चिनीका खुद्रा व्यापारी भन्छन्- थाेक बिक्रेताले हाम्राे काँधमा बन्दुक राखेर गाेली चलाइरहेका छन्

चिनीका खुद्रा व्यापारी भन्छन्- थाेक बिक्रेताले हाम्राे काँधमा बन्दुक राखेर गाेली चलाइरहेका छन्

A+ A A-

१८ जेठ २०७९ देखि भारतले चिनी निर्यातमा प्रतिबन्ध लगायो । निर्यात रोकिएको केही समयमै चिनीको अभाव सिर्जना भयो । अभावसँगै चिनीको खुद्रा मूल्य एक सयबाट बढेर एक सय ५ रुपैयाँ पुग्यो ।

यस्तोमा व्यापारीले कृत्रिम अभाव सिर्जना गरेर मूल्य बढाउन खोजेको आमउपभोक्ताको गुनासो छ । मूल्य बढ्नुमा खुद्रा व्यापारीकाे कुनै हात नभएको नेपाल खुद्रा व्यापार सघंका निवर्तमान अध्यक्ष पवित्र वज्राचार्य बताउँछन् ।

‘उपभोक्ताले हेर्दा हामीले मूल्य बढाएको जस्तो देखिए पनि हामीले चिनीमा ५ रुपैयाँ हो राख्ने । होलसेलमा किलोको ८० रुपैयाँ पर्‍याे भने ८५ मा बेच्ने हो, १०० परे १०५ मा बेच्नुपर्‍याे । ठूला व्यापारीहरूले हाम्रो काँधमा बन्दुक राखेर गोली चलाइरहेका छन्,’ उनले भने ।

सरोकारवाला निकायले अनुगमनमा ध्यान नदिँदा भाउ बढेको उनको आरोप छ । ‘यो कृत्रिम अभाव हो । ठूला उद्योगीको गोदाममा अनुगमन गर्‍याे भने एक वर्षलाई पुग्ने चिनी भेटिन्छ,’ वज्राचार्यले भने ।

यो समस्याको विषयमा छलफल भइरहेको उद्योग, वाणिज्य तथा आपूर्ति मन्त्रालयका प्रवक्ता डा. नारायणप्रसाद रेग्मीले बताए ।

‘भारतबाट पनि चिनी रोकिएको छैन । चिनी व्यापारीसँग हाम्रो कुरा भइरहेको छ । मूल्य उतैबाट बढेर आएको भन्ने कुरा पनि सुनिएको छ । त्यस्तै, पेट्रोलियम पर्दाथको भाउका कारण पनि मूल्य बढेको कुरा आइरहेको छ । हामीले यो विषयलाई गम्भीरताका साथ लिइरहेका छौँ,’ उनले भने ।

चिनीको मूल्य र अभाव नियन्त्रण गर्न तत्काल केही गर्न सक्ने अवस्था नरहेको खुद्रा बजार मूल्यमा हस्तक्षेप गर्ने सरकारी निकाय खाद्य व्यवस्था तथा व्यापार कम्पनी लिमिटेडकी सूचना अधिकारी शर्मिला न्यौपाने सुवेदीले बताइन् ।

‘चिनीको खरिद प्रक्रिया अगाडि बढाउने तयारी त छ तर खरिद ऐनका कारण हामीले तुरुन्तै समस्याको समाधान गर्न सक्ने अवस्था छैन । हामीले आफ्नै खरिद नियमावली बनाउँदैछाैँ, त्यो बनिसकेपछि हामीलाई काम गर्न सहज हुन्छ,’ उनले भनिन् ।

नेपालमा हाल वार्षिक करिब २ लाख ५० हजार मेट्रिकटन चिनी खपत हुने गरेको छ । यसमध्ये करिब १ लाख ३० हजार स्वदेशी उत्पादनले धानिरहेको उद्योगीहरूको भनाइ छ । यो आँकडाअनुसार नेपालको उत्पादनले वार्षिक मागको करिब ५० प्रतिशत मात्रै धान्न सक्ने देखिन्छ ।

प्रकाशित मिति: मंगलबार, असार १४, २०७९ ११:१३