नेपालमा लगानी भित्र्याउन अस्ट्रेलियालाई आग्रह

A+ A A-

नेपाल चेम्बर अफ कमर्सले नेपालमा लगानी गर्न अस्ट्रेलियासमक्ष आग्रह गरेको छ । नेपालका लागि अस्ट्रेलियन राजदूत फेलिसिटी वोल्कसँग भएको भेटवार्तामा चेम्बरका पदाधिकारीले जलविद्युत्, वन, पर्यटन, कृषि एवं साना उद्योगमा लगानी गर्न आग्रह गरेका हुन् ।

नेपाल र अस्ट्रेलियाबीच ६० वर्षभन्दा पुरानो कूटनीतिक सम्बन्धलाई थप बलियो बनाउन सरकारी र निजीक्षेत्रबाट उच्चस्तरीय आर्थिक साझेदारीको आवश्यक्ता रहेको अध्यक्ष मल्लले बताए ।

अस्ट्रेलियाले नेपालको वनक्षेत्रको संरक्षण तथा संवर्द्धन गर्न लामो समयदेखि आर्थिक एवं प्राविधिक सहयोग गरेको अध्यक्ष मल्लले बताए ।

उनले जडीबुटी एवं खानीजन्य तथा धातुहरूको प्रशोधन गर्ने उद्योगमा लगानी गरी अन्तर्राष्ट्रिय बजार प्रवर्द्धन गर्नसमेत राजदूत वोल्कसमक्ष आग्रह गरे ।

नेपालका विद्यार्थीहरू अस्ट्रेलियामा अध्ययनका लागि गइरहेको सन्दर्भमा अध्यक्ष मल्लले त्यहाँका विख्यात शैक्षिक संस्थाहरूबाट नेपाली शैक्षिक संस्थाहरूलाई सम्बन्धन दिई शिक्षाको गुणस्तर सुधारमा सहयोग गर्नसमेत राजदूत वोल्कसमक्ष आग्रह गरे ।

राजदूत वोल्कले नेपाल–अस्ट्रेलियाको कूटनीतिक सम्बन्ध ६० वर्षभन्दा पुरानो र ऐतिहासिक भएको बताइन् । नेपालबाट वार्षिक ५० हजार विद्यार्थीहरू अध्ययनका लागि अस्ट्रेलिया जाने गरेको भन्दै वोल्कले उनीहरूको शैक्षिक सुधार तथा भविष्यका लागि आफ्नो सरकारले उच्च प्राथमिकतामा राखेको बताइन् ।

प्रकाशित मिति: मंगलबार, असार १४, २०७९ १७:४६