बुढीगंगामा २३ असारमा पुनः मतदान, उत्साही छैनन् मतदाता

A+ A A-

आउँदो २३ असारमा बाजुरको बुढीगंगा नगरपालिकामा पुनः मतदान हुने भएको छ । पुनः मतदान हुने भए पनि बुढीगंगा नगरपालिकाका मतदाता भने खासै उत्साही नभएको नेपाली कांग्रेस र एमालेका मेयरका उम्मेदवारहरू बताउँछन् । असारको रोपाइँको चटारोका बीच मतदातालाई पुनः मतदान गराउन गाह्रो हुने उनीहरूको भनाइ छ ।

असन्तुष्टिका बावजुद पनि हाल उनीहरू चुनावी प्रचारप्रसारमा जुटिसकेका छन् ।

हामीलाई अन्याय भयो : बानियाँ

भएको मतदानलाई नै सदर गरी मतगणना गर्नुपर्ने अडान राखेका एमालेका मेयर उम्मेदवार रामप्रसाद बानियाँ बुढीगंगावासीमाथि आयोगले अन्याय गरेको जिकिर गर्छन् । ‘हामी किसान हौँ । रोपाँइँको चटारोमा को जान्छ भोट हाल्न ?’ मानो रोपेर मुरी फलाउने बेला चुनाव राखेर आयोगले अव्यवहारिक निर्णय गरेको उनको भनाइ छ । उनले भने, ‘असारको महिनामा किसानलाई किन सास्ती दिएको ?’

त्यति मात्रै होइन, मतदान गर्नकै लागि भारतबाट आएका मतदाता पुनः मतदानका लागि आउने सम्भावना नरहेको बानिँया बताउँछन् । उनी भन्छन्, ‘धाँधली भएको कुरालाई ढाकछोप गर्न र एउटा मान्छेलाई जिताउन पुनः मतदानको नाममा प्रपञ्च र अन्याय भयो ।’

आयोगले पुनः मतदान गर्नैपर्थ्यो: खाती

नेपाली कांग्रेसका मेयर उम्मेदवार रंगबहादुर खाती भने धाँधली भएको ठाउँमा पुनः मतदान गर्नुको विकल्प नभएको बताउँछन् । आयोगको निर्णयबाट आफूहरू खुसी भएको उनको भनाइ छ ।

यद्यपि, असारको मास मतदाताहरू पुनः मतदान गर्न भने उत्साही नभएको उनको पनि बुझाइ छ । भारत फर्किसकेका मतदाताहरू आउने सम्भावना न्यून हुँदा मतदाता स्वतः घट्न सक्ने उनको अनुमान छ । अहिले चुनावी प्रचारप्रसार गर्न कठिन हुने उनको भनाइ छ ।

चुनावी तयारी सकिसकेको छ: निर्वाचन अधिकृत

बुढीगंगा नगरपालिकामा चुनाव हुन अब ९ दिन मात्रै बाँकी छ । यद्यपि, पुनः मतदानका लागि आवश्यक सम्पूर्ण तयारी सकिसकेको बाजुरा, बुढीगंगा नगरपालिकाका निर्वाचन अधिकृत लक्ष्मण कठायत बताउँछन् । ३० वैशाखमा भएको चुनाव रद्ध भएसँगै आयोगले पुनः मतदानको तयारी थालिसकेको उनको भनाइ छ । मतपत्र, मतपेटिका, मतदान सामग्रीलगायतका सम्पूर्ण तयारी सकिसकेको कठायत बताउँछन् ।

यसपालिको स्थानीय चुनावमा विवादको केन्द्रविन्दू बनेको बुढीगंगामा सुरक्षाकर्मीको व्यवस्थापन भने कडाइका साथ गरिने उनले बताए । बुढीगंगामा १० वटा वडा छन् जहाँ १३ हजारभन्दा बढी मतदाता रहेका छन् ।

के थियो विवाद ?

३० वैशाखमा भएको चुनावमा धाँधली भएपछि निर्वाचन आयोगले मतदान रद्ध गरेको थियो । मतगणना गर्ने कि पुनः मतदान गर्ने भन्ने विषयमा बुढीगंगामा विवाद थियो ।

सत्ता गठबन्धनको कांग्रेससहितका दलहरूले बुढीगंगामा पुनः मतदानको माग गरेका थिए भने एमालेले मतगणना गर्नुपर्ने अडान राख्दै आएको थियो ।

आयोगले भने २३ असारमा पुनः मतदान गर्ने निर्णय गरेपछि आयोगविरुद्ध बुढीगंगाका मतदाता दलबहादुर सावदले सर्वोच्चमा रिट हालेका थिए । उता आयोगले विवाद टुंगो लगाउन नसकेपछि एमालेका मेयर उम्मेदवार रामबहादुर बानियाँले मतगणनाको माग गर्दै ११ जेठमा उच्च अदालत दिपायलमा समेत रिट दर्ता गरेका छन् ।

सर्वोच्चले कुनै अन्तरिम आदेश जारी नगरे पनि मंगलबार कायममुकायम प्रधानन्यायाधीश दीपककुमार कार्की र न्यायाधीश सुष्मालता माथेमाको संयुक्त इजलासले बुढीगंगामा ३० वैशाखमा भएको मतदानको मतगणना गर्न अस्वीकार गरेपछि पुनः मतदान गर्नुको विकल्प नभएको हो ।

३० गते भएको चुनावमा दुईटा बुथमा कांग्रेसले धाँधली गरेको एमालेको आरोप थियो भने चारवटा बुथमा एमालेले धाँधली गरेको कांग्रेसको आरोप थियो । निर्वाचन आयोगले उक्त विषयमा निर्वाचन आयुक्त सगुनशमशेर जबराको नेतृत्वमा स्थलगत अध्ययन गरेको थियो । स्थलगत अध्ययनपछि जबराले मतगणना गर्न सिफारिस गरे पनि आयोगले भने पुनः मतदान गर्ने निर्णय गरेको हो ।

प्रकाशित मिति: मंगलबार, असार १४, २०७९ २०:२२