ट्याक्सी व्यवसायीका पीडा : चाहेर पनि भाडा समायोजन गर्न सक्दैन मन्त्रालय

A+ A A-

५ असार २०७९ मा यातायात व्यवस्था विभागले अन्तरप्रदेश सार्वजनिक यातायातको भाडा समायोजन गर्‍याे । इन्धनको बजारमूल्य ५ प्रतिशतभन्दा धेरै घटे वा बढे भाडा पनि घट्ने वा बढ्ने यातायात व्यवस्था विभागको निर्णयअनुसार अन्तरप्रदेश सार्वजनिक यातायातको भाडा समायोजन भएको हो ।

तर, लामो समयदेखि स्वचालित भाडाको माग राख्दै उपत्यकामा रहेका १० हजारभन्दा धेरै ट्याक्सीले भने यो सहुलियत पाएका छैनन् ।

ट्याक्सीमा स्वचालित प्रणाली नहुँदा ट्याक्सी व्यवसायी व्यवसायबाटै पलायन हुने अवस्था आएको नेपाल राष्ट्रिय मिटर ट्याक्सी व्यवसायी तथा चालक सेवा समाजका सचिव दिलीप श्रेष्ठ बताउँछन् ।

‘४ वर्षमा अर्थात् २४ चैत २०७८ मा श्रम रोजगार तथा यातायात मन्त्रालय, बागमतीले ट्याक्सीको भाडा समायोजन गर्‍यो । त्यो पनि सबै ट्याक्सीको मिटर अपडेट भइसकेको छैन । त्यसयता पेट्रोलको मूल्य धेरैपटक बढिसक्यो । यस्तो स्थितिमा कसरी व्यवसाय चलाउने ?,’ उनले प्रश्न गरे ।

ट्याक्सी भाडा स्वचालित बनाउन वर्षाै‌ंदेखि माग गर्दा पनि सम्बोधन नभएको उनको गुनासो छ । प्रदेश संरचना नयाँ भएका कारण ट्याक्सीको भाडा समायोजन गर्न केही समस्या भएको श्रम, रोजगार तथा यातायात मन्त्रालय, बाग्मतीका सूचना अधिकारी प्रकाश अधिकारी बताउँछन् ।

‘पहिलो कुरा त हामी नयाँ भएकाले केही समस्या भएको हो । दोस्रो कुरा, हामीले वैज्ञानिक भाडा प्रणली लागू गरे पनि गुणस्तर तथा नापतौल विभागले समयमा मिटर अपडेट गर्न सक्दैन,’ उनले भने, ‘पछिल्लोपटक समायोजन भएको भाडा सबै अपडेट गर्न ८ महिना लाग्ने देखिएको छ । ’

उपकरण तथा जनशक्तिको अभावका कारण मेसिन अपडेट गर्न समय लागेको गुणस्तर तथा नापतौल कार्यालय काठमाडौंका प्रमुख राकेश झा बताउँछन् । ‘मिटर अपडेट गर्न हामीसँग दुईवटा मात्र रोलिङ मेसिन छन् । त्यसमाथि एउटा बिग्रिएको छ । त्यस्तै, जनशक्तिको पनि अभावका कारण छिटो काम हुन नसकेको हो,’ उनले भने ।

काम द्रुत गतिमा गर्न कम्तीमा ८/१० वटा रोलिङ मेसिन र त्यहीअनुसार जनशक्ति चाहिने उनले बताए । सरकारले चाहे मात्र सफ्टवेयर सिस्टम लागू गर्न सकिने झाले स्पष्ट पारे । ‘सफ्टवेयर सिस्टम लागू गरेर ट्याक्सीलाई पनि वैज्ञानिक भाडादरमा जान सहज हुने व्यवस्था गर्न त सकिएला तर, त्यसका लागि सरकारले अध्ययन गरेर काम अघि बढाउनुपर्छ,’ उनले भने ।

विभिन्न राइड शेयर कम्पनीले एपको ट्याक्सीको भाडादर एपबाटै निर्धारण गरिरहेको भए पनि सरकारले भने यसबारे सोच हालसम्म नबनाएका उनले बताए ।

हाल ट्याक्सीको भाडा फ्लग डाउन ५० र प्रति २०० मिटरको १५ रुपैयाँ छ । राति ९ बजेदेखि बिहान ४ बजेसम्म फ्लग डाउन ५० र प्रति २०० मिटरको १५ रुपैयाँ निर्धारण गरिएको छ ।

प्रकाशित मिति: बुधबार, असार १५, २०७९ १७:०६