पर्यटकको असार १५: पहिलोपटक हिलो खेल्यौँ, पछि फेरि आउँछौँ

पोखराको हिलो दौड प्रतियोगिता जितेका पर्यटक ।

A+ A A-

अष्ट्रेलियाकी २३ वर्षीय अफेरल टायला नेपाल बसाइँ सकेर हप्ता दिनमै स्वदेश उड्दै छिन् । तर, नेपाल छोड्नुअघि उनले जीवनमा दोस्रोपटक सायदै पाउने अनुभव बटुलेकी छिन् ।

राष्ट्रिय धान दिवसको अवसरमा बुधबार पोखरा पर्यटन परिषद्ले पोखरा–२५ हेमजा माइस्थानमा १७औँ असारे रोपाइँ महोत्सव आयोजना गरेको थियो । उनी महोत्सवमा सहभागी हुन त्यहाँ पुगिन् । हिलाम्मे खेतबाट निस्केपछि अफेरलले सुनाइन्, ‘यो एकदमै गज्जब लाग्यो । मैले हिलोमा एकदमै रमाइलो गरेँ ।’

दुई हप्ताअघि आएकी अफेरलको यो पहिलो नेपाल भ्रमण हो । उनी महोत्सवमा आयोजित हिलो दौड प्रतियोगितामा सामेल भएकी थिइन् । विदेशीहरूको महिलातर्फ हिले दौडमा प्रथम भएर उनले मेडल र प्रमाणपत्र पाएकी छन् ।

नेपाली, अरु देशका पर्यटकसँग हिलो छ्यापाछ्याप गरेर टायलाले नेपालको १५ असार मनाएकी छन् । आफूमात्रै नभई आफूसँगै रहेका साथीहरूले पनि हिलोमा खेल्न मन पराएको अफेरलले सुनाइन् । ‘म नेपाल घुम्न आएकी थिएँ । साथीहरूसँग यहाँ पनि आएँ,’ अफेरलले मुस्कुराउँदै थपिन्, ‘अष्ट्रेलियामा यस्तो कहिल्यै देखेको थिइनँ । ममात्रै होइन मसँग आएका सबै साथीले मन पराउनुभयो ।’

पुनहिलसम्म पदयात्रा सकेर उनी मंगलबार मात्र पोखरा फर्किएकी थिइन् । सँगै बस्ने साथीले रोपाइँ महोत्सवबारे सुनाए । अफेरलले ३ घण्टा पोखराको हेमजा फाँटमा हिलो खेलिन, त्यहीँ दौडिन् । खुसी हुँदै उनले सुनाइन्, ‘यही समयमा म अरु वर्ष फेरि पोखरा अवश्य आउँछु ।’

न्यूजिल्याण्डका २६ वर्षीय एन. टिम नेपाल आएको दुई महिना भयो । ट्रेकिङ, जंगल सफारी गरेका उनलाई पनि असार १५ नौलो थियो । ‘यो पहिलो अनुभव हो । न्यूजिल्याण्डमा माटो त छ तर यहाँको जस्तो छैन र हिलो पनि खेलिँदैन,’ उनले सुनाए ।

पोखरामा हिलो खेलेपछि सामूहिक तस्वीर खिचाउँदै विदेशी पर्यटक र नेपाली ।

घरपरिवार साथीभाइलाई आफूले नेपालको पर्व र हिलोमा गरेको रमाइलो सुनाउने योजना टिमले सुनाए । उनी मंगलबार महोत्सवमा भएको विदेशी पुरुषको हिलो दौडमा प्रथम भए । आरोहीलाई सगरमाथा चढ्दा मिल्ने आनन्दजस्तै आफूले नेपालको हिलोमा दौडेर मेडल पाएको भन्दै उनी आनन्दित छन् । ‘मलाई एकदमै गर्व लागेको छ । कसैलाई एभरेष्ट चढ्दा आनन्द हुन्छ । त्योभन्दा पनि आनन्द मलाई हिलो दौड जित्दा भयो,’ टिमले हिलोमा रमाउँदाको अनुभव सुनाए ।

उनको नेपाल बसाइँका अविस्मरणीय पलमा पोखराको रोपाइँ महोत्सव पनि थपिएको छ । असारकै सिजनमा नेपाल नआए यो अनुभव उनले सायदै फेरि दोहोर्‍याएर पाउने छन् । तर, कुनै वर्ष अहिलेकै सिजनमा नेपाल आए आफू पोखरा आउने उनले सुनाए ।

हेमजाको फाँटमा उभिएर टिमले हिलोमा पस्दाको अनुभवमात्रै होइन नेपालका राम्रो पक्ष पनि कोट्याए । ‘मलाई नेपाल साह्रै मनपर्‍यो । यहाँका मान्छे, खाना र हिमाल सुन्दर छन् । मैले नेपालमा बाघ पनि देखेँ,’ उनी खुसी देखिए ।

पोखरा पर्यटन परिषद्को आयोजना र पोखरा–२५ देविस्थान सेवा समाजको सहआयोजनामा भएको महोत्सवमा हिलोमा माछा समात्ने प्रतियोगिता, असारे गीत तथा रोपाइँ प्रतियोगिता, नेपाली र विदेशीको हिलो दौड प्रतियोगिता, घैँटो फोर्ने प्रतियोगिता, फुटबल प्रतियोगितालगायत भएको थियो ।

यसपटकको रोपाइँ महोत्सवमा अघिल्ला वर्षमा जसरी विदेशी पर्यटक पोखराका फाँटमा हिलोमा रमाउन उत्रिएनन् । कोरोना भाइरसपछि नेपाल आउने पर्यटकको संख्या घट्दा योपटक महोत्सवमा विदेशीको संख्या कम भएको पोखरा पर्यटन परिषद्का महासचिव रामचन्द्र शर्माले बताए । ‘पहिला विदेशीको संख्या ५ सय जति हुन्थ्यो । अहिले एक सय जति रह्यो,’ उनले भने ।

कोरोना भाइरसको जोखिमले पछिल्लो दुई वर्ष पोखरामा रोपाइँ महोत्सव हुन पाएन । फेवा, अर्मला, बिरौटासहित पोखराका फाँटमा पर्यटन परिषद्ले २०६१ सालदेखि रोपाइँ महोत्सव गर्दै आएको छ ।

प्रकाशित मिति: बुधबार, असार १५, २०७९ २०:४४