक चौडा बनाउन खाडीचौरदेखि मुडेसम्मको २५ किलोमिटर सडक निर्माणको जिम्मा लिएको कम्पनी यसअघि नै काम छाडेर बेपत्ता भएका थिए । खाडीचौरदेखि मुढेसम्म सुनौलो खिम्ती र भारतीय सिमाञ्चल र नेपाली गौरी पार्वती कम्पनीले यसको जिम्मा लिएका थिए । सुनौलो खिम्ती बेपत्ता भएपछि यो सडकखण्डको निर्माणको जिम्मा पनि नेपाली गौरी पार्वतीलाई नै दिइएको छ ।

त्यस्तै, मुडेबाट चरिकोटसम्मको ३० किलोमिटर सडक स्तराेन्नतिको जिम्मा भारतको सकिल हैदर, शंकर माली र नेपालको सुनौलो खिम्तीले पाएको थियो । १४ जुन २०१५ मा सम्झौता भएको र १ मार्च २०१८ मा सडक मर्मत कार्य सक्नुपर्नै भए पनि यो खण्डको कामसमेत सकिएको छैन । भ्याटसहित ९१ करोड ९४ लाख ९४ हजारमा सडक कालोपत्रे र चौडा बनाउनुपर्ने आयोजना प्रमुख झाले बताए । निर्माण कम्पनी सिमाञ्चल–गौरी पार्वती–सुनौलो खिम्ती जेभीले खाडीचौरको जिरोदेखि मुडेनजिकै २५ किलोमिटर सडक सुधारको जिम्मा पाएको थियो । जिरोदेखि ८ किलोसम्म कालोपत्रे सकिए पनि त्योभन्दा माथि सब बेसको काम सकिएको लिसंखु्पाखर गाउँपालिकाका अध्यक्ष कमल नेपालले जानकारी दिए । सडक खनेर कमसल खालको बेस राख्दा वर्षामा समस्या देखियो, अध्यक्ष नेपालले भने, लामोसाँघु जिरी सडकको १३ किलोदेखि १८ किलोसम्मको सडकमा व्यापक समस्या छ । तीन दिनभित्र सडक सुधार हुने हामीले अपेक्षा गरेका छौं ।

सडकमा नै भल बग्छ

बर्खे झरीमा सडकमै पानीको भल बग्न थालेपछि यो सडकमा सवारी साधन आवतजावत गर्न सक्दैनन् । मालवाहक ट्रक तथा टिपर हिलोमा फसेपछि लामोसाँघु–जिरी सडकखण्डका विभिन्न स्थानमा दैनिकजसो यातायात अवरुद्ध हुँदै आएको छ ।

‘कति ठाउँमा त गाडी नै पल्टिएला जस्तो हुन्छ, जोखिम मोलेर गाडी चलाउनुपरेको छ,’ खाडीचौरबाट मुडे जाँदै गरेका ट्रक चालक सुजन गहतराज भन्छन्, ‘ठेकेदारको लापर्वाहीले सयौं मानिस जोखिममा यात्रा गर्न बाध्य छन् ।

यो सडक हुँदै स्कुल बस र एम्वुलेन्स नै सहज रुपमा आवतजावत गर्न सक्दैनन् । सडकको दुर्दशाका कारण एम्बुलेन्स नै सहज रुपमा चल्न नसक्दा बिरामीलाई समयमै अस्पताल पुर्‍याउनसमेत नसकिने अवस्था छ । अस्पतालमा उपचार गराएर घर फर्किएका बिरामीहरु चरिकोटसम्म पुग्दा पुनः बिरामी हुने अवस्था छ ।

खाडीचौर–चरिकोट सडकखण्डको अवस्था नाजुक बनेपछि याे सडक हुँदै चल्ने अधिकांश सार्वजनिक यातायात र निजी सवारी साधनहरु पछिल्लो समय खुर्कोट हुँदै चल्न थालेका छन् । सडकका कारण विद्यालय नै सञ्चालन गर्न नसकेको खाडीचौरस्थित सदाबहार एकेडेमीका अध्यक्ष दिनेश थापा बताउँछन् । यो सडक हुँदै स्कुल बस नै सञ्चालन गर्न नसकेपछि अघिल्लो एक साता विद्यालय बन्द गर्नुपरेको उनले सुनाए ।

प्रकाशित मिति: सोमबार, साउन ६, २०७६ ०२:४८