स्रष्टासँग शिलापत्रको पहिलो शृंखला : समयचेत र समकालीन कवितामाथि बहस

A+ A A-

स्रष्टासँग शिलापत्र कार्यक्रमको पहिलो शृंखला सम्पन्न भएको छ । स्रष्टासँग शिलापत्र को पहिलो शृंखलामा ‘समयचेत र समकालीन कविता’माथि बहस गरिएको छ । बहसमा कवित्रय मोमिला, संगीत श्रोता र नवराज पराजुली मुख्य वक्ताका रूपमा थिए ।

मोमिलाले ‘प्रमिथस’ शीर्षकको कविता वाचन गरेसँगै सुरु भएको कार्यक्रममा तीनजना कविले करिब १ दर्जन कविता सुनाए । कार्यक्रममा मोमिलाले प्रमिथस, मात्र एउटा हाँगा काट्दा, सूर्य समय, प्रेम पीडा, प्यास र पानी र भीमसेन थापाको सुसाइड नोटबुक शीर्षककाे कविता वाचन गरिन् ।

त्यस्तै, संगीत श्रोताले इच्छुकलाई इमेल, महिलाहरु कहाँ छन् ?, कोकाकोलाले भारी मतले चुनाव जित्यो, सेतु विकचोकमा दुई मिनेट र बालुवाटार लाइभ कविता सुनाए । कवि नवराज पराजुलीले रुख, च्याउ र औंला कविता वाचन गरे ।

आफ्ना कवितामा दार्शनिक चेत हुने भन्दै कवि मोमिलाले भनिन्, मैले कविता लेख्न बस्दा कसका लागि कविता लेख्ने हो भन्ने कुरा ख्याल गर्छु ।

कवि संगीतले भने आफूले निकै ढिला मात्र कविता लेख्न सुरू गरेको बताउँदै भने, मेरो परिस्थिति र समयले मलाई विद्रोही चेतका कविता लेख्न प्रेरित गर्‍याे ।

कविता लेख्दा कसका लागि लेख्ने भन्ने ख्याल नगरे पनि कविता सुनाउँदा भने कसलाई सुनाइरहेको छु भनेर ख्याल गर्ने बताए कवि नवराजले ।

अबदेखि नियमित रुपमा शिलापत्रडटकम ले प्रत्येक महिनाको पहिलो शनिबार श्रष्टासँग शिलापत्र कार्यक्रम गर्ने शिलापत्रडटकमका प्रधान सम्पादक अरुणदेव जोशीले बताए ।

समाजका हरेक विषयमा बहस गराउने शिलापत्रको उद्देश्य पुरा गर्न शिलापत्रले साहित्यलाई विशेष स्थान दिएको पनि प्रधान सम्पादक जोशीको भनाइ थियो ।