दुई वर्षभित्र सबै नेपालीले विद्युत् पाउँछन्: ऊर्जामन्त्री भुसाल

A+ A A-

ऊर्जा, जलस्रोत तथा सिंचाईमन्त्री पम्फा भुसालले आगामी दुई वर्षभित्र सबै नेपालीका लागि विद्युत् सेवा पुग्ने बताएकी छन् ।

सोमबार राष्ट्रियसभामा विनियोजन विधेयक २०७९ मा मन्त्रालयअन्तर्गत उठेका प्रश्नहरूको जवाफ दिँदै भुसालले भनिन्, ‘आगामी दुई वर्षभित्र सबै नेपाली जनतामा भरपर्दो र गुणस्तरीय विद्युत् सेवा पुग्नेगरी योजना बनाई कार्यान्वयन गरिनेछ ।’

आफूले मन्त्रालय सम्हालेपछि मासिक २० युटिसम्म विद्युत् खपत गर्ने २६ लाख ग्राहकले निःशुल्क विद्युत् सेवा पाएको भुसालको भनाइ थियो । ‘मैले मन्त्रालय सम्हालेपछि मासिक २० युटिसम्म विद्युत् खपत गर्ने विपन्न नागरिकलाई निःशुल्क विद्युत् सेवा दिने र मिटर जडान गर्ने व्यवस्था मिलाएको छु,’ उनले भनिन्, ‘देशभरका झन्डै ५२ लाख ग्राहकमध्ये करिब २६ लाख ग्राहकले यो सुविधा पाएका छन् ।’

सिंचाईमा प्रयोग हुने विद्युत्‌मा ७५ प्रतिशतसम्म सहुलियत दिनेगरी प्रतियुनिट २ रुपैयाँसम्म महशुल कायम गरिएको तथा खानेपानीतर्फ इनर्जी शुल्क करिब ५० प्रतिशतले घटाइएको उनको भनाइ छ ।

‘खानेपानी र सिंचाईमा डिमान्ड शुल्क हटाइएको छ । खानेपानीतर्फ इनर्जी शुल्क करिब ५० प्रतिशतले घटाइएको छ । अधिकांश वस्तु तथा सेवाको मूल्यवृद्धि भइरहेको अवस्थामा विद्युत्‌को क्षेत्रमा विगत दुई वर्षमा दुईपटक गरी २० प्रतिशत विद्युत् महशुल घटाइएको निवेदन गर्न चाहन्छु,’ उनले भनिन् ।

आगामी आर्थिक वर्षदेखि हरेक वर्ष करिब ७०० देखि १००० मेघावाट विद्युत् नेपालको विद्युत् प्रणालीमा थपिँदै जाने भुसालले बताइन् । यसरी विद्युत् थपिँदा आगामी २ वर्षको सुख्खा याममा समेत नेपालको विद्युत्‌ले नै आन्तरिक माग धान्ने उनको भनाइ थियो ।

प्रकाशित मिति: सोमबार, असार १३, २०७९ १४:२०