पोखरा–३३ मा ल्यान्डफिल साइट राख्ने निर्णय खारेजीको माग

A+ A A-

पोखरा महानगरपालिकाले वडा नं ३३ भरतपोखरीमा ल्यान्डफिल साइट राख्ने तयारी गरिरहेको भन्दै स्थानीयवासीले त्यसको विरोध जनाएका छन् ।

भरतपोखरीवासी नागरिकहरूको संयोजनमा आज ‘भरतपोखरीमा ल्यान्डफिलः कति ठीक ? कति बेठिक ?’ शीर्षकमा आयोजित छलफल कार्यक्रमका वक्ताले सरोकारवालाबीच छलफल नै नगरी ल्यान्डफिल साइट राख्ने निर्णय भएको भन्दै तुरुन्त खारेजी गर्न माग गरेका छन् ।

कार्यक्रम संयोजक हेमबहादुर थापा पराजुलीले सरोकारवालाबीच कुनै छलफल नगरी महानगरपालिकाको बजेटमा वडा नं ३३ टिमुरपाटामा ल्यान्डफिल साइट व्यवस्थापनका लागि १० करोड विनियोजन गरेको विषयप्रति आफूहरूको गम्भीर ध्यानाकर्षण भएको बताए ।

भौगोलिक अवस्थितिअनुसार आवास क्षेत्रका लागि पोखराकै उत्कृष्टस्थलका रूपमा रहेको भरतपोखरी पर्यटकीय गन्तव्यसमेत भएको बताउँदै उनले यस स्थानमा कुनै पनि रूपमा ल्यान्डफिल्ड साइट राख्न स्थानीयवासी तयार नरहेको बताए ।

पोखरा– ३३ का वडाध्यक्ष रामचन्द्र अधिकारीले भरतपोखरीमा ल्यान्डफिल साइट राख्ने सम्बन्धमा आफूहरू नेतृत्वमा आउनुपूर्व अघिल्लो स्थानीय सरकारको पालामा महानगर कार्यपालिकाको ५५औँ बैठकले निर्णय गरेको बताए । यो विषय आम वडावासीको चासो र सरोकारको विषय भएको बताउँदै उनले जनताको भावनाअनुसार अघि बढ्ने उल्लेख गरे ।

साबिक भरतपोखरी गाउँ विकास समितिका पूर्वअध्यक्ष यज्ञप्रसाद अधिकारी (ठूला) ले फोहोरसँग विकास साट्नेमा आफूहरू सहमत नरहेको बताउँदै निर्णयलाई खारेज गर्न माग गरे । साबिक भरतपोखरी गाविसका पूर्वअध्यक्ष गोपाल पुनले ल्यान्डफिल साइट राख्ने निर्णयको सबै वडावासीले सामूहिक रूपमा विरोध गर्ने बताए ।

सरस्वती टीका माध्यमिक विद्यालयका अध्यक्ष ऋषिराज आचार्यले ल्यान्डफिल साइट राख्ने जस्तो निर्णयमा सरोकारावालाबीच छलफल नै नगरिनु दुःखद भएको बताउँदै यसका विरुद्धमा सबै एकताबद्ध भएर लाग्नुपर्नेमा जोड दिए ।

प्रकाशित मिति: शुक्रबार, असार १७, २०७९ १४:१७